Фирдавс Шарифзода барандагони медали тиллоро ба ҳузур пазируфт

Раиси шаҳри Хуҷанд Фирдавс Шарифзода ин дастоварди мактабиёнро натиҷаи назарраси заҳмати шабонарўзии омўзгорон, волидайн ва худи хонандагон арзёбӣ намуда, аз ҷумла таъкид дошт, ки парвариш ва ташаккули шахсиятҳои босаводу соҳибмаърифат вазифаи асосӣ ва муҳимтарини мактабу маориф ба шумор меравад. Бо иқдомоти пайвастаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди пайвастаи мактабу маориф таваҷҷуҳи рӯзмарра зоҳир карда мешавад ва маориф яке аз самтҳои афзалиятноки сиёсати Давлат муайян шудааст. Дар шаҳри Хуҷанд ҷиҳати босифат амалӣ гардидани сиёсати маорифпарваронаи Ҳукумати Ҷумҳурии Тоҷикистон давра ба давра тадбирҳои муҳим андешида шуда, тадбирҳои зарурӣ татбиқ гардида истодаанд. То ба имрўз заминаҳои муосири моддиву техникии муассисаҳои таълимӣ бахусус кабинетҳои фаннӣ таъмин гардида, танҳо аз хонандагону омўзгорон дастоварду комёбиҳоро интизорем.

Шаҳрдор зимни суҳбати озоду ошкоро бо ғолибони озмун, аз ҷумла Робияхон Рустамова, хатмкардаи МТМУ «Гулчини маърифат», Мухлисахон Комилҷонова, Одил Собиров, хатмкардагони литсейи Донишкадаи политехникӣ, Фаридун Муҳиддинзода дастпарвари Муасисаи таълимии давлатии Мактаб барои хонандагони болаёқати шаҳри Хуҷанд, ки баъди супоридани имтиҳоноти ҷиддӣ ва шаффоф медали тиллоро ба даст оварданд ва Зафарҷон Раупов, хонандаи МТМУ №18 ки дар ду олимпиадаи бонуфузи байналмилалӣ мақоми баландро соҳиб шуд, аз идомаи таҳсили эшон дар донишгоҳҳои олӣ ва нақшаву орзуҳояшон пурсон шуда, барои ба воя расидан ва аз худ намудани касбҳои интихобкардааш ҳидоятҳо намуд. Қобили қайд аст, ки аз миёни онҳо аллакай 4 нафар ба донишгоҳҳои бонуфузи дохили мамлакат ва як нафар ба яке аз Донишгоҳи Ҷумҳурии мардумии Чин дохил шудаанд.

Хонандагон барои таваҷҷуҳи доимӣ ва дастгирӣ ба Пешвои муаззами миллат муҳтарам Эмомалӣ Раҳмон изҳори сипосгузорӣ намуданд.