Машварат: Омӯзгор пайваста бо донишҳои наву тозаи илмию методии соҳааш мусаллаҳ бошад

Дилбар Абдуллоева, мудири кабинетҳои фаннии шуъбаи маорифи шаҳри Хуҷанд машваратро оғоз намуда, аз ҷумла таъкид дошт, ки тадбирҳои амалие, ки аз ҷониби Ҳукумат ва Давлат дар самти фароҳам овардани шароити лозима ва таҳкими инфрасохтори соҳа андешида мешавад, аҳли маорифро муваззаф мегардонад, ки барои баланд бардоштани сатҳу сифати таҳсил ва донишазхудкунии хонандагон саъйю талош намуда, корҳои судбахшу муассирро анҷом диҳанд, ки муҳассилин дар олимпиадаҳои ҷумҳуриявию хориҷӣ мақомҳои ифтихориро ба даст оранд. Омўзгорон дар раванди таълиму тарбия ба сатҳи дониш ва малакаҳо, рушди ақлонӣ, маънавӣ ва ҷисмонии хонандагон махсус зоҳир намоянд, то ин, ки ҳадафҳои нақшавӣ ба даст оварда шавад. Талаботи ҷомеаи имрӯза ҳар як омӯзгорро ҳушдор месозад, ки пайваста бо донишҳои наву тозаи илмию методии соҳааш мусаллаҳ бошад, ташаббускору ҷӯянда ва эҷодкориро пешаи худ қарор диҳад.

Зикр гардид, ки сифати таҳсилот категорияи педагогӣ – иҷтимоиест, ки ҳолат ва самарабахшии ҷараёни таълиму тарбия ва мутобиқати онро ба стандарту барномаҳои таҳсилот ва талаботу ниёзмандиҳои ҷомеа дар самти ташаккул ва рушди салоҳиятмандиҳои шаҳрвандӣ, иҷтимоӣ ва касбии шахсият муайян менамояд. Ба омилҳо ва нишондиҳандаҳои муайянкунандаи сифати таҳсилот мазмуни таҳсилот, китобҳои дарсӣ, маводи иловагии таълим ва сатҳи таъминот бо онҳо, шаклу методҳои таълим, аз ҷумла, методҳои навоварона ва иттилоотӣ, заминаҳои моддӣ-техникӣ, ҳайати кадрӣ, хонандагон, инфрасохтори муассисаи таълимӣ ва ташкили ҷараёни таълим дохил мешавад.

Сипас, дар синфхонаҳои алоҳида дарсҳои кушод аз ҷониби омӯзгорони гимназияи “Ганҷ”, аз ҷумла Аълочии маориф ва имли Ҷумҳурии Тоҷикистон Фирӯза Файзуллоева, Дилбар Полвонова, Зебо Низомиддинова, Мунаварра Тоҳирова, Шаҳноза Қаҳҳорова, МАҳфуза Қодирова, Олга Тоҷибоева, Навраса Субҳонова ва дигарон бо ҳузури муовини сарварони муассисаҳои таълимии шаҳр дар сатҳи баланд ташкил ва гузаронида шуда, он мавриди таҳлил ва баррасӣ қарор дода шуданд.