13 Феврал 2026
Имрўз Раиси шаҳри Хуҷанд Фирдавс Шарифзода муовини директори Департаменти инфрасохтори устувор барои минтақаи Авруосиёи Бонки аврупоии таҷдид ва рушд (EBRD) Бахтиёр Файзиев ва ҳайати ҳамроҳонашро ба ҳузур пазируфт.
Фирдавс Шарифзода аснои суҳбат Бахтиёр Файзиевро ба Хуҷанди бостонӣ хайрамақдам гуфта, аз тадбирандешиҳои Ҳукумати мамлакат бо роҳбарии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва нишондодҳои Раиси вилояти Суғд Раҷаб Аҳмадзода ҷиҳати рушди соҳаҳои гуногуни хоҷагии халқ, корҳои бунёдкориву созандагӣ ёдоварӣ кард. Таъкид шуд, ки бо дастгирии Бонки Аврупоии Таҷдид ва Рушд (БАТР) 3 адад лоиҳаи сармоягузорӣ хусусияти иҷтимоидошта дар шаҳри Хуҷанд муваффақона амалӣ шуд.
Иттилоъ дода шуд, ки дар шаҳр солона беш аз 100 иншооти иҷтимоӣ ва фарҳангӣ ба истифода дода мешаванд ва Хуҷанд ҳамчун маркази маъмурии вилоят ҳар рӯз шумораи зиёди меҳмонон ва сайёҳонро аз минтақаҳои ҷумҳурӣ ва хориҷи кишвар қабул мекунад, ки ин ба инфрасохтори шаҳр, аз ҷумла системаҳои таъминоти об ва обҳои партов сарбории иловагӣ меорад.
Аз ин рӯ, навсозии инфрасохтори коммуналӣ барои мо авлавиятнок аст.
Шаҳри Хуҷанд ба марҳилаи стратегии навбатӣ - навсозии системаи тозакунии обҳои партови шаҳр мегузарад.
Мутахассисон таҳқиқоти пешакии имконпазирии лоиҳаро таҳия кардаанд ва хулосаи мусбати коршиноси давлатӣ гирифта шудааст.
Дарозии умумии шабакаҳои партовоб 170 километрро ташкил медиҳад. Бо назардошти афзоиши аҳолӣ ва васеъшавии минтақаи шаҳр, таъмири ҳамаҷонибаи инфрасохтор зарур аст.
Раиси шаҳр дар бораи нуктаҳои дигари лоиҳаи пешбинишуда маълумоти муфассалро ироа намуд.
Муовини директори Департаменти инфрасохтори устувор барои минтақаи Авруосиёии Бонки аврупоии таҷдид ва рушд (EBRD) Бахтиёр Файзиев зикр дошт, ки Бонки аврупоии таҷдид ва рушд солҳои охир дар Тоҷикистон хеле фаъол аст ва ба васеъ намудани дастрасӣ ба маблағҳо барои намояндагони бахши хусусӣ ва модернизатсияи инфрасохтори коммуналӣ мусоидат мекунад. Хуҷанд яке аз шаҳрҳои муҳим ва афзалиятнок дар сиёсати БАТР қарор гирифтааст.
Дар ҷараёни мулоқот мавзуъҳои татбиқи лоиҳаҳои сармоягузории давлатии амалкунанда ва банақшагирифташуда, амалишавии лоиҳаҳои нави давлатии сармоягузорӣ дар самти технологияҳои рақамӣ, маблағгузории иқтисодиёти сабз, хизматрасонӣ ва дигар масъалаҳои ҳамкорӣ матраҳ гардиданд.
Дар интиҳои мулоқот ҷонибҳо ба мувофиқа расиданд, ки баҳри амалӣ намудани лоиҳаи ёдоваршуда, аз тамоми имконот истифода хоҳанд намуд.
Дафтари матбуоти
Раиси шаҳри Хуҷанд
