28 Ноябр 2017
Раиси шаҳри Хуҷанд Маъруф Муҳаммадзода чорабиниро ифтитоҳ намуда, аз ҷумла афзуд, ки Давлату Ҳукумат бо мақсади бузургдошти шахсиятҳои мӯътабари таърихӣ, чеҳраҳои барҷастаи сиёсӣ, илму адаб ва фарҳангу маърифат, ки дар давраҳои гуногун дар ташаккули тамаддун ва миллати мо саҳми арзишманд гузоштаанд, хизматҳои эшонро қадр мекунад. Мақомоти иҷроияи ҳокимияти давлатии шаҳри Хуҷанд низ дар баробари шинохти шахсияти бузургмардони миллатамон ва омӯзиши амиқу ҳамаҷонибаи осори онҳо вазифадор аст, ки ин мероси ҷовидониро ба хотири сарчамъиву оромии мардум ва хусусан тарбияи наврасону ҷавонон дар рӯҳияи башардӯстиву инсонпарварӣ, ватанхоҳиву ватандорӣ, илму ҳунаромӯзӣ ва ахлоқи ҳамида истифода намояд.
Раиси шаҳр таъкид намуд, ки дар ин ҷода пардабардорӣ намудан аз лавҳаи ёдбуди шахси накӯном, зани қавииродаву мубориз, ташкилотчии бомаҳорат, фидоиву нексиришт Барака Бобоева дар ҳаёти иҷтимоиву фарҳангии шаҳри Хуҷанд рӯйдоди воқеан хотирмон мебошад. Тибқи дархости пайвандон ва қарори Маҷлиси вакилони халқи шаҳри Хуҷанд, даъвати панҷум аз 28 сентябри соли 2017, таҳти №185 оид ба гузоштани лавҳаи ёдгории Барака Бобоева дар суроғаи кӯчаи Хуҷанди маҳаллаи Хуҷанд, ҳавлии №33, ки Барака Бобоева истиқомат доштанд ба тавсиб расидааст, ба ин муносибат аҳли бошандагони маҳалаи мазкур, хешону пайвандон ва ҳамкасбони ин шахси мӯътабарро самимона табрик мегӯям.
Сипас, дар вазъияти тантанавӣ аз тарафи Раиси шаҳри Хуҷанд Маъруф Муҳаммадзода ва пайвандону шогирдони Барака Бобоева парда аз рӯи лавҳаи ёдгорӣ бардошта шуд.
Доир ба хидматҳои Барака Бобоева, шогирди эшон-соҳибкор Мақсудҷон Зиёбоев, сокини маҳаллаи “Хуҷанд” Абдусабур Ғафуров, хоҳарзодаи Барака Бобоева Муҳаббат Кенҷаева, набераи мавсуф Ғайратҷон Дадобоев сухан гуфтанд.
Таъкид гардид, ки абадигардонии номи неки ин шахси барӯманд барои наслҳои имрӯзу фардои ин кӯчаву маҳалла ва шаҳри азизамон бори дигар дарси меҳнатдӯстиву меҳанпарастӣ ва садоқат ба Ватан мегардад.
