01 Декабр 2025
Дар шаҳри Душанбе даври ҷамъбастии Озмуни ҷумҳуриявии «Ҳунарманди сол – 2025» доир гардид.
Озмун дар доираи иҷрои «Барномаи рушди ҳунармандӣ дар Ҷумҳурии Тоҷикистон барои солҳои 2021–2025» ва Ҷадвали баргузории ҷашну солгард, фестивалу намоиш, иду озмунҳои фарҳангӣ, маърифатӣ, анъана ва ҳунарҳои мардумӣ дар Ҷумҳурии Тоҷикистон барои соли 2025, ки бо Амри Президенти Ҷумҳурии Тоҷикистон тасдиқ гардидааст, гузаронида шуд.
Дар озмун ҳунармандони Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ дар панҷ номинатсия — «Нонпазӣ», «Чакандӯзӣ», «Атласбофӣ», «Кулолгарӣ» ва «Кордсозӣ» беҳтарин намунаи ҳунарашонро ба ҳайати ҳакамон пешниҳод намуданд.
Муовини Сарвазири Ҷумҳурии Тоҷикистон Дилрабо Мансурӣ иброз намуд, ки Президенти Ҷумҳурии Тоҷикистон муҳтарам Эмомалӣ Раҳмон эҳё ва рушди ҳунарҳои миллӣ, боло бурдани мақоми ҳунармандӣ ва тарғиби арзишҳои фарҳанги миллиро дар меҳвари сиёсати созанда қарор додаанд. Ин иқдом барои зинда гардонидани суннатҳои гузашта ва тақвияти худшиносии миллӣ заминаи устувор фароҳам овардааст.
«Аз нав зинда кардан ва рушд додани анъанаю суннатҳои волою наҷиби халқамон ва дар ин радиф такя ба ҳунарҳои мардумӣ далели худшиносии миллӣ ва фарҳанги хоси миллӣ доштани халқи тоҷик мебошад»,– изҳор дошт Дилрабо Мансурӣ.
Бояд гуфт, ки дар сохторҳои вазоратҳои меҳнат, муҳоҷират ва шуғли аҳолӣ, маориф ва илм, саноат ва технологияҳои нави Ҷумҳурии Тоҷикистон, Кумита оид ба таҳсолоти ибтидоӣ ва миёнаи касбии назди Ҳукумати Ҷумҳурии Тоҷикистон ва якчанд идораю корхонаҳо барои азхуд намудани ҳунарҳои гуногуни миллӣ ва муосир даврҳои кӯтоҳмуддати омӯзишӣ ба роҳ монда шудаанд, ки ҳамасола нафарони зиёдро ба омӯзиш фаро мегиранд.
Ҳукумати Ҷумҳурии Тоҷикистон бо мақсади мустаҳкам намудани заминаҳои меъёрии ҳуқуқии соҳаи ҳунармандӣ то имрӯз якчанд санад қабул намудааст. Аз ҷумла, бо қарорҳои Ҳукумати Ҷумҳурии Тоҷикистон «Барномаи рушди ҳунармандӣ дар Ҷумҳурии Тоҷикистон барои солҳои 2021-2025», Тартиби пешбурди феҳристи ҳунармандӣ ва Номгӯйи касбҳои ҳунармандӣ, Шуро оид ба ҳамоҳангсозӣ ва рушди ҳунармандии назди Ҳукумати Ҷумҳурии Тоҷикистон таъсис дода шудааст. Инчунин аз пардохти андоз аз маҳсулоти дар хона истеҳсолшуда озод шудани ҳунармандон дар рушди иқтисодиёти мамлакат натиҷаҳои хуб медиҳад.
Боиси ифтихор ва сарфарозист, ки дар озмун аз шаҳри Хуҷанд ҳунарманд Ӯктам Қобилов дар номиннатсияи "Беҳтарин ҳунари кордсозӣ" иштирок намуда, мақоми дуюмро ба даст овард.
Ғолибони озмуни «Ҳунарманди сол-2025» бо ҷоиза, Диплом ва туҳфаҳо қадрдонӣ карда шуданд.
Дафтари матбуоти
Раиси шаҳри Хуҷанд
