24 Апрель 2026
Недоступен ни однин перевод.
Дар гимназияи “Ганҷ”-и шаҳри Хуҷанд арзёбии байналмилалии PIRLS оид ба омӯзиши сатҳи саводи хониши хонандагони синфи чорум баргузор шуд.
Аз ҷараёни баргузории он Мадина Салимзода, мудири шуъбаи маорифи шаҳри Хуҷанд ошноӣ пайдо намуд.
Таъкид шуд, ки ҳадафи асосии PIRLS муайян намудани қобилияти хонандагон дар фаҳмидани матн, таҳлил ва истифодаи маълумоти хондашуда мебошад. Дар доираи он, хонандагон бо матнҳои гуногун шинос шуда, ба саволҳое ҷавоб медиҳанд, ки сатҳи дарки онҳо ва тафаккури мантиқияшонро нишон медиҳад.
Аҳамияти иштирок дар ин барнома барои кишварҳо, аз ҷумла Тоҷикистон, хеле бузург аст. Зеро натиҷаҳои он имкон медиҳанд, ки сатҳи таҳсилот бо меъёрҳои байналмилалӣ муқоиса шуда, роҳҳои такмил ва рушди соҳаи маориф муайян карда шаванд. Инчунин, таҳлилҳо ба омӯзгорон ва мутахассисон кӯмак мерасонанд, то усулҳои таълимро беҳтар гардонанд.
Дар 15 шаҳру ноҳияҳои вилояти Сугд 36 муассисаи таълимӣ, аз ҷумла ду муассисаи таълимии шаҳри Хуҷанд: гимназияи №1-и ба номи Раҳим Ҷалил ва гимназияи хусусии “Ганҷ” интихоб гардида онҳо дар тадқиқот иштирок намуданд.
Арзёбии байналмилалии PIRLS ба омӯзиши сатҳи саводи хониши хонандагони синфи чорум равона гардида, дар ҳар панҷ сол дар кишварҳои гуногуни ҷаҳон баргузор мешавад.
Хулоса, PIRLS на танҳо як санҷиш, балки воситаи муҳим барои баланд бардоштани сифати таҳсилот ва рушди маънавии насли наврас ба ҳисоб меравад.
Дафтари матбуоти
Раиси шаҳри Хуҷанд