Бояд қайд намуд, ки Барака Бобоева 25 августи соли 1917 дар деҳаи Қарақчиқуми ноҳияи Конибодом таваллуд шудааст. Фаъолияти меҳнатиашро аз соли 1934 ҳамчун колхозчи дар колхози «Коммунаи Париж»-и ноҳияи Хуҷанд оғоз намуда, солҳои 1935-1937 мудири кӯдакистон ва котиби идораи колхози мазкур буд. Солҳои 1937-1940 дар техникуми хоҷагии қишлоқи шаҳри Ленинобод таҳсил намудааст. Соли 1940 ба кори ҳизбӣ сафарбар гардида, аввал инструктор, мудири сектори кадрҳои кумитаи ҳизби коммунисти вилояти Ленинобод фаъолият мебарад. Солҳои 1949-1950 дар ҳайси котиби кумитаи ҳизби коммунисти ноҳияи Ленинобод адои вазифа менамояд. Солҳои 1950-1951 муовини раиси ҷамъияти матлуботи вилояти Ленинобод буд. Аз соли 1951 то соли 1980 сарварии фабрикаи либосдӯзии №2 шаҳри Хучандро дар ӯҳда дошт. Дар давраи фаъолияти меҳнатиаш соли 1953 Донишкадаи омӯзгорӣ ва соли 1964 техникуми бофандагии шаҳри Хучандро хатм намудааст. ӯ дар солҳои сарвари фабрика буданаш худро ҳамчун роҳбари кордону ташкилотчии моҳир муаррифӣ намудааст. Солҳои тӯлонӣ ҷомеаи меҳнати пешсафиро аз даст надода, дар ҷамъбасти панҷсолаҳо сазовори Байрақи Сурхи сайёри Ҳукумати Умумииттифоқ ва Ҷумҳурии Тоҷикистон гардидааст. Дар давраи роҳбарии Барака Бобоева якчанд биноҳои истиқоматии баландошёна, кӯдакистонҳо сохта ба истифода дода шудааст. Дар фабрика сол аз сол шароити корию маишии коргарону мутахассисон беҳтар мешуд. Сехҳои нав ва иншоотҳои ёрирасон сохта мешуданд. Барои аҳли меҳнати фабрика дар соҳили «Баҳри Тоҷик» минтақаи истироҳатӣ бо боғи дарахтонаш мевадиҳандаю сояафкан барпо карда шуд. Барака Бобоева чун роҳбари нуқтасанҷ, пешбину ояндаҷӯ ба тайёр кардани кадрҳо аз ҳисоби мутахассисони ҷавон доимо ғамхорӣ зоҳир мекард. Онҳоро модарвор парастиш менамуд, кор, одобу усулби роҳбарӣ меомӯзонд ва ба вазифаҳои масъул пешбарӣ менамуд. Барака Бобоева дониши васеъ, ҷаҳонбинии фароҳ, малакаи зиёди корӣ ва зиндагӣ дошт. ӯ як мақсад дошт, саҳм гирифтан дар ободӣ ва рушди кишвар, беҳбудии зиндагии кормандон.
Барака Бобоева зани соҳибдил ва озодандешаву нексиришт буда, дар роҳи саодати мардум солҳои зиёд заҳмат кашидааст. Саҳифаи рӯзгории ӯ басо рангин буда, бо кору пайкори ибратомӯзи хеш тавонист дар дилу дидаи аҳли оила, ҳамкорон, дӯстону пайвандон нақши муассир гузорад.
Хизматҳои тӯлонӣ ва сидқидилонаи Барака Бобоева бо орденҳои Ленин, Инқилоби Октябр, медалҳо, аз ҷумла бо медали «Барои меҳнати шоён дар Ҷанги Бузурги Ватании солҳои 1941-1945», Ифтихорномаҳои Ҳукуматӣ қадршиносӣ гардида, бо унвони «Корманди хизматнишон- додаи саноати Тоҷикистон» сарфароз гардонида шудааст. Борҳо депутати Шӯрои депутатҳо, аъзои кумитаи ҳизби коммунисти шаҳру вилояти Ленинобод интихоб гардидааст ва барои хизматҳои шоёнаш бо якчанд ифтихорномаю ордену медалҳо сарфароз гардонида шудааст.
Барака Бобоева 10 ноябри соли 1994 вафот карда бошад, ҳам ному кори шоёни Барака Бобоева дар дилу дидиаи мардуми диёр абадӣ маскан гирифтааст ва барои абадӣ гардонидани хотираи ин шахси нексиришт кӯчае дар шаҳри Хуҷанд ба номи Барака Бобоева гузошта шудааст.
Дафтари матбуоти
Раиси шаҳри Хуҷанд
