20 Апрел 2026
Дар толори Мақомоти иҷроияи ҳокимияти давлатии шаҳри Хуҷанд бо иштироки фаъолони шаҳр мулоқоти Ваколатдор оид ба ҳуқуқи инсон дар Ҷумҳурии Тоҷикистон Умед Бобозода баргузор шуд.
Вохӯриро муовини Раиси шаҳри Хуҷанд Ҷамшед Набизода ифтитоҳ бахшида, ҳадафи онро омӯзиши ҳамаҷонибаи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» унвон намуд.
Сипас, Ваколатдор оид ба ҳуқуқи инсон дар Ҷумҳурии Тоҷикистон Умед Бобозода доир ба муҳтавои Паёми Президенти Ҷумҳурии Тоҷикистон ба Маҷлиси Олӣ сухан гуфт. Иброз гардид, ки «ин ҳуҷҷати муҳим идомаи мантиқии паёмҳои солҳои пешин буда, роҳи рушду пешрафти Тоҷикистонро дар ояндаи наздик муайян мекунад. Он ҳамчун ҳуҷҷати фарогири таҳлилу баррасии амиқи тамоми соҳаҳо ва дурнамои рушди устувори мамлакат ҳама самтҳои рушди босуботи соҳаҳои иқтисоди миллӣ, истифодаи самараноки иқтидори мавҷуда, ҳалли масъалаҳои вобаста ба тағйирёбии иқлим, соҳаҳои обу энергетика, ташкили корхонаҳои истеҳсолӣ, таъсиси ҷойи нави кор, баланд бардоштани рақобатнокии маҳсулоти ватанӣ, тақвияти содирот, суръат бахшидан ба раванди рақамикунонии бахшҳои иқтисодиёт, инкишофи неруи инсонӣ, беҳтар намудани сифати хизматрасонии иҷтимоӣ, саноатикунонии мамлакат, баланд бардоштани қобилияти рақобати истеҳсолоти ватанӣ, гиромидошти таъриху фарҳанги аҷдодӣ, ҳифзи ёдгориҳои таърихию фарҳангӣ ва дигар мавзуъҳои муҳимро дар бар мегирад».
Таъкид шуд, ки Конститутсияи Ҷумҳурии Тоҷикистон дар ташаккули фарҳанги ҳуқукҳои инсон ва баланд бардоштани маърифати ҳуқуқии ҷомеаи шаҳрвандӣ ва дар ин замина дар барқарор намудани сохтори конститутсионии давлат нақши бориз гузоштааст. Албатта дар таҳкимёбии меъёрҳои ин санади олии ҳуқуқӣ бошад нақши Эъломияи Куруши Кабир, ки бевосита адолат ва тартиботи ҳуқуқӣ ва ҳамзамон, қонуни ҳуқуқию қонуниятро дар меҳвари меъёрҳояш қарор додааст нақши ҳалкунанда дорад. Эъломияи Куруши Кабир, ки аз фарҳанги ориёӣ ва ақоиди инсондӯстию меҳанпарастӣ маншаъ мегирад, нахустин ҳуҷҷати таърихӣ-ҳуқуқиест, ки дар он эҳтиром гузоштан ба ҳуқуқ ва қонун ва ҳамзамон ҳуқуқу озодиҳон инсон дарҷ гардидааст. Дар даврони ҳукумронии Куруши Кабир ва замони мавҷудияти давлати Ҳахоманишиён низоми муайяни қонунгузорӣ ва ҳуқуқӣ ба вуҷуд омада буд. Яке аз муҳимтарин дастовардҳои давлатдории он замон ин қабули Эъломияи Куруши Кабир ба ҳисоб мерафт, зеро ин санади ҳуқуқӣ нахустин санади ҳуқуқие буд, ки дар он вазъи ҳуқуқу озодиҳон инсон, эҳтироми ҳамдигарӣ, адолат, қонуният, тартиботи муайяни ҳуқуқӣ ва рафтори ҳуқуқӣ, озодии эътиқод ва дин, ҳифзи ҳуқуқҳои ақалиятҳои миллӣ дар як низоми муайян гарор гирифта буд.
Дар мулоқот Саидалӣ Бобохонзода, роҳбари дастгоҳи Ваколатдор оид ба ҳуқуқи инсон дар Ҷумҳурии Тоҷикистон низ баромад карда, аз ҷумла таъкид дошт, ки бо иқдоми Пешвои Миллат, давлати Тоҷикистон ба ҷомеаи ҷаҳон эълон намуд, ки ҷонибдори роҳи қонунии инкишофи минбаъдаи ҷомеа, дар заминаи арзишҳои волои ҳуқуқӣ, ба роҳ мондани муносибатҳои тарафайн бо ҳамаи кишварҳои ҷаҳон дар асоси принсипҳои пазируфташудаи ҳуқуқи байналмилалӣ мебошад. Самтҳои нави сиёсати дохилӣ ва хориҷии давлати соҳибистиқлоли Тоҷикистон собит намуд, ки мутобиқ ба талабот ва принсипҳои ҳуқуқи байналмилалӣ халқи Тоҷикистон ҷонибдори сулҳ, эъмори давлати ҳуқуқбунёди демократӣ ва давлате мебошад, ки дар он инсон ва ҳуқуқу озодиҳои ӯ ҷойгоҳи махсус доранд.
Мулоқот бо мубодилаи афкор анҷом пазируфт.
Дафтари матбуоти
Раиси шаҳри Хуҷанд
