15 Апрел 2026
Дар шаҳри Хуҷанд бо иштироки Раиси вилояти Суғд Раҷаб Аҳмадзода ва Раиси шаҳри Хуҷанд Фирдавс Шарифзода ба сохтмони боз як бинои нави таълимӣ дар назди гимназияи № 4 санги асос гузошта шуд.
Раиси вилоят зимни суханронӣ таъкид намуд, ки бунёди муассисаҳои таълимӣ дар асоси дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ шуда, татбиқи чунин ташаббусҳо имкон медиҳад хонандагон дар шароити муосир ба таълиму тарбия фаро гирифта шаванд.
Қайд гардид, ки қаблан низ бо иқдоми соҳибкорони ватандӯст дар назди гимназияи мазкур бинои замонавии таълимӣ бунёд гардида буд. Бо дарназардошти зиёд будани шумораи хонандагон, зарурати сохтмони бинои иловагӣ ба миён омад.
Тибқи иттилои масъулон, иншооти нави соҳаи маориф барои 1000 нафар хонанда дар як баст пешбинӣ шуда, бо саҳми соҳибкорон сохта мешавад. Дар бино тамоми шароити зарурии таълим фароҳам оварда хоҳад шуд.
Айни ҳол дар гимназияи рақами 4-и шаҳри Хуҷанд беш аз 3200 нафар хонанда таҳсил менамоянд.
Омӯзгорон барои чунин таваҷҷуҳу ғамхорӣ ба Пешвои миллат муҳтарам Эмомалӣ Раҳмон изҳори сипос намуда, иброз доштанд, ки минбаъд низ барои баланд бардоштани сатҳи таълиму тарбия саҳми арзанда мегузоранд.
