31 Октябр 2018
25 октябри соли ҷорӣ дар Кумитаи Маҷлиси намояндагон оид ба масъалаҳои аграрӣ, захираҳои об ва замин таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Акрамшо Фелалиев бо иштироки масъулони вазорату кумитаҳои дахлдори мамлакат дар мавзӯи «Рафти иҷрои Буҷети давлатии Ҷумҳурии Тоҷикистон «Оид ба татбиқи Барномаи беҳтаргардонии низоми таъминоти оби нӯшокӣ ва рафъи партовоби шаҳри Хуҷанд» муҳокимаи парлумонӣ баргузор гардид.
Марҳилаи 1-уми «Барномаи беҳтаргардонии вазъи оби нӯшокии шаҳри Хуҷанд», ки соли 2004 оғоз гардида буд ва барои амалигардонии он 4 миллиону 929 ҳазор доллари ИМА сарф шуд, соли 2009 ба итмом расид. Марҳилаи 2-юми барномаи зикршуда соли 2008 оғоз гардид ва бо харҷи 6 миллиону 345 ҳазор евро анҷом ёфт.
Марҳилаи 3-юм, ки аз 18 июли соли 2016 оғоз шуд, соли 2019 поён меёбад.
Бояд гуфт, ки татбиқи лоиҳа аз интихоби мушовирони хориҷӣ оғоз гардид. Тибқи расмиёти Бонки аврупоии таҷдид ва рушд эълони озмун дар сомонаи электронии бонки мазкур ҷой дода шуд ва ширкати «Holinger»-и давлати Швейтсария барои татбиқи корҳои мушовирӣ «Оиди татбиқи лоиҳа ва ёрии амалӣ ба Гурӯҳи иҷроиши лоиҳа» ва ширкати мушовирии «Corporate Solutions»-и Британияи Кабир барои татбиқи қисмати «Беҳтаргардонии шароити молиявии коргоҳ ва ҳамкорӣ бо аҳолӣ» интихоб гардиданд. Корҳои ба уҳдаи ин ширкатҳои хориҷӣ гузошташуда дар муҳлати пешбинишуда амалӣ гашта истодаанд.
Дар қисмати дигари барнома хариди молу таҷҳизот ва иҷрои корҳо ба лотҳо тақсим шуд. Мутобиқи талаботи қонунгузории Ҷумҳурии Тоҷикистон эълонҳои тендерӣ марҳила ба марҳила тавассути сомонаҳои злектронӣ ва воситаҳои ахбори омма пахш ва нашр гардиданд.
Маълум шуд, ки новобаста аз корҳои ба сомонрасида, баъзе норасоиҳо дар татбиқи лоиҳа ҷой доранд. Барои мисол, ақибмонӣ дар муҳлати анҷоми лоиҳа (июли соли 2019) дида мешавад. Азхудкунии маблағ то 15 октябри соли ҷорӣ ҳамагӣ 29,2 фоизро ташкил медиҳад.
- Ҳамчунин, назорати ҷамъиятии иҷрои корҳо ба тариқи зарурӣ ба роҳ монда нашудааст. Новобаста аз корҳои зиёди дар ду марҳила ба сомонрасида сифати оби нӯшокӣ, истифодаи самараноки он ва пардохти саривақтии ҳаққи оби нӯшокӣ беҳбудиро талаб мекунад. Аҳолӣ аз раванди татбиқи барномаи мазкур огоҳии пурра надорад. Ҳодисаҳои худсарона пайвасткунии хатҳои оби полезии аҳолӣ ба хатҳои магистралии оби нӯшокӣ низ мушоҳида мешавад, — гуфт Зуфар Исмоилзода.
Муовини раиси шаҳри Хуҷанд Ҷамшед Абдуқаюмзода зикр кард, ки татбиқи лоиҳа барои таъсис додани ҷойҳои корӣ, пешгирии паҳншавии бемориҳои сирояткунанда мусоидат менамояд. Ҷиҳати амалӣ сохтани барнома як қатор корҳо, аз ҷумла, тайёр намудани кормандони техникӣ ва роҳбарикунандаи соҳа мутобиқ ба талаботи стандартҳои ҷаҳонӣ, беҳтар намудани шароити молиявӣ — хоҷагидории коргоҳ, баланд бардоштани маданияти истифодаи оби нӯшокӣ, сохтмони корхона барои истеҳсоли гипохлорид, усули хизматрасонии безараргардонии оби нӯшокӣ ва ғайра бояд татбиқ шаванд.
Директори гурӯҳи иҷроиши лоиҳаи КВДК «Хуҷандобуканал» Раҳмат Бурҳонов иттилоъ дод, ки ҳоло қариб 98 фоизи шаҳри Хуҷанд 24 соат бо оби нӯшокӣ таъмин аст. Дар натиҷаи ба таври худҷорӣ овардани об аз рӯди Хоҷабоқирғон қариб 1 миллион кВт/соат неруи барқ сарфа гардид. Фаъолияти умури назоратӣ низ дар ин самт хуб ба роҳ монда шудааст. Масалан, хлоркунонии об, фишори об дар лӯлаҳо тавассути компютер назорат карда мешавад. То оғози лоиҳа талафоти об дар шаҳри Хуҷанд ба 67 фоиз баробар буд. Ҳоло ин рақам 23 фоизро ташкил медиҳад. Акнун 62 фоизи истифодабарандагони об бо ҳисобкунаки об таъминанд.
Сипас, сараудитори Палатаи ҳисоби Ҷумҳурии Тоҷикистон Собир Салимзода ҳозиринро бо натиҷаи аудити лоиҳаи мазкур ошно намуд.
Дар робита ба мавзӯъ байни вакилони Маҷлиси намояндагон ва масъулин саволу ҷавоб ва музокираҳои судманд сурат гирифт.
Дар фарҷом аз рӯйи масъалаи муҳокимагардида қарори дахлдор қабул шуд.
