05 Май 2026
Недоступен ни однин перевод.
Дар толори Мақомоти иҷроияи ҳокимияти давлатии шаҳри Хуҷанд таҳти раёсати Раиси шаҳр Фирдавс Шарифзода бо иштироки муовини якуми Раиси шаҳр, муовинони Раиси шаҳр, роҳбари дастгоҳи Раиси шаҳр, мудирони шуъбаву воҳидҳои сохторӣ, раисони маҳаллаҳо ва идораҳои зертобеъи шаҳр ҷаласаи васеъи корӣ баргузор гардид.
Дар оғози ҷаласа аз ҷониби Раиси шаҳри Хуҷанд масоили марбут ба вазъи иҷрои дастуру супоришҳои дар ҷаласаи қаблӣ ироашуда мавриди баррасӣ қарор дода шуд. Таъкид гардид, ки «Ҳар як роҳбар ва масъули мақомот зимни иҷрои вазифаи хидматӣ пеш аз ҳама муносибат ба мардумро самимона ба роҳ монад. Мо бояд дар самти ободониву созандагӣ дар ҳамдастӣ бо мардум ҳамрайъиро роҳандозӣ намоем. Имрӯз худи мардум омода аст, ки бахшида ба 35 солагии Истиқлолияти давлатии Ҷумҳурии Тоҷикистон корҳои ободониро ба анҷом расонад. Мо бояд дар ин самт мусоидати фаъол намоем- гуфт Роҳбари шаҳр.
Сипас, аз тарафи Раиси шаҳри Хуҷанд Фирдавс Шарифзода масоили марбут ба раванди бунёди иншооти ҷашнӣ, омодагӣ ба ҷашни умумимиллии 35 солагии Истиқлоли давлатӣ, беҳбудбахшии сифати таълиму тарбия дар макотиби шаҳр, хизматрасонии тандурустӣ, риояи реҷаи кори партовкашонӣ, танзими ҳаракати автобусҳо, фаъолияти бомароми корхонаҳои саноатӣ, ҷамъоварии маблағи андоз, вазъи иҷрои нақшаи буҷа, риояи маданияти шаҳрдорӣ, мубориза алайҳи бегонапарастӣ, тоза намудани соҳили дарёи Сир аз алафҳои бегона, ташкили корхонаҳои нави истеҳсолӣ, пешгирии ғайримақсаднок истифодабарии замин ва ғайраҳо мавриди баррасӣ қарор дода шуда, аз масъулин ҷиҳати вазъи иҷрои он пурсиш ба амал оварда, нисбати бартараф намудани камбудиҳо дастуру супоришҳо дода шуд.
Фирдавс Шарифзода дар анҷоми ҷаласаи корӣ изҳори боварӣ намуд, ки кулли сокинони шаҳри бостонии Хуҷанд бо рўҳияи созанда ҷиҳати татбиқи муҳтавои Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва дастуру супоришҳои Раиси вилояти Суғд Раҷаб Аҳмадзода корҳои ободониву созандагиро бо заҳмати софдилона ҷоннок намуда, баҳри пурмаҳсулии соли эълонгардидаи “«Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ” ва сазовор истиқбол гирифтани ҷашни 35-солагии Истиқлолияти давлатии Ҷумҳурии Тоҷикистон саҳми арзишманд мегузоранд.
Дафтари матбуоти
Раиси шаҳри Хуҷанд
