31 Октябр 2025
Бо ифтихор аз ҷашни Меҳргон — рамзи фаровониву меҳнатдӯстӣ ва Рӯзи Конститутсияи Ҷумҳурии Тоҷикистон — санади муқаддаси давлатдорӣ, дар Литсейи инноватсионии Ҷавонӣ чорабинии бошукуҳи фарҳангӣ баргузор гардид.
Конститутсияи Ҷумҳурии Тоҷикистон, ба гуфтаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, “таҷассумгари иродаи халқ ва кафолати зиндагии осудаи шаҳрвандон мебошад”. Маҳз ҳамин арзишҳои миллӣ ва ватанпарастона меҳвари чорабинии имрӯзаро ташкил доданд.
Дар оғоз, директори Литсей Сурайёхон Неъматзода чорабиниро ифтитоҳ намуда, волидайн, омӯзгорон ва хонандагонро бо ду ҷашни муқаддаси миллӣ — Меҳргон ва Рӯзи Конститутсия — сидқан табрик намуд.
Ҳамзамон дар доираи барнома, натиҷаи озмунҳои дохилимуассисавӣ таҳти унвонҳои «Расми беҳтарин», «Масъули кори эҷодии дастӣ» ва «Лоиҳаи экологӣ» ҷамъбаст гардида, 150 нафар хонандагони фаъол бо диплом ва туҳфаҳои арзишманд қадрдонӣ шуданд.
Барномаи фарҳангии хонандагони синфҳои ибтидоӣ, ки бо се забон — тоҷикӣ, русӣ ва англисӣ — баргузор гардид, ранги хос гирифт. Сурудҳо ва шеъру рақсу намоишҳои онҳо дар васфи Ватан, Истиқлолият, Меҳргон ва Конститутсия, муҳаббати амиқи хонандагонро ба арзишҳои миллӣ инъикос намуданд.
Дар чорабинӣ намоишгоҳи дастранҷи хонандагон — офаридаҳои зебои дасти онҳо аз маҳсулоти кишоварзӣ ва корҳои эҷодӣ — ташкил шуда, аз ҷониби маъмурият ва меҳмонон бо баҳои баланд арзёбӣ гардид.
Дар анҷом, ғолибони озмунҳои «Беҳтарин донандаи Конститутсия» ва «Луғатдони беҳтарин» — 10 нафар хонандагони лаёқатманд бо ҷоизаҳои арзишманд сарфароз гардиданд.
Чорабинии фарҳангӣ бо фазои идона, эҳсоси гарми муҳаббат ба Ватан, Конститутсия ва фарҳанги миллии тоҷикон анҷом ёфт.
Дафтари матбуоти
Раиси шаҳри Хуҷанд
