17 Декабр 2020
Дар доираи сафари кории худ Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ба вилояти Суғд аз якчанд иншооти фаъол ва бунёдшудаистодаи шаҳри Хуҷанд боздид намуд. Дар ин сафар мавсуфро иҷрокунандаи вазифаи Раиси шаҳри Хуҷанд Фирдавс Шарифзода ва дигар шахсони масъул ҳамроҳӣ намуданд.
Вазири тандурустӣ ва ҳифзи иҷтимоии аҳолии Ҷумҳурии Тоҷикистон, роҳбари гурўҳи корӣ оид ба истиқболи 30-солагии Истиқлолияти давлатии Ҷумҳурии Тоҷикистон дар шаҳри Хуҷанд Ҷамолиддин Абдуллозода нахуст аз раванди бунёди идораи Маркази стандартизатсия, метрология, сертификатсия ва назорати савдои вилояти Суғд ошноӣ намуда, бо раванди корҳо аз наздик шинос шуд.
Зимни шиносоӣ бо фаъолияти корхонаҳои саноатии “Суғдиён”, “Афранг пласт” “Таҷпроф”, “Хантана Канада” ба афзуд намудани ҳаҷми истеҳсолот, зиёд кардани ҷойҳои нави корӣ, роҳандозии хатҳои нави истеҳсолӣ ва сарфакорона истифода бурдани неруйи барқ таваҷҷуҳ зоҳир карда шуд.
Таъкид гардид, ки сиёсати дурбинонаи Пешвои муаззами миллат муҳтарам Эмомалӣ Раҳмон вобаста ба пешниҳод ва қабули ҳадафҳои стратегӣ, аз ҷумла масъалаи саноатикунонии босуръат ё худ индустриаликунонии мамлакат, яке аз асосҳои калидии пешрафти иқтисодиёти миллӣ ба шумор меравад.
Вазири тандурустӣ ва ҳифзи иҷтимоии аҳолии Ҷумҳурии Тоҷикистон, роҳбари гурўҳи корӣ оид ба истиқболи 30-солагии Истиқлолияти давлатии Ҷумҳурии Тоҷикистон дар шаҳри Хуҷанд Ҷамолиддин Абдуллозода зимни боздиди худ аз раванди таълиму тарбия дар муассисаҳои таълимии мактаб барои хонандагони болаёкат ва МТМУ №19 ошноӣ пайдо намуда, бо хонандагону омӯзгорон суҳбати ошкоро анҷом дод. Ҷамолиддин Абдуллозода дар ин муассисаҳои таълимӣ аз ҳолати гармидиҳии он ва шароити таҳсил низ ошноӣ пайдо кард.
Дар микроноҳияи 13-уми шаҳри Хуҷанд азнавсозии кӯдакистони №35 бомаром идома дорад ва аз ҷараёни корҳои сохтмонӣ Вазири тандурустӣ ва ҳифзи иҷтимоии аҳолии Ҷумҳурии Тоҷикистон, роҳбари гурўҳи корӣ оид ба истиқболи 30-солагии Истиқлолияти давлатии Ҷумҳурии Тоҷикистон дар шаҳри Хуҷанд Ҷамолиддин Абдуллозода боздид ба амал овард.
Тавре, иттилоъ дода шуд, ки кўдакистони мазкур бинобар ниёз ба таҷдиду азнавсозӣ доштанаш, 20 сол инҷониб фаъолият надошт. Алҳол корҳои сохтмонӣ дар 5 бинои ин муассисаи таълимӣ аз ҷониби ширкатҳои ватании ҶДММ “Муҳандис” ва ҶДММ “Юсуф 2016” бо харҷи лоиҳавии 9 миллион сомонӣ оғоз гардида, бо маром идома дорад. Фармоишгари сохтмон идораи сохтмони асосии шаҳри Хуҷанд мебошад. Кўдакистони мазкур барои 320 нафар тарбиятгиранда пешбинӣ шудааст. Зимни азнавсозии кўдакистон тамоми имконоти инфрасохтори муосир ба назари эътибор гирифта шудааст.
Ҷамолиддин Абдуллозода ба суръатбахшии корҳо ва босифат анҷом додани он ба роҳбарияти шаҳр ва масъулини дахлдор дастуру супоришҳо дод.
Бояд қайд намуд, ки баҳри тақвияти корҳои ободониву бунёдкорӣ ва амалӣ гардонидани нақшаи чорабинии мазкур, ки аз 341 банд иборат буда, сохтмон, бунёд ва таъмиру таҷдиди зиёда аз 510 иншооти гуногуни соҳаҳои хоҷагии халқи шаҳр ба назар гирифта шудааст.
Ҷоиз ба зикр аст, ки давоми солҳои 2018-2020 беш аз 224 банди нақшаи чорабинӣ дар доираи нақшаи чорабиниҳои 30-солагии Истиқлолияти давлатии Ҷумҳурии Тоҷикистон амалӣ шуда, беш аз 473 адад иншооти гуногуни иҷтимоию маишӣ ва савдою хизматрасонӣ мавриди баҳрабардорӣ қарор гирифта шуданд, ки ин иҷроиши 92,7 фоизи иншооти ба нақша гирифташударо дар бар мегирад.
Дафтари матбуоти
Раиси шаҳри Хуҷанд