18 Декабр 2020
Дар МТМУ №20-и шаҳри Хуҷанд бо иштироки сокинони маҳаллаи Чорчароғ ва гуруҳи тарғиботчиёни Мақомоти иҷроияи ҳокимияти давлатии шаҳри Хуҷанд роҷеъ ба мақсаднок истифода бурдани неруъи барқ мулоқот баргузор гардид.
Иттилоъ дода шуд, ки дар сохторҳои энергетикии мамлакат тамоми корҳои оғозгардидаи таъмир ва тадбирҳои назоративу профилактикӣ ба анҷом расонида шуданд ва аз 10 декабри соли 2020 сар карда, интиқоли нерӯи барқ дар кишвар пурра ҷорӣ гардид. Дар фаслҳои тирамоҳу зимистон бемаҳдудият ба мардум додани барқ як қадами қатъӣ ба сӯи истиқлолияти энергетикии кишвар буда, натиҷаи амалӣ шудани сиёсати бобарори энергетикии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шумор меравад. Табиист, ки ин тадбир ба осонӣ муяссар нагардидааст.
Айни замон, дар овоне, ки ба муштариён бемаҳдудият барқ дода мешавад ва вобаста ба рӯз то рӯз сард шудани ҳаво талабот ба барқ бамаротиб меафзояд, мо бояд, ки аз неруи барқ сарфакорона истифода барем ва ҳаққи барқи истифодашударо сари вақт пардохт намоем. Ин омилҳо имкон медиҳанд, ки ташвишу ногувориҳои зиндагиву рӯзгори ҳамватанонамон аз ҳисоби норасоии барқ камтар гардида, барои рушди муназзами иқтисодиёти кишвар шароити бештар пайдо мешавад.
Сарфакорона истифода бурдани неруи барқ ва пардохти пурраи ҳаққи барқи истифодашуда нишонаи маданият ва масъулияти баланди шаҳрвандии ҳар сокини кишвар буда, ба кори муназзами тамоми таҷҳизоту дастгоҳҳои низоми энергетикӣ, яъне ба таъмини фаъолияти боэътимоди онҳо кафолат медиҳад. Ҳар сокини кишвар бояд ба низоми ягонаи энергетикии кишвар чун ба боигарии миллии ватани азизи худ муносибат намояд.
Дар ҷараёни мулоқот доир ба истифодаи сарфакоронаву мақсаднок ва боинсофонаи нерӯи барқ баромадҳо ироа гардида, аз ҳозирин даъват ба амал оварданд, ки ба таври қатъӣ ҷиҳати пешгирӣ кардани исрофкорӣ сайъ намоянд. Дар вохўрӣ ҳамчунин оид ба пешгирии ҷудошавии оилаҳо, гаравидани ҷавонон ба ҳизбу ҳаракатҳои мамнуъ, пешгирии бемориҳои сироятӣ, аёдати ашхоси яккаву танҳо ва бемор ва ғайраҳо мавриди баррасӣ қарор дода шуданд.
Дафтари матбуоти
Раиси шаҳри Хуҷанд
