29 Январь 2018
Иҷрокунандаи вазифаи Раиси вилоят Раҷаббой Аҳмадзода зимни сафари корӣ ба шаҳри Хуҷанд, ки рӯзи якшанбеи 28 январ сурат гирифт, дар хиёбони Раҳим Ҷалил бо умеди ободониву сарсабзии ҳамешагии диёр дарахти ороишӣ шинонид ва сокинони шаҳрро барои вусъати корҳои ободонӣ ва маъракаи ниҳолшинонӣ ба истиқболи ҷашни Сада ҳидоят намуд.
Дар сурати бунёди иншооти замонавӣ дар соҳилҳои Сирдарё нуфузи сайёҳии шаҳри бостонии Хуҷанд боло рафта, дар навбати худ Хуҷанд ба меъёрҳои байналмиллалии шаҳрҳои саёҳатӣ мутобиқ мегардад. Меҳмонхонаи замонавии “Парламент” аз ҷумлаи чунин иншооти саёҳатист, ки аз ҷониби соҳибкори маҳаллӣ бунёд ёфта, бо усули омезиши тарҳҳои шарқиву аврупоӣ сохта шудааст. Меҳмонхона аз чор ошёнаи истиқоматӣ ва як ошёнаи хизматрасонӣ иборат шуда, дар ояндаи наздик бо шароитҳои беҳтарин дари худро ба рӯи мизоҷон боз хоҳад кард. “Парламент” на танҳо ҳамчун меҳмонхона, балки чун маҷмааи байналмиллалии хизматрасонӣ фаъолият хоҳад бурд, ки дорои 28 утоқи хоби барҳаво, тарабхона, ҳаммом, ду майдони варзишӣ барои футбол ва дигар намудҳои варзиш, толори обутоби бадан ва минтақаи сайругашт мебошад. Яъне тамоми шароитҳои зиндагиву истироҳатӣ барои мизоҷон дар як ҷой фароҳам оварда шудааст.
Дар навбати аввал дар меҳмонхона беш аз 50 нафар бо ҷойи кор таъмин мешаванд. Муҳити зебои соҳили Сирдарё ба ин маҷмааи истироҳатӣ шукуҳи бештар мебахшад. Роҳбарияти меҳмонхона тасмим дорад бо фароҳам овардани беҳтарин имкониятҳои хизматрасонӣ ба гирифтани унвони меҳмонҳонаи ситорадор тавассути баҳогузории худи мизоҷонаш шарафёб шавад.
Роҳбари вилоят зимни боздид ҳолати кунунии чойхонаи “Сирдарё”-ро низ мавриди назар қарор дод. Дар воқеъ, эҳёи фарҳанг ва анъанаҳои миллӣ имрӯз тақозои замон аст. Халқи тоҷик бо маданияти бойи чойхонадории худ дар таърих мақоми хоса дорад. Дар ин замина, ба фаъолияти чойхонаҳои миллӣ, ки рукни муҳими маданияти маҳалладории ниёгонамон ба ҳисоб меравад, дар вилоят таваҷҷуҳ зоҳир карда мешавад. Чойхонаи «Сирдарё», ки дар гузашта ҳамчун чойхонаи “Обком” маъруф буд, Соли 1979 сохта шуда, пас аз танаффуси тӯлонӣ, 5 сол қабл бо мусоидати мақомоти иҷроияи ҳокимияти давлатии вилоят дубора мавриди истифода қарор гирифт. Ҳамин тавр, чойхона ба тавозуни шаҳри Хуҷанд гузаронида шуд ва пас аз таъмиру азнавсозӣ боз ба макони истироҳатӣ табдил ёфт. Чойхона, ки дар канори дарёи Сир ҷойгир аст, манзараи хеле дилкаш дорад ва метавонад барои сокинон ва меҳмонони Хуҷанди бостонӣ чун макони фараҳбахши фарҳангӣ хизмат намояд. Чойхона метавонад дар як маврид барои то 100 нафар хизматрасониро ба роҳ монад. Ду намуди оши палав, чанд навъи кабоб ва 5 навъи хуроки аввалро 8 нафар пазандагони моҳири чойхона пешниҳоди дустдорони таомҳои миллӣ месозанд.
Раҷаббой Аҳмадзода роҳбарияти чойхонаро уҳдадор намуд, ки корҳои азнавсозиро дар чойхона ба роҳ монда, намои зоҳирии онро бо истифодаи нақшу нигори миллӣ ва рангубори тоза ороиш дода, ҳамзамон дар саҳни он айвонҳои кандакоришударо бунёд намояд. Ободонии бештари саҳну атрофи чойхона, тозаю озода ва дилкаш нигоҳ доштани иншооти ҳудуд ва сабзгардонии муҳити атроф аз вазифаҳои дигаре ҳастанд, ки роҳбарияти чойхона дар ояндаи наздик бояд ба иҷро расонад, то ки ҳар нафари ба инҷо омада бо худ таассуроти хотирмон ҳамроҳ барад.
Бахусус муйсафедон аз ин иқдом изҳори хушнудӣ мекунанд. Зеро чойхона барои онҳо макони асосии фароғату дидорбинии ҳамдигар ба ҳисоб меравад. Бо тавсия ва дастгирии роҳбари вилоят дар чойхонаи мазкур барои муйсафедони собиқадор ва иштирокчиёни ҶБВ чою ширинӣ ройгон пешниҳод гардида, дигар дастгириҳо низ ба роҳ монда мешаванд.
Дар ҳамин мавзеъ иҷрокунандаи вазифаи Раиси вилоят Раҷаббой Аҳмадзода роҳбарияти шаҳр, раёсати ҳифзи муҳити зист ва хоҷагии манзилию рифоҳиро супориши қатъӣ дод, ки соҳили дарёро аз партов ва дигар иншооти бемоҳият тоза карда, ҳолати санитарию экологии онро муътадил нигоҳ доранд.
Хадамоти матбуоти
Раиси вилояти Суғд
