Семинар: Ташкил ва идораи ғизои мактабӣ дар муассисаҳои таҳсилоти умумии Ҷумҳурии Тоҷикистон

Таъкид шуд, ки Ҳукумати Ҷумҳурии Тоҷикистон ҳифзи саломатии насли наврасро яке аз вазифаҳои муҳими давлатӣ мешуморад. Ташкили дуруст ва идораи самараноки ғизои мактабӣ ба беҳтар шудани саломатии хонандагон ва дар маҷмӯъ аҳолии кишвар мусоидат мекунад. Таъмини хонандагон бо ғизои солим дар мактаб яке аз шартҳои асосии нигоҳ доштани саломатӣ ва баланд бардоштани қобилияти самараноки азхудкунии дарсҳо мебошад, зеро хонандагон қисми зиёди вақти худро дар мактаб мегузаронанд. Аз ин рӯ, ғизои солим ҳамчун яке аз омилҳои муҳими муайянкунандаи саломатии насли наврас эътироф шудааст.

Бо дарназардошти аҳамияти масъалаҳои таъмини ғизои солим барои хонандагон, Ҳукумати Ҷумҳурии Тоҷикистон санадҳои зеринро таҳия ва қабул намудааст:

1. «Консепсияи беҳтар намудани ғизои мактабӣ дар муассисаҳои таҳсилоти умумии Ҷумҳурии Тоҷикистон» (Қарори Ҳукумати ҶТ аз 28.02.2015, №102);

2. «Стратегияи рушди устувори ғизои мактабӣ дар Ҷумҳурии Тоҷикистон барои давраи то соли 2027» (Қарори Ҳукумати ҶТ аз 29.09.2017, №456);

3. «Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022–2027» (Қарори Ҳукумати ҶТ аз 27.04.2022, №205).

Иттилоъ дода шуд, ки аз соли 2013 то имрӯз бо дастгирии шарикони рушд, хусусан Барномаи озуқавории ҷаҳонии СММ (БОҶ) ва маблағгузории Федератсияи Россия, маводҳои хӯрока (орд, равған, нахӯд) барои тақрибан 50% муассисаҳои таълимии кишвар таъмин карда мешаванд.

Мувофиқи ҳадафҳои «Барномаи давлатии рушди ғизои мактабӣ барои солҳои 2022–2027», аз оғози соли 2022 Ҳукумати Ҷумҳурии Тоҷикистон дар доираи лоиҳаи пилотӣ ба Вазорати маориф ва илми Ҷумҳурии Тоҷикистон аз ҳисоби буҷети давлатӣ маблағ ҷудо менамояд. Ин маблағҳо ҳамасола афзоиш меёбанд ва то имрӯз тақрибан 200 муассисаи таълимӣ бо ғизои гарм таъмин карда мешаванд. Айни замон, бо ҳамкории шарикони рушд, волидайн ва мақомоти иҷроияи ҳокимияти маҳаллии шаҳру ноҳияҳои дарбаршуда, тақрибан 450 ҳазор хонандагони синфҳои ибтидоӣ ҳамарӯза хӯроки гарм истеъмол мекунанд.

Илова бар ин, бо фармоиши Вазири маориф ва илми Ҷумҳурии Тоҷикистон (аз 27.12.2024, №1504) «Дастури корӣ оид ба ташкил ва идораи ғизои мактабӣ» тасдиқ гардидааст. Дастур марҳилаҳои гуногунро дар бар мегирад, аз ҷумла тайёрӣ, банақшагирӣ, ташкили ғизои мактабӣ ва амалӣ намудани Барномаи миллӣ. Он ҳамчун дастури корӣ ба роҳбарону кормандони муассисаҳои таҳсилоти миёнаи умумӣ тавсия мешавад. Дастур барои мониторинг ва пайгирии амалисозии ғизои мактабӣ, инчунин иҷрои буҷети давлатӣ, грантҳо ва дигар сарчашмаҳои маблағгузорӣ мусоидат мекунад.

Бо дарназардошти афзоиши маблағгузорӣ ва шумораи муассисаҳои таълимӣ, Вазорати маориф ва илми Ҷумҳурии Тоҷикистон модули дарсҳои омӯзишӣ ва бозомӯзиро барои маъмурияти муассисаҳои таълимӣ (директор, муҳосиб, мудири хоҷагӣ ва ғ.) таҳия намудааст.