13 Апрель 2013
Субҳи рӯзи шанбе, 13-уми апрели соли равон шаҳри бостону ҳамешаҷавони Хуҷанд ба назар боз ҳам музайяну дилрабо менамуд. Зеро, ин навбат меҳмонон аз пойтахти кишварамон-шаҳри Душанбе, вилоятҳои Хатлону Бадахшон, водии Рашт ва шаҳру навоҳии вилояти Суғд ба ин куҳанмарз омаданд, то аксияи Ҳизби халқии демократии Тоҷикистонро таҳти унвони «Насли созанда» баргузор намоянд.
Ростӣ барномаи омодашудаи аксия хеле рангин ва ҷолиб буд, зеро, тамоми қишрҳои ҷомеа, шаҳрвандони синну сол ва касбу кори мухталифро ба ҳам овард. Яъне, баҳри кормандону дӯстдорони соҳаҳои гуногуни хоҷагии халқ имконияту шароити хуби вохӯрӣ ва гузаронидани чорабиниҳои ҷамъиятиву сиёсӣ, маърифативу фарҳангӣ, илмиву оммавӣ ва варзишӣ фароҳам оварда шуд.
Субҳ аз соати 8:00 тибқи барномаи аксияи «Насли созанда» бо иштироки садҳо нафар устодону толибилмони мактабҳои миёнаву олӣ дар микроноҳияҳои 27, 28 ва 34, ҳамзамон, кӯчаи ба номи Рифъат Ҳоҷиев шанбегӣ ҷиҳати боз ҳам тозаву обод намудани диёри зебоманзар сурат гирифт.
Бо иштироки теъдоди зиёди бонувон аз шаҳру навоҳӣ дар Хонаи маданияти №1-ум маҳфили мубоҳисоти сиёсии занҳо доир гардид, ки ҷамъомадагон атрофи масоили мубрами бонувон ва оилаҳои ҷавон гуфтугузор намуданд.
Варзишгарон ва садҳо нафар ҳаводорони варзишро чорабинии ҷолиб Автомотопробег ба ҳам овард, ки дар кӯчаи мошингард, аз маҳаллаи 28 то варзишгоҳи формула «К» гузаронида шуд.
Чорабинии дигари басо хотирмон намоиши паррандаҳои хушхон ва декоративӣ маҳсуб мешуд, ки дар назди Боғи фарҳангу фароғати ба номи Камоли Хуҷандӣ доир гардид ва ҳазорон дӯстдорони табиати зинда ва нотакрорро сарҷамъ намуд.
Ашхоси бешуғл ва корҷӯянда низ аз мадди назари ташкилкунандагони аксия дур намонданд. Барои онҳо дар назди театри давлатии тамошобини ҷавон ба номи Одилҷон Назаров ярмаркаи ҷойҳои холии кор баргузор гардид, ки даҳҳо нафар бо ҷойи кори доимӣ таъмин ва ё барои омӯхтани касбу ҳунар ба марказҳои таълимӣ роҳхат дода шуданд.
Аҳли илму адабро «Ярмаркаи китоб», ки дар назди Қасри ҷавонон ба номи Лоиқ Шералӣ ташкил карда шуда буд, сарҷамъ намуд ва эшон бо чанд китоби батозагӣ интишоршудаи шоирону нависандагон ва олимони маъруфи кишвар шинос гардида, барои ғанӣ кардани китобхонаҳои хеш ва ё муассисаҳои таълимӣ аз онҳо харидорӣ намуданд.
Ҳамзамон, дар ин мавзеъ намоиши ҳунарҳои рассомони ҷавон ба маърази тамошои шаҳрвандон пешниҳод гардид, ки ифодагари дӯстиву меҳанпарастӣ ва ваҳдату суботи мамлакат буд.
Чорабинии асосии аксияи «Насли созанда» дар назди театри давлатии мазҳакаи мусиқии ба номи Шайх Камоли Хуҷандӣ бо иштироки ҳазорон нафар шаҳрвандони вилоят доир гашт. Нахуст ба саҳнаи азими фарҳангӣ роҳбарони Кумитаи марказӣ ва вилоятии ҲХДТ ва Мақомоти иҷроияи ҳокимияти давлатии вилояту шаҳр баромада, гузаронидани чунин аксияву чорабиниҳоро барои мардум хеле муфид арзёбӣ намуданд.
Муовини аввали Раиси вилояти Суғд Ҷумъабой Сангинов паёми шодбошии Раиси вилоят, мӯҳтарам Қоҳир Расулзодаро ба ҷамъомадагон расонида, зикр кард, ки ҳадаф аз гузаронидани ин гуна чорабиниҳо сарҷамъ намудан ва тарбияи насли наврасу ҷавонон дар рӯҳияи ватандӯстиву меҳанпарастӣ, худшиносиву эҳтироми миллат мебошад.
Муовини Раиси Кумитаи марказии Ҳизби халқии демократии Тоҷикистон Асрор Латифов дар баромади хеш оид ба дастуру ҳидоятҳои Раиси Ҳизби халқии демократии Тоҷикистон, Ҷаноби Олӣ, Президенти кишвар, мӯҳтарам Эмомалӣ Раҳмонро ҷиҳати дастгирии ҳар як иқдоми ватандӯстона ва созандаву бунёдкоронаи ҷавонон сухан карда, ҷавононро воқеан, нерӯи созанда ва пешбарандаи ҷомеа номид. Ӯ илова кард, ки аксияи ҲХДТ «Насли созанда» аз вилояти Хатлон оғоз шуда, имрӯз дар вилояти Суғд, бахусус, маркази он - шаҳри бостонии Хуҷанд идома дорад.
Раиси шаҳри Хуҷанд Раҷаббой Каримов сараввал меҳмононро аз гӯшаву канори Тоҷикистони соҳибистиқлол хайра мақдам гуфта, иброз намуд, ки баргузории чорабинии бошукӯҳ, аксияи «Насли созанда» аз самараи ваҳдати миллат, сулҳу оромӣ дар кишвар башорат медиҳад.
Солҳои охир, илова кард Раиси шаҳр, - бо дастгириҳои бевоситаи Президенти мамлакат, Ҷаноби Олӣ, мӯҳтарам Эмомалӣ Раҳмон ва Раиси вилояти Суғд, мӯҳтарам Қоҳир Расулзода дар диёрамон бунёдкориву созандагӣ равнақи тоза гирифта, бешак дар сафи пеши иқдомоти наҷиб ҷавонони бонангу номус ва ватандӯст қарор доранд.
Раиси Кумитаи иҷроияи ҲХДТ дар вилояти Суғд Даврон Зоҳидов барои дастгирии ҳамаҷониба ба МИҲД-и вилоят, хоса Раиси вилояти Суғд Қоҳир Расулзода ва Раиси шаҳри Хуҷанд Раҷаббой Каримов арзи сипос намуд.
Ба 18 нафар аъзои Шӯрои ҷанговарони интернатсионалисти шаҳр дар вазъияти тантанавӣ билети узвияти ҲХДТ супорида шуд, ки қаблан барои қабул ба сафи ҳизб ариза пешниҳод карда буданд.
Барномаи рангин ва хотирмони консертӣ бо иштироки ситораҳои эстрадаи тоҷик Нигина Амонқулова, Муҳаммадрофеи Кароматулло, Боғигул Саидова, Сироҷиддин Худоймерганов, Дилноза Каримова, Мижгонаи Мирзо ва Дамир Олимов ба аксия-чорабинӣ ҷилои тоза бахшид.
