22 Июн 2026
Раиси вилояти Суғд Раҷаб Аҳмадзода дар шаҳри Хуҷанд бо ҷараёни корҳои азнавсозӣ дар Беморхонаи ҷумҳуриявии физиотерапевтии ба номи А. Нурматови шаҳри Хуҷанд шинос шуд.
Зимни боздид иттилоъ дода шуд, ки иншооти мазкур дар доираи барномаҳои давлатии рушди соҳаи тандурустӣ ва таҳкими заминаи моддию техникии муассисаҳои тиббӣ навсозӣ карда мешавад. Корҳои сохтмонӣ дар масоҳати қариб 1,5 гектар ҷараён дошта, фарогири ҳудуди муассиса мебошад.
Дар доираи лоиҳа даромадгоҳи асосӣ ва намои биноҳо бо тарҳи муосир навсозӣ гардида, роҳраву нишастгоҳҳои нав сохта хоҳад шуд. Бинои асосии чорошёна, ки рӯбарӯи даромадгоҳ аст, пурра таъмиру навсозӣ шуда, фазои хуби истироҳату табобат муҳайё мегардад. Беморхона, ки дар шафати дарёи Сир қарор дорад, дорои имконоти хуб барои истироҳат ва табобат аст.
Таъкид гардид, ки муассисаҳои физиотерапевтӣ ҳамчун бахши муҳими тибби барқарорсозӣ дар баланд бардоштани сатҳи хизматрасонии тиббӣ ва беҳтар намудани саломатии аҳолӣ нақши муассир доранд. Татбиқи чунин лоиҳаҳо имкониятҳои ташхис, табобат ва реабилитатсияро васеъ намуда, ба ҷорӣ намудани усулҳои муосири табобатӣ шароити мусоид фароҳам меорад.
Зикр шуд, ки баъди анҷоми корҳои таҷдид муассиса бо шароити нав ва имкониятҳои васеъ ба аҳолӣ хизмат расонида, дар рушди соҳаи тибби барқарорсозӣ дар вилоят саҳми назаррас хоҳад гузошт.
Дафтари матбуоти
Раиси шаҳри Хуҷанд
