30 Январ 2017
Дар Донишкадаи иқтисод ва савдои ДДТТ дар шаҳри Хуҷанд бо иштироки ҳайати васеи рӯзноманигорон ва Раёсати муассиса нишасти матбуотӣ баргузор гардид. Дар нишаст зиёда аз 12 нафар рӯзноманигорони васоити ахбори оммаи вилояти Суғд ширкат варзиданд.
«Бояд қайд намуд, ки кулли донишҷӯёни Донишкада аз рӯи шакли таълими шарномавӣ таҳсил менамоянд. Аз ин лиҳоз онҳо баъд аз хатми Донишкада дар асоси шартномаҳои тарафайн ва иштирок дар озмунҳо бо ҷои корӣ таъмин мешаванд. Мавриди зикр аст, ки аввалин гуруҳҳои таҳсил бо забони англисӣ соли таҳсили 2009-2010 таъсис дода шуда буданд. Соли 2014 ин гуна гурӯҳро-18 нафар, соли 2015-40 нафар, соли 2016-48 нафар хатм намуданд ва ҳамаи онҳо дар ташкилотҳои байналхалқии дар ҷумҳурӣ ва давлатҳои хориҷӣ фаъолияткунанда бо ҷои корӣ таъмин гаштанд» -дар ин хусус зимни нишасти матбуотӣ директори донишкада, номзади илми иқтисод, дотсент Рауф Олимӣ иттилоъ дод.
Дастуру супоришҳои Асосгузори сулҳу Ваҳдати миллӣ - Пешвои миллат, Президенти кишвар, муҳтарам Эмомалӣ Раҳмон оид ба масъалаи ташкили таҳсили гурӯҳҳо бо забони англисӣ дар донишкада ҳалли худро пурра ёфтааст. Ҳоло дар донишкада 13 гурӯҳҳое, ки дар онҳо ҳамаи фанҳо (иқтисодӣ, ҳуқуқӣ, риёзӣ, ҷамъиятӣ ва ғайра) бо забони англисӣ таълим дода мешаванд, амал мекунанд. Донишкада бо омӯзгорони ихтисосманд (иқтисоддонҳо, ҳуқуқшиносон, риёзидонҳо ва ҷомеашиносон), ки фанҳои худро бо забони англисӣ дарс мегӯянд, пурра таъмин мебошад. Аз хориҷи дур (ИМА, Аврупо) низ мунтазам олимону профессорон ба донишҷӯён дарс мегӯянд. Дар доираи барномаҳои Эрасмус Мундус ва Темпус алоқаҳои байналмилалии таълимгоҳ беҳтар шуд, 4 нафар устодон ва 6 нафар донишҷӯён дар донишгоҳҳои ИМА ва Аврупо такмили ихтисос ва таҳсил намуда истодаанд.
Тибқи нишондоди оморӣ ва корбарӣ аз тарафи мутахассис оид ба карйераи Донишкада нишон медиҳад, ки аз 634 нафар хатмкардагони шӯъбаи рӯзона 512 нафарашон, яъне 80,7% аз рӯи ихтисос, соҳиби кор ва ё аз рӯи патент дар соҳаҳои гуногун фаъолият карда истодаанд. Чунончи, аз ҷумлаи 312 нафар хатмкардагони соли 2015-и шӯъбаи рӯзона, 261 нафарашон бо ҷои корӣ таъмин гаштанд, ки 83,65%-и хатмкардагонро ташкил медиҳад.
Хатмкунандагони шӯъбаи ғоибона бошад, аксар худ бо ҷои корӣ таъмин мебошанд ва танҳо барои баландбардории тахассус ва малакаи касбӣ дар Донишкада таҳсил менамоянд. Аз ин лиҳоз гуфтан мумкин аст, кионҳо қариб пурра бо ҷои кор таъмин мебошанд.
Заминаи моддию техникии Донишкада ҷавобгӯи талаботи стандарти давлатии таҳсилоти олии касбӣ мебошад. Ҷараёни таълим дар се бинои таълимӣ, ки аз 80 синфхонаҳои алоҳида иборатанд ташкил карда шудааст. Пояи моддӣ-техникии донишкада ҷавобгӯи талаботи муосир мебошад. Дар донишкада зиёда аз 550 компютерҳои фардӣ, 20 доскаҳои электронӣ, 60 проекторҳо, 60 камераҳои назоратӣ ва ғайра корбаст карда шудаанд. Китобхонаи электронӣ ва муқаррарӣ, синфхонаи интернет, 4 синфхонаи лингафонӣ, 6 синфхонаҳои компютерӣ, толори фитнес бо 18 тренажерҳо, майдончаи варзишии волейбол, минифутбол, баскетбол ҳамеша ба донишҷӯён хизмат мерасонанд. Ҳамаи синфхонаҳо, толори варзиш ва бинои Донишкада бо гармӣ ба тариқи мутамарказ бо воситаи ангишт таъмин карда шудаанд.
Сипас рӯзноманигорон Мелибоев О. аз рӯзномаи “Замон” оид ба шомилшавии ҷавонон ба ҳизбу ҳаракатҳои ифротӣ ва интиқоли донишҷӯён аз донишгоҳҳои хориҷи кишвар, Қамари Аҳрор аз радиои байналмилалӣ оиди бо кор таъминшавии хатмкунандагон, Абдусабури Абдуваҳҳоб, аз рӯзномаи “Шафақ” оид ба фаъолият ва пешрафти пояи моддию техникии таълимгоҳ, Мардонов М. аз рӯзномаи “Маорифи Суғд” оид ба норасоии кадрҳои педагогӣ дар муассиса, Рустамова М. аз рӯзномаи “Тирози ҷаҳон” перомуни робитаҳои байналмилалӣ ва ташкили таҳсилоти фосилавӣ дар донишкада, Моҳира Раҳимзода аз рӯзномаи “Сухани халқ” оид ба ташкили раванди таълим ва муаррифии директори таълимгоҳ ва Самад Юсуфӣ аксбардор аз АМИТ “Ховар” перомуни риояи меъёри забони давлатӣ дар донишкада суолҳо пешниҳод карда, ҷавобҳои мушаххас гирифтанд.
