23 Феврал 2024
Таҳти чунин унвон дар Коллеҷи тиббии шаҳри Хуҷанд бахшида ба 31-умин солгарди таъсисёбии Қувваҳои мусаллаҳи мамлакат бо иштироки устодону донишҷӯён ҳамоиши идона баргузор гардид.
Нахуст директори муассисаи таълимӣ Алимат Мавлонзода ҳамагонро бо Иди Артиши миллӣ табрику таҳният гуфта, аз ҷумла афзуд, ки Қувваҳои Мусаллаҳи кишвар марҳилаи сахту сангини давраро паси сар намуда, имрӯз ба сифати ниҳоди муқтадир ва сипари миллат хизмат менамояд. Давоми 31 соли рушду нумӯи Артиши миллӣ маҳз бо дастгирии Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон дар гарнизонҳои Суғду Хатлон, Хоруғ, Душанбе ва шаҳру ноҳияҳои тобеи марказ садҳо биноҳои маъмурию ситоди қисмҳои ҳарбӣ, хобгоҳҳои аскарону афсарон, синфхонаҳои таълимӣ, комиссариатҳои ҳарбӣ, иншооти ёрирасони коммуналӣ, истгоҳҳои доимӣ барои нигоҳдории техникаи ҳарбиву автомобилӣ ва дигар иншооти зарурии низомӣ дар муддати кӯтоҳ, бо сифати баланду хароҷоти камтарин ва бо меъёри ҳарбиву талаботи ҳозиразамони низомӣ мавриди истифода қарор дода шуданд. Танҳо давоми се соли охир қариб 500 бинову иншооти дорои аҳамияти ҳарбӣ бунёду навсозӣ ва мавриди баҳрабардорӣ қарор гирифт. Ҳамзамон дар ҳудуди гарнизонҳои Суғду Хатлон машқгоҳҳои низомӣ ва марказҳои таълимӣ, дар Вилояти Мухтори Кӯҳистони Бадахшон машқгоҳҳои ҳарбӣ барои машқу размоишҳои васеи низомии қисму воҳидҳои навъи қӯшунҳо, дар ҳудуди ноҳияҳои Лахш, Рашт ва минтақаи Ромити шаҳри Ваҳдат машқгоҳҳои муосири ҳарбӣ бо ташкили заминаҳои хуби моддӣ-техникӣ бунёд ва мавриди баҳрабардорӣ қарор гирифтанд. Ташкили машқгоҳу марказҳои таълимӣ ва фароҳам овардани тамоми шароити ҳозиразамони ҳарбӣ дар онҳо имконият медиҳад, ки на танҳо ҷузъу томи тобеи Вазорати мудофиа, балки дигар сохторҳои қудратии мамлакат ва мақомоти ҳифзи ҳуқуқи ҷумҳурӣ низ аз он самаранок истифода баранд. Дар баробари дигар чорабиниҳои нақшавӣ санҷиши техникаҳои вазнини зиреҳпӯши ҷангӣ ва дигар силоҳу муҳиммоти ҳарбиро мавриди омӯзиш қарор диҳанд.
Алимат Мавлонзода дар анҷоми суханронии худ таъкид дошт, ки ҳифзи Ватан яке аз вазифаҳои муқаддаси ҳар як инсон ва тоҷику тоҷикистонӣ мебошад. Аҷдодони мо ин ҳувияти миллиро ҳамеша дар худ тарғибу таблиғ менамуданд ва барои озодӣ ва ҳифзи соҳибистиқлолии давлати хеш ҷони худро дареғ надоштанд. Нишонаи ҷавонмардию ҳимоятгарӣ аз ниёгон ба мо мерос буда, муқаддас будани Ватанро аҷдодони мо аз хурдсолӣ ба мо омӯзонидаанд, ки он ифтихори миллати мост.
Сипас, Раиси Кумиҷроияи ҲХДТ дар шаҳри Хуҷанд Мунзифа Пӯлотова баромад карда, аз ҷумла зикр дошт, ки Артиши миллии худро дар шароити хеле мараккаб ва ҳассос таъсис дода, оромию осудагӣ ва амнияти кишварро фароҳам овард. Дар солҳои аввали таъсисёбӣ, ки пояи устувор ва заминаи мусоид барои тақвиятбахшии Қувваҳои Мусаллаҳ мавҷуд набуд, бо талош ва заҳматҳои шабонарӯзиии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон аввалин қадамҳо барои омодакунии мутахассисони соҳа гузошта шуд. Дар солҳои минбаъда вазъи қисмҳои низомӣ, ҳолати будубошии ҷангӣ ба эътидол оварда шуда, яроқу дигар муҳимоти ҷангӣ зина ба зина харидорӣ карда шуданд. Тавре роҳбари давлат дар яке аз суханрониҳои хеш зикр дошта буданд: “Мо Қувваҳои Мусаллаҳи Тоҷикистонро дар шароити ниҳоят вазнину ҳассоси иқтисодӣ ва ҳарбиву сиёсии мамлакат, яъне дар рӯзҳое, ки кишварро ҷангу хунрезӣ, беқонуниву беҳокимиятӣ ва буҳрони шадиди иқтисодӣ фаро гирифта буд ва ҳамаи сохтору мақомоти давлатӣ фалаҷ гардида, хатари аз байн рафтани давлати ҷавони Тоҷикистон ва пароканда гардидани миллати тоҷик воқеан ба миён омада буд, таъсис додем. Ҳукумати мамлакат аз рӯзҳои нахустини таъсиси Қувваҳои Мусаллаҳ бо вуҷуди имконияти ниҳоят маҳдуди иқтисодиву молиявӣ барои бунёди инфрасохтори низомӣ, таъсиси ҷузъу томҳои махсусгардонидашуда, таъмин кардани онҳо бо техникаву таҷҳизоти замонавӣ ва фароҳам овардани шароити зарурӣ барои хизмат ва зиндагӣ тамоми тадбирҳоро амалӣ намуд ва ин равандро имрӯз низ идома дода истодааст”.
Дар ҳамоиш мудири кафедраи ҷамъиятшиносӣ Нигора Ачилова ва донишҷӯи бахши сеюми ихтисоси кори дандонсозӣ Асратулло Тошзода, ки чанде қабл сарбаландона хизмати Модар-Ватанро адо намудааст, баромад намуда, ҷавононро ба дӯст доштани Ватану ҳифзу ҳимояи марзу буми кишвар ва расидан ба қадри оромию суботи мамлакат даъват намуданд.
Донишҷӯён бо саҳнаҳои тарбиявӣ ва суруду шеърҳои тараннумгари ватандӯстиву меҳанпарастӣ ва далериву шуҷоат табъи ҳозиринро болида намуданд. Барномаи аҳли фарҳанги муассисаи таълимӣ ба чорабинӣ ҳусни дигар зам намуд.
Дар анҷоми ҳамоиш аз ҷониби роҳбарияти муассиса дар вазъияти тантанавӣ ба устодону донишҷӯёни муассиса барои тарбияи ҷавонон дар рӯҳияи ватанпарастиву хештаншиносӣ ва далериву шуҷоат сипоснома ва тӯҳфаҳои хотиравӣ тақдим намуданд.