11 Март 2019
Дар толори хурди Мақомоти иҷроияи ҳокимияти давлатии шаҳри Хуҷанд бо иштироки Раиси шаҳри Хуҷанд Маъруф Муҳаммадзода ва беш аз 40 нафар намояндагони расонаҳои хабарӣ аз Рӯзи матбуоти тоҷик таҷлил карда шуд.
Раиси шаҳри Хуҷанд Маъруф Муҳаммадзода аҳли қаламро ба ифтихори Рўзи матбуоти тоҷик таҳният гуфта, аз ҷумла афзуд, ки воқеан ҳам матбуот ва воситаи ахбори омма ҷузъи асосии маънавият маҳсуб мешавад ва чун баёнгари афкори умум, воқеънигори зиндагӣ дар пешбурди ҳаёти ҷомеа, тарбияи маънавии инсонҳо ҳамеша хизмат мекунад. Рисолати аҳли қалам ва кормандони воситаҳои ахбори умум низ маҳз аз ҳақиқатнигорӣ, инъикоси воқеии ҳаводис ва баҳои ростин додан ба ҷараёни ҳаёти ҷамъиятӣ сарчашма мегирад. Қобили таваҷҷўҳ аст, ки кормандони воситаҳои ахбори умум ин рисолати касбиашонро сарбаландона ва муваффақона адо карда меоянд. Имрўз дар саросари кишвар даҳҳо рўзномаю маҷаллаҳо ба табъ мерасанд, радиою телевизионҳо фазои итилоотиро пур намуда, аҳли эҷод ва журналистон бо дарки масъулияти баланд ҳаёти ҷамъиятию сиёсӣ, иқтисодию иҷтимоӣ ва фарҳангию маънавии мамлакатро дар раванди пешравиҳои беназир воқеъбинона ба қалам медиҳанд, дар тарғиби сиёсати пешгирифтаи Ҳукумати мамлакат, ғояҳои дурандешона ва ояндабинонаи Асосгузори сулҳу ваҳдати миллӣ - Пешвои миллат, Сарвари давлатамон, муҳтарам Эмомалӣ Раҳмон саҳми муносиб мегузоранд ва бо истифода аз нерўи сухан мардумро ба созандагию бунёдкорӣ ҳидоят менамоянд.
Ба таъкиди Маъруф Муҳаммадзода дар як сол ду маротиба баргузор гардидани нишастҳои матбуотӣ, фармони Президенти Ҷумҳурии Тоҷикистон «Дар бораи вокуниши шахсони ман-сабдор ба маводи интиқодии Васоити ахбори омма» ва фароҳам овардани шароити мусоид барои тамоми намуди расонаҳои хабарӣ аз тадбирҳои муҳими Роҳбарияти давлату ҳукумат дар ин самт арзёбӣ мегардад. Таваҷҷуҳи хосса ва шинохту эътирофи рӯзноманигорон, баргузор намудани озмунҳои ҳавасмандӣ аз ҷониби Раиси вилояти Суғд мӯҳтарам Раҷаббой Аҳмадзода нишони волои арҷгузорӣ ба фаъолияти аҳли қалам арзёбӣ мегардад.
Шаҳрдор гуфт, ки дар ҳудуди шаҳри Хуҷанд, ғайр аз шабакаҳои телевизиони давлатӣ, ҳамзамон ширкатҳои телевизион ва радиои мустақил, телевизионҳои ноқилӣ, оҷонсии иттилоотӣ фаъолият густурда дошта, дар пур кардани фазои иттилоотии шаҳр саҳмгузорӣ менамоянд.Ин худ гувоҳи он аст, ки дар шаҳри Хуҷанди бостонӣ барои фаъолияти хуби васоити ахбори омма шароитҳои зарурӣ фароҳам оварда шудааст ва ин яке аз нишондодҳои беҳтарин дар қаламрави мамлакат арзёбӣ мегардад.Таҷлили Рўзи матбуоти тоҷик ва дар ин замина рў овардан ба таърихи матбуот ин қабл аз ҳама эътирофи қадри сухан чун нерўи бузурги ҳидояткунандаи мардум, садоқат ба кору анъанаҳои поягузорони матбуоти тоҷик аст. Васоити ахбори омма ҷузъи таркибии рўзгори мост ва сухани созанда ҳамеша ҳамроҳу ҳамқадами мо хоҳад буд.
Журналистони варзида ва соҳибқалам Дадохони Эгамзод, Карими Шариф, Илҳом Ҳошимов ва дигарон аз равобити доимии Мақомоти иҷроияи ҳокимияти давлатии шаҳри Хуҷанд бо расонаҳои хабарӣ тавсиф намуда, аз ҷумла таъкид доштанд, ки ин баҳри ободӣ ва рушду тараққиёти кишвари азизамон мусоидат хоҳад намуд.
Дар анҷоми чорабинӣ аз ҷониби Раиси шаҳри Хуҷанд Маъруф Муҳаммадзода ба як қатор рӯзноманигорони фаъол сипоснома ва туҳфаҳои хотиравӣ тақдим карда шуд.
Дафтари матбуоти
Раиси шаҳри Хуҷанд
