31 Январь 2018
Дар толори Мақомоти иҷроияи ҳокимияти давлатии шаҳри Хуҷанд маросими супоридани гувоҳномаҳо ба 30 нафар хамткунандагони курси омӯзишии “Мактаби сарварӣ” баргузор гардид.
Раиси шаҳри Хуҷанд Маъруф Муҳаммадзода дар маросими шаҳоданомасупорӣ аз ҷумла қайд намуд, ки Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон нақши занонро дар ҷомеаи башарӣ тимсоли офаранди ҳаёт, пайвандгари наслҳо ва низомбахши рўзгор ниҳоят бузург арзёбӣ намуда, рисолати занонро дар камолоти маънавию ахлоқии фарзанд барҷаста ва муайянкунанда медонад. Давлату Ҳукумати ҷуҳурӣ барои баланд бардоштани сатҳи маърифатнокии бонувон таъмини риояи ҳуқуқҳои инсониву конститутсионӣ ва фаъолияти самараноки онҳо тадбирҳои муассир андешида, мақому манзалати занонро рўз ба рўз дар татбиқи сиёсати иҷтимоии давлат таҳким мебахшад.
Маъруф Муҳаммадзода гуфт, ки яке аз дастовардҳои асосии Давлат ва Ҳукумати Ҷумҳурии Тоҷикистон дар даврони Истиқлолият ин такмили идораи давлатӣ ва таъмини гузариш ба низоми демократӣ буда, дар ин давра таҳти сиёсати хирадмандонаи Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон мо ба яке аз самтҳои нозуки рушди ҷомеаи тозаистиқлол, яъне дуруст муайян намудани сиёсати кадрӣ муваффақ гардидем. Бо назардошти муҳим будани масъалаҳои идораи давлатӣ ва тарбияи кадрҳои боистеъдод тибқи дастуру ҳидоятҳои Сарвари давлат тадбирҳои зарурӣ андешида шуда, дар ин самт барномаҳои кўтоҳмуҳлат, миёна муҳлат ва дарозмуҳлат қабул гардиданд. Дар соли 2018 аз рўи маълумоти оморӣ дар шаҳр 1164 нафар занон дар вазифаҳои роҳбарӣ фаъолият мебаранд, ки ин нишондиҳанда назар ба соли 2010 - 372 нафар зиёд мебошанд. Дар мақомоти иҷроияи ҳокимияти давлатии шаҳр 26 нафар занон фаъолият доранд.
Дар анҷоми суханронии худ Раиси шаҳри Хуҷанд Маъруф Муҳаммадзода гуфт, ки дар самти баланд бардоштани мақоми зан дар ҷомеа ва татбиқи Барномаи давлатии “Тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд”, “Стратегияи миллии фаъолгардонии нақши занон дар Ҷумҳурии Тоҷикистон” дар мақомоти иҷроияи ҳокимияти давлатии шаҳри Хуҷанд ҷиҳати омода намудани занону духтарони лаёқатманд ба вазифаҳои роҳбарикунанда, аз моҳи ноябри соли 2018 курси 3-моҳаи “Мактаби сарварӣ” аз ҳисоби 30 нафар занону духтарон таъсис дода шуда, шунавандагони курси мазкур онро бо муваффақият хатм намуданд. Ҳадафи асосӣ пеш аз ҳама таъмини дастрасии занону духтарон ба хизмати давлатӣ, таъмини ҳуқуқи баробарии мардон ва занон ҳангоми пешниҳод ва таъин намудан ба вазифаҳои роҳбарикунанда, мусоидат намудан дар болоравии маҳорату малакаи касбӣ, тарбияи ахлоқӣ, ватандўстиву ватанпарастӣ ва баланд бардоштани дараҷаи рақобатпазирӣ дар соҳаи хизматӣ давлатӣ мебошад.
Сипас, дар вазъияти тантанавӣ ба 30 нафар хатмкунандагони курси 3-моҳаи “Мактаби сарварӣ” Шаҳоднома тақдим карда шуд.
Шаҳрванди фахрии шаҳри Хуҷанд Мавлуда Шарифзода ва хатмкардаи курси “Мактаби сарварӣ” Мадина Салимова аз ин таваҷҷуҳи Мақомоти иҷроияи ҳокимияти давлатии шаҳри Хуҷанд изҳори сипосмандӣ намуда, таъкид доштанд, ки бо ҳидоятҳои Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон дар шаҳри Хуҷанд ҷиҳати иҷрои барномаи давлатии «Тарбия интихоб ва ҷобаҷогузории кадрҳои роҳбарикунанда аз ҳисоби занону духтарони лаёқатманд барои солҳои 2017-2022» тадбирҳои мушаххас андешида мешавад. Дастпарварони “Мактаби сарварӣ” дар ояндаи наздик дар баробари ба ҷо овардани рисолати аслии худ - устувор гардонидани оила, тарбияи шоистаи фарзандони боодобу соҳибмаърифату бонангу номус, ватандўсту худшинос, инчунин, бо заҳмату талошҳои пайгиронаи худ, сабру таҳаммул, хоксорию фурӯтанӣ дар рушди ҳаёти иқтисодӣ иҷтимоӣ, иқтисодӣ ва фарҳангӣ ҳиссаи сазовори хешро мегузоранд.
Дафтари матбуоти Раиси шаҳри Хуҷанд
