16 Март 2018
Нишасти 160 маҳфили илмиву адабии “Ганҷи сухан” дар ҳузури бештар аз дусад нафар дӯстдорони каломи бадеъ бо иштироки олимону адибони номвари кишвар дар арафаи Наврӯзи дилафрӯз дар толори ДДХ ба номи академик Бобоҷон Ғафуров баргузор гардид. Маҳфилро роҳбари маҳфил Саидумрон Саидов ифтитоҳ бахшида ҳозиринро бо Наврӯз муборакбод гуфт ва иттилоъ дод,ки ин нишаст ба ду воқеаи фараҳбахш яке фарорасии Баҳору Наврӯз дигаре ба солгарди Қаҳрамони Тоҷикистон, асосгузори адабиёти навини тоҷик устод Садриддин Айнӣ бахшида шудааст
Ректори донишгоҳ баробари сипосгузорӣ аз таваҷҷӯҳи Раиси вилояти Суғд ҳозиринро бо Наврӯзи оламафрӯз табрик намуд. Ҳамзамон аз мақом ва манзалати маҳфили илмиву адабии “Ганҷи сухан”ибрози назар намуда, дар тарбияти маъанвӣ ва ахлоқии ҷомеа хидмати онро беназир арзёбӣ кард.
Дар бахши “Навгониҳои илмиву адабӣ” аз ҷониби Насимҷон Ҳамробоев- дотсенти донишгоҳи давлатии Хуҷанд ба номи академик Бобоҷон Ғафуров бештар аз 25 номгӯ китоби тозанашр муаррифӣ гардид.
Саидумрон Саидов- дотсенти донишгоҳи давлатии Хуҷанд ба номи академик Бобоҷон Ғафуров андешаҳои худро дар бораи назари Пешвои миллат оид ба устод Садриддин Айнӣ баён кард. Ӯ гуфт, ки Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон чи дар суханрониву мулоқот ва чи дар осори илмиву адабии худ,зиндагинома ва осори асосгузори адабиёти навин, нависанда, шоир, муҳаққиқи адабиёт ва таърихи миллати тоҷик, Қаҳрамони Тоҷикистон Садриддин Айниро ҳамчун мактаби ибрат ва сарчашмаи ноби ҷоннисориву ҷонгудозиҳо дар бунёди тамаддуни даврони нави миллат муаррифӣ менамоянд. Қариб дар ҳамаи таълифоти Эмомалӣ Раҳмон, ки ба таъриху адабиёт тааллуқ дорад ба зиндагинома, афкору андеша ва тадқиқоти илмиву адабии устод Садриддин Айнӣ руҷӯъ шудааст. Дар маърӯзаи муҳаққиқонаи худ “Суннатҳои наврӯз дар “Ёддоштҳо”-и Садриддин Айнӣ” номзади илмҳои филология дотсент Нуралӣ Нурзод ҳозиринро бо паҳлӯҳои ноомӯхтаи китоби пурарзиши устод Айнӣ ошно кард. Воқеан як хидмати бузурги Садриддин Айнӣ,ки аз эҳтирому муҳаббати беандозаи нависанда ба таърихи миллат сарчашма мегирад ин кӯшиш дар зинда нигоҳ доштани анъана , маросиму ҷашн ва суннатҳои неки ниёгонамон ба ҳисоб мерафт. Ба қавли Пешвои миллат: ”Наврӯз аз ҳама фишору зӯровариҳо гузашта,ҳамчун иди миллӣ зинда монд. Таърих хидматҳои бузурги Садриддин Айнӣ, Бобоҷон Ғафуров, Мирзо Турсунзода, Муҳаммад Осимӣ ва даҳҳо фарзандони бузурги миллатро, ки дар рӯзҳои сахт суннати Наврӯз ва расму оинҳои неки аҷдодиро пуштибонӣ карданд, бо ҳарфҳои заррин сабт кардааст”.
Дар бахши “Наврӯзи шеър”шоири хушкалом Маликнеъмат чанд шеъри тозаи худро қироат кард. Воқеан Маликнеъмат аз зумраи шоирони хушбаён ва соҳибназари тоҷик аст, ки ашъораш дилнавози ширин мебошад.
Шодӣ Шарифов-дотсенти донишгоҳи давлатии Хуҷанд ба номи академик Бобоҷон Ғафуров бошад бо як маърӯзаи пурмӯҳтаво таҳти унвони “Шоире бо лаҳни дилнавоз” дар бораи шеъри шоири соҳибсабк, навпардозу рангинхаёл Давлати Раҳмониён сӯҳбати ширине барпо намуд. Давлати Раҳмониён муаллифи китобҳои “Растахези рӯҳ”,”Найистон”, “Марзи исён”, “Қиёми рӯҳ” ва чандеи дигар мебошад. Муҳаққиқи ҷавон Шодӣ Шарифов перомуни вожаву таъбироти шоиронаи Давлати Раҳмониён, ҳунари шоирии ӯ як тадқиқоти ҷолиберо ба анҷом расонидааст,ки қобили таҳсин аст. Дар маҳфил сарояндаи ҷавон Марям, ки дар бозхонии сурудҳои ҳофизони номвар чун Барно Исҳоқова, Тӯхта Иброҳимова ва дигарон маъруф гардидааст бо таронаҳои дилнавоз ба маҳфил таровати дигар ато кард.
Дафтари матбуоти
Раиси шаҳри Хуҷанд
