ИҚДОМИ МУҲИМ: Муоина ва корҳои профилактикии бемориҳои дандон дар тамоми шаҳру ноҳияҳои вилояти Суғд
19 Июн 2026
Бо ташаббуси табибони Дармонгоҳи стоматологии бачагонаи шаҳри Хуҷанд, дар тамоми шаҳру ноҳияҳои вилояти Суғд як силсила чорабиниҳои муҳими тиббӣ таҳти унвони рӯзҳои саломатии дандон баргузор гардиданд.
Дар доираи ин иқдом, табибони соҳибтаҷриба ба муассисаҳои таълимӣ сафарбар гардида, ҳолати дандону ковокии даҳони кӯдаконро мавриди муоина қарор доданд. Ҳамзамон, корҳои профилактикӣ барои пешгирии бемориҳои дандон ба роҳ монда шуда, мушкилоти мавҷуда сари вақт ошкор ва тавсияҳои зарурӣ пешниҳод гардиданд.
Қисмати муҳими чорабинӣ гузаронидани дарсҳои гигиенаи ковокии даҳон буд, ки дар он ба хонандагон тарзи дурусти нигоҳубини дандон, қоидаҳои шустани он, инчунин аҳамияти ғизои солим фаҳмонида шуд. Омӯзгорону мураббиён низ бо тавсияҳои муфид таъмин гардиданд.
Ин иқдоми судманд боиси баланд гардидани маърифати тиббии кӯдакон шуда, онҳо бо шавқу рағбати бештар ба риояи қоидаҳои гигиенӣ оғоз намуданд. Ҳамзамон, дар зеҳни онҳо аҳамияти нигоҳубини саломатии даҳон аз синни хурдӣ шакл гирифт.
Табибон таъкид карданд, ки ҳадафи асосии чунин чорабиниҳо — ҳифзи саломатии насли наврас ва ташаккули фарҳанги дурусти дандонпарварӣ дар ҷомеа мебошад.
Дафтари матбуоти
Раиси шаҳри Хуҷанд
