21 Ноябр 2025
Санаи 20 ноябри соли 2025 мулоқоти навбатии сохторҳои дахлдори шаҳри Хуҷанд бо сокинони маҳаллаи 1-Май баргузор гардид.
Бояд қайд намуд, ки вохӯрӣ дар доираи иҷрои нақшаи муштараки рушди иҷтимоӣ ва тақвияти робита бо ҷомеа бо усули "Маҳал ба маҳал" ташкил шуда, ҷараёни он дар фазои озоду ошкоро сурат гирифт.
Дар мулоқот муовини Раиси шаҳри Хуҷанд Ҷамшед Набизода, Раиси Кумитаи иҷроияи ҲХДТ дар шаҳр Мунзифа Ҷабборӣ, намояндаи мақомоти амнияти шаҳр Шаҳром Бахтиёрзода, ходими дин Орифҷон Байзоев ва ғайра иштирок ва суханронӣ намуданд.
Ҷамшед Набизода дар баромади худ ба масъалаи ободии Ватан, ҳифзи сулҳу суботи пойдор ва нақши ҳамбастагии миллӣ дар рушди ҷомеа таъкид карда, зикр намуд, ки ҳисси баланди ватандӯстӣ омили муҳими пешрафти кишвар мебошад.
Мунзифа Ҷабборӣ масъалаҳои мубрами рӯз, аз ҷумла пешгирии терроризму экстремизм, ҳимояи арзишҳои миллӣ ва риояи фарҳанги либоси миллиро ба миён гузошта, ҳифзи анъана ва одатҳои миллӣ – ро вазифаи ҳар як шаҳрванди худшинос хонд.
Намояндаи мақомоти амният Шаҳром Бахтиёрзода оид ба таъмини амнияти миллӣ, пешгирии ҷинояткорӣ ва баланд бардоштани волоияти қонун дар ҷомеа иттилоъ дода, аҳамияти ҳамкории мардум бо ниҳодҳои сохториро муҳим арзёбӣ кард.
Орифҷон Байзоев, намояндаи ходимони дин, дар навбати худ оид ба риояи танзими анъана ва ҷашну маросимҳо, меъёрҳои иҷтимоӣ ва нақши дин дар таҳкими маънавияти ҷомеа андеша баён намуд.
Мулоқот дар шакли саволу ҷавоб идома ёфта, ба сокинон имкони мустақим иброз доштани фикру пешниҳодҳо фароҳам овард.
Дафтари матбуоти
Раиси шаҳри Хуҷанд
