Асосӣ БойгонӣБа 160 нафар муҳассилини шаҳри Хуҷанд либосҳои мактабӣ ва лавозимоти хониш тақдим карда шуд

Ба 160 нафар муҳассилини шаҳри Хуҷанд либосҳои мактабӣ ва лавозимоти хониш тақдим карда шуд

(0 овоз, миёна 0 аз 5)

23 Август 2024

Имрӯз дар МТМУ №28-и шаҳри Хуҷанд дар арафаи Рӯзи дониш аз ҷониби Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода ба 160 нафар ятими кулл ва ашхоси камбизоат аз муассисаҳои таълимии шаҳри Хуҷанд либосҳои мактабӣ ва лавозимоти хониш тақдим гардид.

Иқдоми мазкур дар партави сиёсати раъиятпарваронаи Ҳукумати Ҷумҳурии Тоҷикистон ва ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон амалӣ гардид.
Раиси вилоят хонандагонро бо фарорасии соли нави таҳсил табрику таҳният намуда, аз ҷумла гуфт, ки дар сиёсати иҷтимоии давлату ҳукумат, ки ба фароҳам овардани шароити зиндагии шоистаи мардум равона гардидааст, табақаҳои ниёзманди аҳолӣ, бахусус ятимону бепарасторон авлавият дошта,  мавқеи хосро сазовор ҳастанд.
Муҳассилин ба Пешвои маҳбуби миллат ва Мақомоти иҷроияи ҳокимияти давлатии вилоят ва  Мақомоти иҷроияи ҳокимияти шаҳр барои дастгириву ғамхориҳои пайваста изҳори миннатдорӣ намуда, таъкид доштанд, ки  илмҳои муосирро аз бар менамоянд, донишманду бомаърифат ба воя расида, ба арзишҳои миллӣ, Истиқлолияти давлатӣ арҷ мегузоранд ва ба халқу Ватани хеш хизмати содиқона менамоянд.
Раиси вилоят ҳамчунин ба гирандагони шаҳодатномаи хатм бо медали тилло ва ғолибони озмунҳои байналмилалиро бо дастовардҳояшон таҳният гуфта, ба онҳо туҳфаҳои хотиравӣ тақдим намуд.
Раҷаббой Аҳмадзода ҳамзамон аз шароити таҳсил ва фаъолияти маҳфилҳо дар МТМУ №28 аз наздик ошноӣ пайдо намуда, ба масъулин ҷиҳати баланд бардоштани сатҳи таълиму тарбия ва ба камол расонидани хонандагони ватандӯсту донишманд дастуру супоришҳо дод.
Дар ин рӯз ба 160 нафар муҳассилин дастархони идона густурда шуд.