13 Сентябрь 2018
Дар коллеҷи тиббии шаҳри Хуҷанд, беморхонаи вилоятӣ ва мактаб барои хонандагони болаёқати шаҳри Хуҷанд мулоқоти вакили Маҷлиси намояндагони Маҷлиси Олии Ҷумҳурии Тоҷикистон Гулбаҳор Назирӣ бо устодону донишҷӯён, хонандагону омӯзгорон ва сокинони маҳаллаҳои Сари баландӣ, Навбаҳор, Темурмалик ва Тиллокон баргузор гардид.
Гулбаҳор Назирӣ, вакили Маҷлиси намояндагони Маҷлиси Олии Ҷумҳурии Тоҷикистон зимни баромади худ таъкид дошт, ки тибқи Стратегияи миллии рушд барои давраи то соли 2030 сиёсати давлат дар таъмини пешрафти минбаъдаи кишвар ба афзалият ва самтҳои асосии расидан ба ҳадафҳои стратегӣ, аз қабили таъмин намудани истиқлолияти энергетикӣ ва гузаштан ба истифодаи самарабахши нерӯи барқ, аз бунбасти коммуникатсионӣ баромада, ба кишвари транзитӣ табдил додани Тоҷикистон, ҳифзи амнияти озуқаворӣ ва таъмин кардани дастрасии аҳолӣ ба ғизои хушсифат, инчунин вусъати шуғли пурмаҳсул равона мегардад.
Зеро муҳайё намудани зиндагии шоиста барои шаҳрвандони кишвар дар оянда низ ҳамчун ҳадафи олӣ ва стратегии мо боқӣ мемонад.
Дар ин ҷода таҳкими рушди устувори иқтисодиёт, ки ба ҷалби сармоя асос меёбад ва бо дарназардошти рушди илм ва инноватсия ба анҷом расонидани саноатикунонии босуръат тавассути баланд бардоштани иқтидорҳо бояд амалӣ гардад.
Бо ин мақсад афзоиши босуръати соҳаҳои саноату кишоварзӣ, хизматрасонӣ ва сайёҳӣ таъмин гардида, барои ташкили ҷойҳои нави корӣ ва таҳкими иқтидори содиротии кишвар замина фароҳам оварда мешавад, ки осебпазирии иқтисоди миллии моро аз таъсири манфии омилҳои беруна коҳиш медиҳад.
Инчунин, ҷалбу истифодаи самараноки сармоягузориҳо, ки ба рушди бахши воқеии иқтисодиёт ва инфрасохтор нигаронида шудааст, бояд васеъ ба роҳ монда шавад.
Ҳадафи таъмини истиқлолияти энергетикӣ, ки мақсади асосии он пурра қонеъ намудани талаботи иқтисодиёт ва аҳолӣ бо нерӯи барқ мебошад, амалӣ гардида, бунёду барқарорсозии долонҳои нақлиётӣ ба анҷом расонида мешавад ва масъалаи аз бунбасти коммуникатсионӣ пурра раҳоӣ бахшидани Тоҷикистон ҳаллу фасл мегардад.
Дар ин раванд, зарур аст, ки ҷиҳати афзоиши сармоя ба рушди нерӯи инсонӣ ва ҷорӣ намудани технологияҳои пешқадам ҳамчун заминаи тараққиёти инноватсионии мамлакат ҳамаи тадбирҳои зарурӣ андешида шавад. Итминон дорам, ки иқдомоту чорабиниҳои дар ҳуҷҷатҳои стратегиву барномавӣ дарҷгардида ба пешрафти минбаъдаи мамлакат ва фароҳам сохтани шароити зиндагии сазовор барои ҳар як шаҳрванди кишвар мусоидат мекунанд.
