26 Ноябр 2020
Имрўз дар толори хурди Мақомоти иҷроияи ҳокимияти давлатии шаҳри Хуҷанд иҷрокунандаи вазифаи Раиси шаҳр Фирдавс Шарифзода бо лоиҳаҳои иншооти нав, ки дар самти корҳои ободонӣ ва шукуҳи нав бахшидан ба қисматҳои алоҳидаи хиёбони Исмоили Сомонии шаҳр амалӣ карда мешаванд, шинос гардид.
Иттилоъ дода шуд, ки аз ҷониби мутахасисони баландихтисоси соҳа тарҳи иншооти даромади шарқии шаҳр, мавзеъи меҳмонхонаи «Эҳсон», ҳудуди Муҷассамаи ёдгории шаҳидони Ҷанги бузурги Ватании солҳои 1941-1945 ва майдони Шайх Камоли Хуҷандиро мутобиқ ба стандартҳои меъмории миллӣ ва муосир таҳия ва пешниҳод шудааст.
Фирдавс Шарифзода зимни шиносоӣ бо лоиҳаҳои иншооти пешниҳодшуда, таъкид намуд, ки вобаста ба эълон шудани «Солҳои рушди деҳот, сайёҳӣ ва ҳунарҳои мардумӣ» солҳои 2019-2021- шаҳри Хуҷанд тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва нишондодҳои Раиси вилояти Суғд Раҷаббой Аҳмадзода шаҳри Хуҷанд бояд симои нав ба бар намояд. Амалӣ шудани иқдоми мазкур бо риояи тамоми талаботи меъморию шаҳрсозӣ шаҳри бостонии Хуҷандро ба «Тирози ҷаҳон»-и воқеъӣ мубаддал хоҳад гардонд.
Аз ҷониби шаҳрдор ба масъулини шаҳрсозӣ бо такмили лоиҳа бо назардошти васеъ намудани роҳҳо, чароғонкунии кӯча, биноҳои баландошёнаи истиқоматию маъмурӣ ва кабудизоркунии муҳити атроф ва ғайраҳо супоришҳои мушаххас дода шуд.
Ҷоиз ба зикр аст, ки дар асоси дастуру ҳидоятҳои бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва нишондодҳои Роҳбарияти вилояти Суғд тайи солҳои охир симои шаҳри Хуҷанд дигаргун шуда, дар ояндаи наздик низ бо заҳмати аҳлонаву ватандӯстонаи сокинон ва соҳибкорони бонангу номуси ин шаҳри куҳан амалҳои ободониву созандагӣ бахшида ба 30-солагии Истиқлолияти давлатии Ҷумҳурии Тоҷикистон вусъати тоза касб хоҳад намуд.
Дафтари матбуоти
Раиси шаҳри Хуҷанд