05 Ноябр 2020
Дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд бахшида ба 26-умин солгарди Конститутсияи Ҷумҳурии Тоҷикистон чорабинии илмӣ-фарҳангӣ баргузор гардид.
Таъкид шуд, ки Конститутсия маҳсули эҷоди Иҷлосияи тақдирсози миллат буда, Асосгузори сулҳу ваҳдати миллӣ - Пешвои миллат, Президенти мамлакат муҳтарам Эмомалӣ Раҳмон дар яке аз суханрониҳояшон зикр намуданд, ки «Иҷлосия дар инкишофи ислоҳоти конститутсионии мамлакат саҳифаи нав кушод ва барои таҳия ва қабули Конститутсияи нави Ҷумҳурии Тоҷикистон замина гузошт. Зеро акнун роҳ ба сўйи сохтмони давлати демократӣ, ягона, ҳуқуқбунёду дунявӣ муайян гардида, барои таъмини пурраи кафолатҳо ва ҳимояи ҳуқуқу озодиҳои инсон шароити мусоид муҳайё гардида буд». Натиҷаи ҳамин дастовардҳои конститутсионист, ки имрӯз дар мамлакат сулҳу субот ва ваҳдати миллӣ пойдор мебошад ва халқи Тоҷикистон бо ҳисси баланди ватандӯстӣ ба ободиву созандагии сарзамини соҳибистиқлоли худ машғул аст.
Омӯзгори ҷавони кафедраи забони давлатӣ ва ҷомеашиносӣ Хуршедҷон Турсунов дар баромади худ аз донишҷӯён даъват ба амал овард, ки бештар аз таърихи гузаштаи худ огоҳ бошанд, ифтихори миллии худро боло бардоранд ва бо донишу рафтори намунавӣ саҳме дар ҷодаи ободии кишвар гузоранд.
Баъдан озмуни “Беҳтарин донандагони Конститутсия” оғоз гардида, намояндагони чор факултети донишкада: дастаи “Ваҳдат” - факултети муҳандисӣ-иқтисодӣ, дастаи “Озодӣ” - факултети муҳандисӣ-технологӣ, дастаи “Сулҳ” - факултети информатика ва энергетика ва дастаи “Дӯстӣ” - факултети сохтмон ва нақлиёт байни ҳам қувваозмоӣ намуданд.
Аз ҷониби доварон оид ба ин санади таърихиву муқаддас, ки тамоми муносибатҳои муҳимтарини ҷомеаро ба танзим медарорад, саволҳо дода шуд.
Дастаҳо бо ҷавобҳои мушаххаси худ исбот намуданд, ки бояд ҳар як калима ва сатри Конститутсияро азизу муқаддас дониста, бо истифода аз он дар пойдории давлати демократӣ, ҳуқуқбунёд, дунявӣ, ягона, иҷтимоӣ ва соҳибистиқлоли Тоҷикистон ҳиссагузор бошем. Дастаҳо ба саволҳои додашуда дар мӯҳлати муқарраршуда, ҷавобҳои мушаххас ҷавоб дода, соҳиби баҳо гардиданд.
Дар натиҷа ғолибият насиби дастаи “Озодӣ” гардид. Ғолибон аз тарафи раёсати донишкада қадрдонӣ гардиданд.
Дар фарҷоми чорабинӣ аз ҷониби донишҷӯён шеъру сурудҳои дилангез пешкаши тамошобинон гардид.
Бояд қайд намуд, ки чорабинӣ бахшида ба 26-солагии Рӯзи қабули Конститутсияи Ҷумҳурии Тоҷикистон дар сатҳи баланд таҷлил ва гузаронида шуда, донишҷӯён бори дигар эҳсос намуданд, ки вазифаи шаҳрвандии ҳар як сокини Тоҷикистон он аст, ки онро дақиқ биомӯзанд, эҳтиром намоянд ва аз он ифтихор бикунанд.
Баргузор намудани чорабиниҳо ҷиҳати омӯзиши таърих ва аҳамияти ин китоби сарнавиштсоз, баланд бардоштани ҳисси худшиносии миллии донишҷӯён мусоидат хоҳад намуд.
Дафтари матбуоти
Раиси шаҳри Хуҷанд
