10 Май 2021

Дар толори Кохи “Суғдиён”-и шаҳри Хуҷанд Фестивал-озмуни шаҳрии «Атласу адраси Хуҷанд - 2021» баргузор гардида, ғолибонаш муайян шуданд.

Фествал-озмун аз рӯйи шартҳои: “Беҳтарин либоси кӯдакона”, “Беҳтарин либоси расмӣ” ва “Беҳтарин либоси идона” “Беҳтарин либоси миллии арӯсию домодӣ” бо маҳсули эҷоди 20 тарроҳ ва зиёда аз 200 муаррифкунанда сурат гирифта, ғолибон муайян гардиданд.

200 нафар муаррифкунандаи либосҳои атласу адрас дар номинаҳои гуногун баромад намуда, маҳсули дўхти тарроҳонашонро муаррифӣ карданд.

Аҳли санъати шаҳри бостонии Хуҷанд бо барномаи рангини худ табъи ҳозиринро болида намуд.

Дар чорабинӣ муовин Раиси шаҳри Хуҷанд Фирўза Нуруллозода иштирок ва баромад намуда, аз ҷумла зикр дошт, ки бо мақсади тарғибу ташвиқи либоси миллӣ, тарбияи зебоипарастӣ, баланд бардоштани мақоми либоси миллӣ, тақвияту густариш бахшидан ба истеҳсолу истифодаи анвои гуногуни либосу матоъҳои миллӣ, рушди атласу адрасбофӣ баҳри иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Раиси вилояти Суғд, муовини аввали раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода оид ба гузаронидани Фестивали атласу адрас, имрўз дар ин толори зебою барҳаво ва фарҳангии Кохи “Суғдиён”-и шаҳри Хуҷанд Фестивал-озмуни «Атласу адраси Хуҷанд - 2021» ҳамчун намунаи барҷастаи таҷассуми фарҳанги миллӣ бо ҳадафи эҳёи арзишҳои тамаддуни таърихии тоҷикон ва гиромидошти саноати миллӣ баргузор гардида истодааст.

Фирўза Нуруллозода таъкид дошт, ки ин таваҷҷўҳ пеш аз ҳама дар заминаи татбиқи сиёсати фарҳангпарваронаи Асосгузори сулҳу ваҳдати миллӣ - Пешвои миллат, Президенти кишвар, муҳтарам Эмомалӣ Раҳмон сурат гирифта, имкон фароҳам меорад, ки мо ба либосҳои миллӣ ҳамчун рамзи фарҳанги миллӣ дар тўли таърихи зиёда аз ҳазорсолаи давлатдорӣ муроҷиат намуда, ҳамзамон дар айёми бархурдҳои бузурги тамаддунҳои ҷомеаи муосир симои ҳақиқии як рукни муҳими миллиро ҷилвагар созем. Мардуми тоҷик дар бофту дўхти навъҳои либос ва таҳияи маводи он тавассути атласи миллӣ, адрасу шоҳӣ эътироф шудаву ҳосили он серхаридортарин шинохта шудааст. Истеҳсоли атлас, ки дар таърихи тоҷикон ҳамеша нуфузи зиёд дошт, имрўз ҳам шўҳрату мақомашро аз даст надодааст.

Зикр гардид, ки баргузор шудани чунин чорабинӣ дар шаҳри Хуҷанд як навъ арҷгузорӣ ба фарҳанги миллӣ арзёбӣ мегардад. Дар идомаи ин тадбирҳои муҳим мо бояд пайваста талош бар он намоем, ки коргоҳҳои истеҳсол ва дўхти либосҳои миллӣ, аз ҷумла атлас бо усулҳои муосир дар шаклу намудҳои мухталиф ба роҳ монда шавад ва ба туфайли он фарҳанги миллиамон муаррифӣ мегардад. Ҳоло таваҷҷўҳ ба ташкили курсҳои дўзандагӣ афзун гардида истодааст ва айни замон беш аз ҳазор нафар бонувону духтарон аз дарсҳои омўзишии курсҳои таълимии касбӣ бархурдор гардидаанд.

Сипас, аз рӯйи шартҳои: “Беҳтарин либоси кӯдакона”, “Беҳтарин либоси миллии арӯсиву домодӣ”, “Беҳтарин либоси расмӣ” ва “Беҳтарин либоси идона” бо маҳсули эҷоди 20 тарроҳ ва зиёда аз 200 муаррификунанда сурат гирифта, ғолибон муайян гардиданд.

Ҳамин тавр, дар номинаи “Беҳтарин либоси кӯдакона” Нўшофарин Юсупова мақоми аввал (тарроҳ Матлуба Ниёзова), Биҳабиба Самадова ҷойи дуюм ва Мадина Анварова зинаи сеюмро ба даст оварданд. Дар номинаи “Беҳтарин либоси миллии арӯсиву домодӣ” маҳсули эҷоди Дилфуза Мукимова, Мусаввара Саидвализода ва Нигора Болтубоева мақомҳои ифтихориро соҳиб шуданд.

Аз рўйи номинаи “Беҳтарин либоси расмӣ” ғолибият мутаносибан насиби тарроҳон: Маҳина Бобоева, Малика Уралова ва Шоҳина Ғафурова гардид.

Дар номинаи “Беҳтарин либоси идона” Мадинаи Анварова, Қурбоной Сатторова ва Масъуда Ғаниева ғолибият ба даст оварданд.

Шоҳҷоизаи озмун насиби маҳсули эҷоди ҳунарманд Матлуба Ниёзова, ки муаррификунандаи либоси иштирокчии №2 буд, гардид.

Ба ғолибон аз номи Раиси шаҳри Хуҷанд Фирдавс Шарифзода диплом, маблағҳои пулӣ ва туҳфаҳои хотиравӣ тақдим карда шуд.

Дафтари матбуоти
Раиси шаҳри Хуҷанд