13 Октябрь 2025
Недоступен ни однин перевод.
Соҳибкорони Хуҷанд дар сафи пеши ҷомеа
Соҳибкорони саховатпеша, ҳамшаҳриёни гиромӣ!
Соҳибкорӣ яке аз самтҳои муҳими пешрафти кишвар ба ҳисоб рафта, ба рушди он Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон ва Ҳукумати Ҷумҳурии Тоҷикистон аҳамияти ҷиддӣ зоҳир намуда, баҳри дастгирии он тадбирҳои муҳим пешбинӣ кардаанд, ки дар қонуни махсус зикр ёфтааст.
Дар Қонуни Ҷумҳурии Тоҷикистон «Дар бораи ҳимоя ва дастгирии давлатии соҳибкорӣ» омадааст, ки ҳимоя ва дастгирии давлатии соҳибкорӣ аз ҷониби Ҳукумати Ҷумҳурии Тоҷикистон, мақомоти ҳокимияти давлатӣ, мақоми ваколатдори давлатӣ ва мақомоти иҷроияи маҳаллии ҳокимияти давлатӣ амалӣ карда мешавад. Татбиқи чорабиниҳои пешбининамудаи барномаҳои давлатӣ ва ҳудудии рушди соҳибкорӣ мутобиқ ба ҳамин қонун равона карда шудааст.
Соҳибкорони гуногунсоҳаи шаҳри Хуҷанд аз ҳуқуқҳои конститутсионии хеш истифода намуда, барои рушди бемайлони соҳибкорӣ талош варзида истодаанд. Аз ҷониби давлат ҳамаи шароити зарурӣ, инфрасохтори мукаммал, захираҳои фаровони табиӣ, потенсиали кадрӣ, фазои мусоиди сармоягузорӣ фароҳам оварда шудааст.
Баҳри дастгирӣ ва гиромидошти шоистаи соҳибкорони ватанӣ бо ташаббусу эҳтимоми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар қаламрави кишвар рўзи 14-уми октябр ҳамчун Рўзи соҳибкорон таҷлил карда мешавад.
Ба ин муносибат аз номи Мақомоти иҷроияи ҳокимияти давлатии шаҳри Хуҷанд кулли соҳибкорони бонангу номуси Ватанро бо иди касбӣ – Рўзи соҳибкорон муборакбод намуда, барояшон тани сиҳату хотири ҷамъ, рўзгори ободу осуда ва дар иқдому ташаббусҳои пурифтихорашон баҳри ободию пешрафти кишвари азизамон муваффақиятҳои беназир хоҳонам.
Соҳибкорони сарбаланди шаҳри бостонии Хуҷанд дар дои-раи нақшаи чорабиниҳо барои истиқболи шоистаи ҷашни 35-солагии Истиқлоли давлатии Ҷумҳурии Тоҷикистон дар шаҳри Хуҷанд бо бунёди корхонаҳои саноатӣ, иншооти таъйиноташ гуногуни соҳаҳои хоҷагии халқ машғуланд, ки барои боз ҳам баланд бардоштани сатҳи некўаҳволии мардум заминаи воқеӣ мегузорад ва ҳамзамон, ба ҳусни нотакрори шаҳр шукўҳу шаҳомати хоса зам месозад.
Ҷиҳати дар амал татбиқ намудани сиёсати ба рушди иқтисодиёт нигаронидашуда, барои шароити мусоид муҳайё намудан ба ҳама намуди фаъолияти соҳибкорӣ корҳои рўзафзун ба роҳ монда шуда, дар натиҷа теъдоди соҳибкорони инфиродӣ дар шаҳр ба 8729 нафар расидааст, ки нисбат ба ҳамин даври соли сипаригашта 496 нафар зиёд мебошад. Аз миқдори умумии соҳибкорони инфиродӣ 3458 нафар бо патент, 2399 нафар бо шаҳодатнома, 2871 нафар бо шаҳодатнома бо шартҳои махсус ва як хоҷагии деҳқонӣ фаъолият мебаранд.
Мақомоти иҷроияи ҳокимияти давлатии шаҳри Хуҷанд минбаъд низ бо дастгирии Ҳукумати мамлакат ва Раиси вилояти Суғд Раҷаб Аҳмадзода иқдоми нек ва ташаббусҳои созандаи соҳибкорону сармоягузоронро дастгирӣ карда, барои амалишавии мақсаду мароми онҳо шароити заруриро муҳайё менамояд.
Итминони комил дорам, ки бо азму талоши соҳибкорони ватандўсту меҳанпараст минбаъд низ дар шаҳр корҳои ободониву созандагӣ вусъати тоза гирифта, ватани маҳбубамон – Тоҷикистон ба як кишвари пешрафта табдил меёбад.
Рўзи иди касбӣ муборак, соҳибкорон!
