19 Февраль 2026
Недоступен ни однин перевод.
Санаи 18 феврали соли 2026 дар толори меҳмонхонаи «CROWNЕ PLAZA»-и шаҳри Душанбе маросими ҷоизасупории соҳаи тарбияи ҷисмонӣ ва варзиши Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соли 2025 баргузор гардид, ки дар он беш аз 2 миллион сомонӣ ба ғолибони мусобиқаҳои байналмилалӣ супорида шуд.
Нахуст, иштирокчиёни чорабинӣ аз гӯшаи намоишгоҳи дастовардҳои соҳаи варзиши кишвар дидан намуда, акси дастаҷамъона гирифтанд.
Сипас, пеш аз оғози маросими расмии ҷоизасупорӣ филми кӯтоҳметражи мустанад оид ба дастоварду комгории соҳаи варзиши кишвар дар соли 2025 дар ҳаҷми 14 дақиқа манзури ҳозирин гардонида шуд.
Дар маросими мазкур муовини Сарвазири Ҷумҳурии Тоҷикистон - Дилрабо Мансурӣ, Раиси Кумитаи кор бо чавонон ва варзиши назди Ҳукумати Ҷумҳурии Тоҷикистон - Зулфиқор Гулаҳмадзода ва роҳбарону намояндагони вазорату идораҳо, варзишгарон, роҳбарону мураббиёни сохторҳои варзишии мамлакат, собиқадорону фаъолони соҳаи варзиш ва ғолибону ҷоизадорони мусобиқаҳои сатҳи байналмилалии варзишӣ дар соли 2025 иштирок намуданд.
Дар заминаи сиёсати варзишпарварони Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Ҳукумати мамлакат 67 нафар ғолибону ҷоизадорони мусобиқаҳои сатҳи байналмилалии варзишӣ ва мураббиёни онҳо бо мукофотпулиҳои Ҷоизаи Президенти Ҷумҳурии Тоҷикистон ҳавасманд гардонида шуданд.
Ҳамзамон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон озмуни ҷоизаи «Варзишгари беҳтарини сол», «Мураббии беҳтарини сол», «Мактаби варзишии беҳтарини сол», «Беҳтарин федератсияи варзишии сол», «Беҳтарин иншооти варзишии сол», «Беҳтарин шаҳри варзишии сол», «Беҳтарин васоити ахбори омма дар соҳаи тарбияи ҷисмонӣ ва варзиш», «Беҳтарин сохтори маҳаллӣ дар соҳаи тарбияи ҷисмонӣ ва варзиш», «Шореҳи беҳтарини соҳаи варзиш» ва «Варзишгарнавраси умедбахш» дар соли 2025 эълон намуд, ки беҳтаринҳо муайян карда шуда, дар маросими ҷоизасупорӣ қадрдонӣ карда шуданд.
Боиси ифтихор ва сарфарозист, ки шаҳри Хуҷанд - «Беҳтарин шаҳри варзишии сол», Муассисаи давлатии «Мактаби варзишии 4»-и шаҳри Хуҷанд – «Мактаби варзишии беҳтарини сол», Меҳроҷхон Умаров - «Мураббии беҳтарини сол» ва муштзани номи Хусравхон Раҳимов - «Варзишгари беҳтарини сол» дониста шуданд.
Ин дастовард ба тамоми фаъолон, аз ҷумла варзишгарони шаҳри Хуҷанд муборак бошад!
Дафтари матбуоти
Раиси шаҳри Хуҷанд
