05 Ноябр 2018
Дар театри давлатии мазҳака ва мусиқии ба номи Камоли Хуҷандии маркази вилояти Суғд бо иштироки Раиси шаҳри Хуҷанд Маъруф Муҳаммадзода, муовини аввали Раиси вилояти Суғд Рустам Раҳматзода ва фаъолон маҷлиси тантанавӣ бахшида ба Рўзи Конститутсияи Ҷумҳурии Тоҷикистон баргузор гардид.
Маъруф Муҳаммадзода гуфт, ки баъд аз қабули Конститутсия таҳти сиёсати хирадмандонаи Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон дар кишвар ислоҳоти бунёдиву фарогири сиёсиву ҳуқуқӣ ва иқтисодиву иҷтимоӣ оғоз шуда, барои ба танзим даровардани соҳаҳои ҳаёти ҷомеа, давлат ва суботи конститутсионӣ заминаи мустақим фароҳам оварда шуд. Аз ин лиҳоз, солгарди қабули Конститутсияи Ҷумҳурии Тоҷикистон дар радифи санаҳои тақдирсози халқу миллат ва кишвар – Рўзи Истиқлолияти давлатӣ ва Рўзи Ваҳдати миллӣ барҳақ мавқеи хосаи ҳам сиёсӣ ва ҳам иҷтимоию маънавиро дорост. Мояи ифтихор аст, ки таҳлилгарони сатҳи ҷаҳонӣ Конститутсияи моро аз ҷумлаи демократитарин ва инсонпарваронатарин конститутсияҳо арзёбӣ намуданд ва имрўз ҳам ин ақида тағйир наёфтааст. Зеро Конститутсияи Ҷумҳурии Тоҷикистон арзиши олӣ доштани инсон, ҳуқуқ ва озодиҳои он, баёнгари соҳибихтиёрӣ ва сарчашмаи ягонаи ҳокимияти давлатӣ будани халқро эътироф мекунад.
Сипас, муовини якуми Раиси вилоят Рустам Раҳматзода табрикоти Раиси вилояти Суғд Раҷаббой Аҳмадзодаро ба самъи ҳозирин расонд, ки дар он аз ҷумла гуфта мешавад: “Дар ҳақиқат, дар Конститутсияи Ҷумҳурии Тоҷикистон заминаҳои ҳуқуқӣ барои татбиқи дигаргуниву навгониҳо дар тамоми соҳаҳои ҳаёт ба хотири пешрафти ҷомеа тарҳрезӣ шудаанд ва ҳадафи аслӣ фароҳам овардани имконот барои рушди тамоми ҷомеа ва ҳар як шаҳрванди Тоҷикистони соҳибистиклол мебошад. Аз ин лиҳоз, ҳадафмандона риоя ва амалӣ намудани матлабҳое, ки дар Конститутсия баён шудаанд, фаъолияти пурсамарро дар тамоми соҳҳои ҳаёти ҷамъиятӣ кафолат медиҳад. Вазъи иқтисодиву иҷтимоии Ҷумҳурии Тоҷикистон дар солҳои соҳибистиқлолӣ нишон медиҳад, ки дарвоқеъ, тамоми дастовардҳои ноилшудаи Тоҷикистони соҳибистиқлол бевосита ё бавосита бо қабули Конститутсия вобастагӣ доранд. Конститутсияи Тоҷикистон таҷассуми давлату давлатдории миллии мардуми куҳанбунёди тоҷик буда, бо назардошти олитарин арзишҳои умумибашарӣ таҳия гардидааст, бинобар ин, аз ҷониби коршиносон яке аз беҳтарин конститутсияҳои олам эътироф шудааст. Он моҳияти инсонпарварона дошта, баёнгари ормону ҳадафҳои аслии тамоми ҷомеаи кишвар ба шумор меравад”.
Дар анҷоми чорабинӣ Раиси шаҳри Хуҷанд Маъруф Муҳаммадзода ҳозиринро бо Рўзи Конститутсияи Ҷумҳурии Тоҷикистон табрику муборакбод гуфта, барояшон сиҳату саломатӣ, осмони софу беғубор, зиндагии бобарор ва саодатмандию сарбаландии рўзгорро таманно намуд.
Барномаи рангини фарҳангӣ табъи ҳозиринро болида намуд.
Дафтари матбуоти
Раиси шаҳри Хуҷанд
