29 Декабрь 2018
Дирӯз Раиси шаҳри Хуҷанд Маъруф Муҳаммадзода дар хиёбони ба номи Исмоили Сомонӣ дар остонаи Соли нави мелодӣ сехи дӯзандагии «Амир»-ро мавриди истифода қарор дод.
Иттилоъ дода шуд, ки бо бунёди ин коргоҳ, ки барои қабули фармоишот ва дӯстани либосҳои гуногун пешбинӣ шудааст 10 нафар сокинони маҳаллӣ бо ҷойи кори доимӣ ва маоши хуб таъмин гардиданд.
Корхонаи мазкур аз ҷониби соҳибкори ватанӣ Мадина Каримова бунёд гардида, самти асосии фаъолияти он дӯзандагии либосҳои гуногуни корӣ ва соҳавӣ мебошад, ки бо дастгоҳу таҷҳизоти муосири дӯзандагӣ муҷаҳҳаз гардонида шудааст.
Дар коргоҳи дӯзандагӣ асосан духтарони хонанишин ба кор ҷалб гардида, ба дӯхти либосҳои ягона барои мактабҳо, корхонаву муассисаҳо, рахти хоб ва либосҳои миллӣ машғуланд. Афзалияти хоси ин коргоҳ дар он аст, ки матоъҳои дар дӯхташаванда истеҳсолоти ватанӣ буда, аз коргоҳҳои матоъбофии шаҳри Хуҷанд харидорӣ карда мешаванд.
Сифати либосҳои дӯхташаванда ба талаботи рӯз ҷавобгӯ буда, мувофиқ ба талаботи бозор истеҳсол карда мешавад.
Раиси шаҳри Хуҷанд Маъруф Муҳаммадзода зимни ифтитоҳи коргоҳи мазкур бо ёдоварӣ аз Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ аз ҷумла таъкид дошт, ки ба раванди созандагии Ватан ҳар як шаҳрванди бонангу номус бояд саҳмгузор бошад ва ҳар фарди ҷомеа бояд касбу ҳунаре дошта бошад, ки бо истифода аз он зиндагии худро пеш барад. Мо вазифадорем, барои ҳар шахсе, ки мехоҳад касбу ҳунар, нияту нақша ва қобилияту истеъдоди худро амалӣ гардонад, яъне ҷиҳати худтатбиқкунии шаҳрвандон шароити мусоид фароҳам орем. Бахусус онҳое, ки баҳри иҷрои нишондодҳои Паёми Роҳбари Давлат ҷиҳати коркарди ниҳоии пахта тадбирҳо меандешанд, ҳамаҷониба дастгирӣ карда мешаванд.
Сипас Маъруф Муҳаммадзода бо коргарони коргоҳи мазкур суҳбати озоду самимӣ анҷом дода, коргаронро ба истеҳсоли маҳсулоти хушсифат ҳидоят намуд.
Роҳбарияти коргоҳи мазкур нақша гирифтааст, ки то моҳи марти соли 2019 дар дигар минтақаи шаҳр чунин коргоҳро бо фарогирии беш аз 50 нафар коргарон таъсис ва ба истифода диҳад, ва минбаъд низ дар доираи имкониятҳои мавҷуда иқтидори истеҳсолиро зиёд ва шумораи ҷойҳои нави кориро бештар намоянд.
Муассиси коргоҳ Мадина Каримова иброз дошт,ки онҳо бо талаби вақт ва хоҳишу мароми мизоҷон либосҳои шинаму зебо ва муди нав духта, пешкаши харидорон кунанд.
Ҷоиз ба зикр аст, ки бунёди коргоҳи мазкур, ки дар идомаи корҳои созандагӣ бахшида ба 30 — солагии Истиқлолияти давлатии Ҷумҳурии Тоҷикистон дар шаҳри Хуҷанд ба амал омадааст, дар таъмини бозори дохилӣ бо маҳсулоти ватанӣ ва беҳдошти сатҳи зиндагии мардум нақши созанда гузошта, фаъол кардани ин гуна иншоот самараи татбиқи амалии дастуру супоришҳои Пешвои миллат дар самти бунёди коргоҳу корхонаҳои нави истеҳсолӣ мебошад.
Дафтари матбуоти
Раиси шаҳри Хуҷанд