Мавсуф қайд намуд, ки «Тавассути татбиқи ислоҳоти зарурӣ фазои мусоиди соҳибкориву сармоягузорӣ фароҳам гардида, муколама ва шарикии давлат бо бахши хусусӣ дар сатҳи миллӣ ва минтақавӣ густариш ёфт.Ҳукумати мамлакат ба рушди соҳибкорӣ, махсусан, соҳибкории хурду миёнаи истеҳсолӣ ҳамчун самти афзалиятнок ва таъминкунандаи пешрафти минбаъдаи иқтисоди миллӣ аҳаммияти махсус медиҳад. Дар 27 соли истиқлолият бо ҷалби сармояи дохиливу хориҷӣ садҳо корхонаи хурду бузурги истеҳсолӣ бунёд ва ҷойҳои корӣ таъсису барқарор карда шуданд. Яъне агар соли 1991 дар мамлакат ҳамагӣ 358 корхонаи саноатӣ фаъолият карда бошад, ҳоло шумораи онҳо ба 2100 расидааст. Танҳо соли ҷорӣ бунёди 14 корхонаи бузург бо таъсиси панҷуним ҳазор ҷойи кори доимӣ ба нақша гирифта шуда, то имрӯз, аллакай, як қисми онҳо ба фаъолият оғоз кардаанд. Қобили зикр аст, ки саноати имрӯзаи Тоҷикистон дорои заминаи маҷмӯан инкишофёфта ва бо технологияҳои ҳозиразамон муҷаҳҳаз буда, беш аз 140 навъи маҳсулот истеҳсол мекунад, ки ба соҳаҳои истихроҷ ва коркарди маъдан, истихроҷи ангишт, саноати сабук ва кимиё, мошинсозӣ, коркарди металл, аз ҷумла металлҳои қиматбаҳо, масолеҳи сохтмон ва саноати хӯрокворӣ тааллуқ доранд. Танҳо дар самти коркарди пахта дар даврони соҳибистиқлолӣ даҳҳо корхонаҳои нав бунёд шуда, иқтидори коркарди нахи пахта аз 28 ҳазор тоннаи соли 1991 ба беш аз 100 ҳазор тонна расонида шуд. Дар шароити имрӯза давлат дар асоси ҷорӣ намудани технологияҳои инноватсионӣ барои рушди соҳаи саноати мамлакат ҳамаи заминаҳои заруриро муҳайё намудааст. Ноил гаштан ба ин мақсад бояд ба яке аз ҳадафҳои муҳимми стратегии миллӣ дар солҳои оянда табдил ёбад. Заминаҳои объективии амалӣ гардидани чунин ҳадафро афзоиши аҳолии мамлакат ҳамчун қувваи истеҳсолкунанда, ки дар он захираҳои меҳнатӣ беш аз 50 фоиз мебошанд, инчунин, мавҷудияти имкониятҳои бузурги гидроэнергетикӣ, сарватҳои табиӣ ва маҳсулоти кишоварзӣ ҳамчун ашёи хом барои рушди саноати металлургияи ранга ва сиёҳ, сӯзишворӣ, кимиё, масолеҳи сохтмон ва саноати сабуку хӯрокворӣ ташкил медиҳанд.
Сипас, Наим Маликисломӣ, раиси ҲХДТ дар шаҳри Хуҷанд баромад намуда, дар бораи ҳифзи Истиқлолияти давлатӣ ва парҳез намудан аз ҳаракатҳои иртиҷоӣ ибрози андеша намуд.
Иштирокдорони маҷлис ба Гулбаҳор Назирӣ, вакили Маҷлиси намояндагони Маҷлиси Олии Ҷумҳурии Тоҷикистон саволҳо дода, ҷавобҳои қаноатбахш гирифтанд.
Имрӯз чунин мулоқот дар Марказаи фарҳанг, Донишкаи иқтисод ва савдои Донишгоҳи тиҷорати Тоҷикистон, муассисаи томактабии №15-и шаҳри Хуҷанд баргузор хоҳад шуд.
Дафтари матбуоти
Раиси шаҳри Хуҷанд
