Омўзиши Конститутсия дар ҳамаи мақомоти давлатӣ, муассисаҳои таълимиву тарбиявӣ, ташкилоту корхонаҳо ба роҳ монда шуда, барои татбиқи он бояд тамоми воситаву имкониятҳо истифода шаванд». Дарвоқеъ, яке аз муҳимтарин нишонаҳои давлати озоди мо Конститутсия маҳсуб меёбад, ки Тоҷикистони азиз сивуяк сол муқаддам ин санади олии ҳуқуқиро қабул кард. Конститутсияи мамлакат ҳуқуқу озодиҳои ҳар шаҳрвандро фарогир буда, аз беҳтарин қонунҳои асосии дунё эътироф шудааст, ки боиси ифтихор ва сарбаландии сокинони кишвар аст. Таърих ёд дорад, Конститутсияи Тоҷикистони соҳибистиқлол дар шароити басо ҳассос ва даргириҳои шадиди сиёсӣ 6-уми ноябри соли 1994 ба тариқи раъйпурсии умумӣ қабул гардид. Он Тоҷикистонро давлати соҳибихтиёр, демократӣ, ҳуқуқбунёд, дунявӣ, ягона ва иҷтимоӣ эълон намуд. Сарвари давлат зимни баррасии лоиҳа бевосита ширкат намуда, доир ба такмили Конститутсия ба як қатор моддаҳои он, аз ҷумла ҳолати душаҳрвандӣ, баробарҳуқуқии марду зан, дахлнопазирии инсон, шакли идоракунӣ, сохтори давлат, принсипҳои ташкили мақомоти олии давлат, таъсиси Ҳукумат, мақомоти додгоҳ ва дигар масъалаҳои умда андешаҳои бунёдӣ зикр намуданд, ки дар такмили лоиҳаи Конститутсия аҳамияти бузурги таърихӣ доранд. Боиси ифтихор аст, ки ҳар сол рўзи 6-уми ноябр дар қаламрави кишвари маҳбубамон ҳамчун рўзи қабул ва эътирофи Конститутсияи Тоҷикистони соҳибистиқлол тантана ва қайд мегардад. Мақомоти иҷроияи ҳокимияти давлатии шаҳр кулли мардуми сарбаланду заҳматкаши Хуҷандро ба муносибати қабули қонуни асосӣ – Конститутсияи Ҷумҳурии Тоҷикистон самимона муборакбод менамояд. Ин санади муқаддас Истиқлолияти давлатии Тоҷикистонро ба расмият даровард, роҳи ояндаи миллати куҳанбунёду созандаро ба сўи эъмори ҷомеаи нав ва таҳкими пояҳои давлатдории муосир мунаввар гардонд. Дар ин фосила қабули даҳҳо қонуну иловаву тағйирот ба онҳо аз қабили Қонун “Дар бораи масъулият барои таълиму тарбияи кўдак”, “Дар бораи танзими ҷашну маросим дар Ҷумҳурии Тоҷикистон”, “Дар бораи мақоми омўзгор” ба имзо ва амал расиданд, ки дар ҳифзи ҳуқуқи иҷтимоъ ва кўдакону наврасон ва омўзгорон хизмат мекунанд. Воқеан, мақоми омўзгор дар миёни ҷомеа ҳамеша баланд аст ва қабули ин қонуни нав мартабаву масъулияти устодону омўзгоронро дар назди худ ва ватан бештар мегардонад. Айни ҳол дар мамлакат барномаи сеюми таълим ва тарбияи ҳуқуқӣ барои солҳои 2020 – 2030 чун идомаи мантиқию бомароми ташаббусҳои қаблӣ дар самти таъмини волоияти қонун ва ҳуқуқу озодиҳои инсон ва шаҳрванд амалӣ шуда истодааст. Яъне, Конститутсия ҳамеша пуштибон ва ҳомии шаҳрвандони кишвар шуморида мешавад. Бори дигар, ҳамшаҳриёни гиромиро бо рўзи қабули Конститутсия табрику таҳният гуфта, орзу мекунам, ки маърифати ҳуқуқии шаҳрвандон боло равад, Конститутсия ҳамчун чароғи роҳнамо ва шиносномаи миллати тоҷик дар арсаи ҷаҳон бошад! Рўзи Қонуни асосӣ – пуштибони воқеии шаҳрвандон муборак!