03 Май 2018
Дар толори Мақомоти иҷроияи ҳокимияти давлатии шаҳри Хуҷанд конференсияи илмӣ - назариявӣ бахшида ба фаъолияти меҳнатии Корманди шоистаи саноати Ҷумҳурии Тоҷикистон, Шаҳрванди фахрии шаҳри Хуҷанд Ғаффорхон Муҳитдинов таҳти унвони "Саҳми Ғаффорхон Муҳитдинов дар пешрафти соҳаи саноати Ҷумҳурии Тоҷикистон” баргузор гардид.
Раиси шаҳри Хуҷанд Маъруф Муҳаммадзода зимни маърӯзаи хеш гуфт, ки “Истиқлолияти давлатӣ бо сайъю кӯшишҳои пайвастаи Асосгузори сулҳу Ваҳдати миллӣ, Пешвои миллат, Президенти мамлакат мӯҳтарам Эмомалӣ Раҳмон дар рушду тараққиёти кишвар пешравиҳои назаррасро фароҳам овард. Дар ин росто саҳми фарзандони кордону садоқатманди фарзонаи миллат низ боризу назаррас арзёбӣ мегардад."
Таъкид шуд, ки Ғаффорхон Муҳитдинов соли 1993 Академияи хоҷагии халқии назди Ҳукумати Федератсияи Русияро хатм намуда, солҳои 1993-1994 дар вазифаи муовини аввали Раиси шаҳри Хуҷанд кор кардаанд.
Солҳои 1994-1997 бо фармони Президенти Ҷумҳурии Тоҷикистон Раиси кумитаи давлатӣ оид ба саноати Ҷумҳурии Тоҷикистон таъин шуда, соли 1997 бо Қарори Ҳукумати Ҷумҳурии Тоҷикистон ба вазифаи Раиси кумитаи саноати мудофиаи назди Ҳукумати Ҷумурии Тоҷикистон таъин гардида, соли 2001 муовини Вазир-сардори департаменти саноати мошинсозӣ, электронӣ ва таҷҳизоти барқии Вазорати саноати Ҷумҳурии Тоҷикистон, аз соли 2003-2005 ёвари Вазири мудофиаи Ҷумҳурии Тоҷикистон адои вазифа кардааст.
Карим Шариф, намояндаи Мақомоти иҷроияи ҳокимияти давлатии вилояти Суғд Меҳрономаи Раиси вилояти Суғд Раҷаббой Аҳмадзодаро ба самъи ҳозирин расонд. Зикр гардид, ки бо кӯшиши Ғаффорхон Муҳитдинов корхонаҳои саноати мудофиаи Ҷумҳурӣ пешрав гашт. Барои ин марди наҷиб фазилату поквиҷдонӣ, хоксорӣ, ғамхорӣ нис-бат ба кормандон, маҳбубият ба халқу диёр, башардӯстӣ хос мебошад. Ватан хизматҳои хоксоронаи ин абармардро қадр кардааст. Барои мувафаққиятҳои калон, навовариҳои илмию истеҳсолӣ, саҳм дар тарбияю камолёбии мутахассисон ба унвони фахрии “Корманди шоистаи сано-ати Тоҷикистон”, нишони “Шараф”, Ифтихорномаи Президенти Ҷумҳурии Тоҷикистон ва ифтихорномаи Шӯрои Олии Ҷумҳурии Тоҷикистон сарфароз гардидааст. Инчунин бо медали корманди фахрии саноати Ҷумҳурии Тоҷикистон, медалҳои Ҷашнии “5, 10-солагии Қувваҳои Мусаллаҳи Ҷумҳурии Тоҷикистон”, “10-солагии ҷаласаи 16-уми Иҷлосияи тақдирсози Шӯрои Олии Ҷумҳурии Тоҷикистон” ва унвони “Аълочии сарҳадчии Ҷумҳурии Тоҷикистон” мукофотонида шудааст.
Директори генералии корхонаи муштараки тоҷикӣ-туркии “Арча-мебел” Алишер Рустамов доор ба саҳми Ғаффорхон Муҳитдинов дар тараққиёти саноати Тоҷикистон ва иштирокчии иҷлосияи 16 Шӯрои Олии Ҷумҳурии Тоҷикистон Олимҷон Ҳасанов бо маърӯзаи худ таҳти унвони “Саноатчии муваффақ ва сиёсатмадори барҷаста” доир ба хидматҳои Ғаффорхон Муҳитдинов дар соҳаи саноат ва нақши ӯ ҳамчун вакили мардумӣ андешаҳои хешро баён дошт.
Қайд гардид, ки Ғаффорхон Муҳитдинов Шаҳрванди фахрии шаҳри Хуҷанд ва шаҳри Линколни штати Небраскаи ИМА мебошанд. Ба туфайли меҳнати шоёну назаррас дар саросари ҷумҳурӣ шӯҳратёр гардидааст. Ғаффорхон Муҳитдинов ҳамеша кӯшиш менамояд, ки барои ободии диёр ва барои беҳтар кардани ҳаёти иҷтимоии аҳли меҳнат, саҳми арзандаи худро гузорад.
Ҳамкорону ҳамсабақон ва хешону пайвандон низ аз дигар хислатҳои неки Ғаффорхон Муҳитдинов ҳарф заданд.
Ғаффорхон Муҳитдинов дар анҷоми конфронс барои ташкили чунин маҳфил ба Роҳбарияти шаҳри Хуҷанд ва дигар масъулин миннатдорӣ баён намуда, таъкид дошт, ки дар оянда низ баҳри тарбияю раҳнамоии ҷавонони ободкори Ватан саҳми хешро мегузорад.
Дафтари матбуоти
Раиси шаҳри Хуҷанд
