05 Сентябр 2025
Бо садо додани Суруди миллӣ дар Коллеҷи тиббии шаҳри Хуҷанд ба номи Юсуфхон Исҳоқӣ бахшида ба таҷлили ҷашни бузурги миллӣ – 34-солагии Истиқлоли давлатӣ конфронси илмӣ-назариявӣ таҳти унвони «Истиқлол рамзи соҳибдавлатӣ ва ватандорист» баргузор шуд.
Дар конфронс, Аъзам Ҳотамӣ, котиби ҳамоҳангсозии Шурои Ҳаракати ваҳдати миллӣ ва эҳёи Тоҷикистон дар вилояти Суғд, Иброҳим Ҷабборзода, устоди Донишгоҳи давлатии Хуҷанд ба номи академик Б.Ғафуров, Мэлс Нуров шоир, Шаҳноза Ризоева устоди Коллеҷи тиббии шаҳри Хуҷанд ва дигарон дар бораи дастовардҳои Истиқлолият, мафҳум ва арзиши он маърӯзаҳо намуданд.
Таъкид шуд, ки тоҷикон баъд аз ҳазор сол аз нав соҳибдавлат гардиданд. Тавлиди давлати тозаистиқлоли Тоҷикистонро ҷомеаи ҷаҳонӣ бо қаноатмандӣ истиқбол намуд. Ҷумҳурии Тоҷикистон ба шарофати сиёсати хирадмандонаи Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон тавонист дар даврони истиқлол на танҳо равобити судманд бо ҷаҳони хориҷ барқарор созад, балки бо пайдо намудани равиши хоси дипломатияи худ, ки бар ҳифзи манофеи миллӣ ва эҳтироми арзишҳои умумибашарӣ асос ёфтааст, ҳамчун як кишвари фаъол ва таъсиргузор дар ҳалли масоили глобалӣ шинохта шавад.
Мусаллам аст, ки обрӯ ва нуфузи имрӯзаи Тоҷикистон дар арсаи ҷаҳонӣ самараи талоши пайгирона ва хастагинопазири Президенти кишвар муҳтарам Эмомалӣ Раҳмон аст. Бояд гуфт, сиёсати хориҷии Тоҷикистон сиёсати санҷидашуда, прагматикӣ ва воқеъбинона буда, ҳамзамон бо пазириши меъёрҳои эътирофшудаи байналмилалӣ ва эҳтиром ба манофеи шарикон, риояи қатъии манфиатҳои миллиро дар фаъолияти дипломатӣ дар мадди аввал мегузорад. Имрӯз Тоҷикистон бо аксарияти кишвари ҷаҳон муносибатҳои дипломатӣ барқарор намуда, зиёда аз 160 давлат истиқлоли Ҷумҳурии Тоҷикистонро расман эътироф кардааст.
Истиқлолият беҳтарин дастоварди таърихӣ ба шумор меравад. Тоҷикистон дар даврони соҳибистиқлолии хеш имконият пайдо намуд бисёр корҳои барои ояндаи миллат фоидаоварро роҳандозӣ намояд. Аз ҷумла, яке аз иқдомҳои беҳтарине, ки дар сиёсати давлатдорӣ ба он диққати ҷиддӣ дода шуд, ин баланд бардоштани мақоми зан дар ҷомеа буд. Истиқлоляти давлатӣ тавонист барои зани тоҷик озодандешӣ, зиндагонии шоиста ва имконияти муфид фароҳам оварад. Дар замони истиқлолият занон тавонистанд дар дилхоҳ соҳа кору фаъолияти самарабахш намоянд. Имрӯз зани тоҷик дар баробари модару ҳамсари хуб будан инчунин роҳбар, муҳандис, ронанда, корманди мақомоти ҳифзи ҳуқуқ, ҳатто дар қушунҳои сарҳадӣ низ фаъолият намуда, саҳми худро дар пешрафти ватану осоиштагии миллат расонида истодааст. Ҳукумати Тоҷикистон сиёсати имрӯзаи худро бе иштироки занон тассавур карда наметавонад.
Боиси ифтихор аст, ки давлату Ҳукумати Тоҷикистондар самти сиёсати иҷтимоии хеш ба масъалаи баланд бардоштани мақоми занону бонувон дар ҳаёти ҷомеа диққати ҷиддӣ дода мешавад.
Мухбира Ҷӯрабоева, муовини директор оид ба корҳои тарбияи Коллеҷи тиббии шаҳри Хуҷанд аз номи роҳбарияти муассисаи таълимӣ ба меҳмонон арзи миннатдорӣ расонид.
Дафтари матбуоти
Раиси шаҳри Хуҷанд
