25 Ноябр 2025
Ба муносибати ба поён расидани фасли зарнисори тирамоҳ аҳли хонандагони гимназияи №1-и ба номи Раҳим Ҷалили шаҳри Хуҷанд чорабинии идона ташкил намуданд.
Дар намоиши идона неъматҳои табиат меваю сабзавоте, ки дар фасли тирамоҳ ҷамъоварӣ карда мешавад, муаррифӣ карда шуд.
Таъкид гардид, ки одатан вақте тирамоҳ мегӯянд, вожаҳои тиллоӣ, зарнисор, зарринро ҳамроҳ мекунанд. Дар забони модарии мо номи дигари тирамоҳ хазон асту хазонрез. Тирамоҳ фасли манзараҳоест дилрабову мафтункунанда, ки бевосита ба эҳсосоти одамҳо таъсир мекунад. Тирамоҳ таҷассуми тамоми рангҳо, тасвирҳо, манзараҳоест, ки бузургтарин рассом –табиат онро эҷод кардааст. Тирамоҳ ё хазон як фаслест, ки на фақат бо таровишҳои рангину зебо дилҳоро тасхир месозад, балки ин фасли воқеан нозанин як таъсири амиқ ба рӯҳияи инсон, ба дил, ба завқу табъи ӯ мегузорад, зеро дар симои тирамоҳи заррин инсон тирамоҳи умри худро низ эҳсос мекунад ва ин эҳсос, ин қабул инсонро то ҷойе мутаассир месозаду хаёлангез мекунад.
Тирамоҳи зарнисор ба кишвари файзбори мо охирон қадамҳои мубораки худро мегузорад. Тирамоҳ фаслест рангину пурбаракату зебо, аз ин рӯ хуҷастагиҳову зебоиҳои онро бештар адибону шоирон сутудаанд.
Аз ҷониби хонандагон шеъру суруд ва таронаҳои ҷолиб доир ба фасли тирамоҳ пешкаш гардид. Ғолибони озмун аз ҷониби маъмурияти муассисаи таълимӣ натиҷагирӣ карда шуд.
Дафтари матбуоти
Раиси шаҳри Хуҷанд
