05 Сентябр 2025
Дар толори хурди Кохи фарҳанги «Суғдиён» маросими супоридани Ифтихорнома ба фаъолони соҳаҳои гуногуни хоҷагии халқи вилояти Суғд ва шаҳри Хуҷанд бахшида ба таҷлили Рўзи Истиқлоли давлатии Ҷумҳурии Тоҷикистон бо иштироки Раиси шаҳри Хуҷанд Фирдавс Шарифзода ва муовини Раиси вилояти Суғд Анвар Яъқубӣ баргузор гардид.
Муовини Раиси вилояти Суғд Анвар Яъқубӣ Паёми табрикотии Раиси вилояти Суғд Раҷаб Аҳмадзодаро ба самъи ҳозирин расонд, ки дар он аз ҷумла қайд карда шуд, ки дар сиёсати давлатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қадршиносӣ намудани хизматҳои фарзандони барўманд ва хизматнишондодаи Ватан, онҳое, ки бо меҳнати босубот ва фидокоронаашон дар бунёди ҷомеаи навини кишвар ва рушди соҳаҳои он саҳми назаррас гузоштаанд, ҷойгоҳи хоса дорад. Мақомоти иҷроияи ҳокимияти давлатии вилояти Суғд дар партави иқдомҳои созандаи Пешвои миллат муҳтарам Эмомалӣ Раҳмон дар арафаи 34-солагии Истиқлоли давлатии Ҷумҳурии Тоҷикистон фаъолони соҳаҳои гуногуни иқтисодиву иҷтимоии вилоятро барои хизматҳои шоиста ва дастовардҳои меҳнатӣ дар соҳаҳои иқтисодиёту иҷтимоиёти вилоят ва иштироки фаъолона дар ҳаёти ҷамъиятӣ бо Ифтихорномаи Мақомоти иҷроияи ҳокимияти давлатии вилояти Суғд сарфароз мегардонад.
Сипас, Раиси шаҳри Хуҷанд Шарифзода Фирдавс ҳамагонро бо фарорасии Истиқлоли давлатӣ таҳният гуфта, аз ҷумла афзуд, ки Истиқлолият ганҷи бебаҳо, мояи ифтихор, манбаи худшиносӣ, сарчашмаи нерўбахш ва омили бунёдии таҳкиму тақвияти пояҳои давлатдории миллии мо мебошад. Зеро маҳз Истиқлолият ба мо имконияти таърихие фароҳам овард, ки Ватани худро соҳибӣ кунем, давлатдории миллии худро барпо намоем, суннату арзишҳои миллиамонро эҳё созем ва зиндагии орому осуда ба сар барем.
Раиси шаҳр гуфт, ки агар ба марҳилаи рушди соҳибистиқлолии мамлакатро назар афканем, густариши сулҳ ва таҳкими ваҳдати миллӣ, рушду инкишофи тамоми соҳаҳои хоҷагии халқи кишвар ва дар маҷмўъ дар арсаи байналмиллалӣ ҳамчун кишвари мустақил арзи ҳастӣ кардани Тоҷикистони азиз, аз сиёсати созандаву оқилонаи Пешвои муаззами миллат, муҳтарам Эмомалӣ Раҳмон далолат мекунад.
Имрӯзҳо дар тамоми гўшаву канори кишвари азизамон – Тоҷикистони соҳибистиқлол, аз ҷумла маркази вилояти Суғд -шаҳри Хуҷанд низ бо дастгирӣ ва ғамхориҳои пайвастаи Пешвои муаззами миллат муҳтарам Эмомалӣ Раҳмон ва нишондодҳои Раиси вилояти Суғд Раҷаб Аҳмадзода, корҳои созандагиву бунёдкорӣ ва ободонӣ ҳамарўза вусъати тоза гирифта, дар партави соҳибистиқлолии Ватани азизамон ба мо муяссар гардид, ки ба дастовардҳои назаррас ноил гардем.
Боиси ифтихору сарбаландист, ки бо заҳмати якҷояи халқи Хуҷанди бостонӣ нақша чорабиниҳои бунёдкориву созандагиҳо бахшида ба 35 солагии Истиқлоли давлатӣ пурраву барзиёд иҷро гардида, то ба имрӯз беш аз 1000 иншооти таъиноташ гуногун мавриди баҳрабардорӣ қарор дода шуд.
Ҳамчунин, бо шукргузорӣ метавон қайд намуд, ки имрўзҳо амалҳои нек ва ободониву созандагӣ вусъати нав ёфта, таъсиси корхонаву коргоҳҳои саноатӣ, бо санъати баланди меъмории муосири миллӣ бунёди иншооту биноҳо, муассисаҳои иҷтимоӣ, таъмиру азнавсозии роҳҳо ва таҷдиду азнавсозии хиёбону кўчаҳо ба истиқболи 35 солагии Истиқлоли давлатии Ҷумҳурии Тоҷикистон бомаром идома дошта, барои таъмини зиндагии шоистаи мардум заминаи мусоид фароҳам оварда шуда истодааст. Ҳамаи ин ободиву пешравиҳо ва созандагиву бунёдкориҳо аз азму иродаи қавӣ ва меҳнати аҳлонаи сокинони Хуҷандшаҳру соҳибкорони ватандўст, кормандони ташкилоту муассисаҳо ва корхонаю идораҳои шаҳр мебошад, ки имрўз заҳмати онҳо аз ҷониби давлату Ҳуқумат қадрдонӣ мегардад.
Дар иртибот ба ин, имрўз 53 нафар кормандони касбу кори гуногун, аз қабили кормандони мақомоти давлатӣ ва ҳифзи ҳуқуқ, омўзгору табиб, бинокору роҳсоз ва даҳҳои дигарон баҳри саҳми арзанда гузоштан ба пешрафту ободонии вилоят ва шаҳрамон бахшида ба таҷлили 34- солагии Истиқлоли давлатии Ҷумҳурии Тоҷикистон бо Ифтихорномаҳои Мақомоти иҷроияи ҳокимияти давлатии вилояти Суғд ва шаҳри Хуҷанд сарфароз гардонида мешаванд.
Изҳори умедворӣ карда шуд, ки эътимоди комил дорам, ки мо бо ҳисси баланди шаҳрвандӣ ва ифтихори ватандорӣ, ба хотири ҳифзи истиқлолу озодии Ватан, дар ҳамдастию шукргузорӣ аз соҳибистиқлолии Ватани маҳбубамон ҳамаи имкону тавонмандиамонро минбаъд низ ба кор бурда, ҷиҳати иҷрои пурраи ҳадафҳои ба нақша гирифташуда, баҳри сазовор таҷлил намудани ҷашни бузурги миллиамон 35-солагии Истиқлоли давлатии Ҷумҳурии Тоҷикистон ҷидду ҷаҳд менамоем, зеро қудрати мо дар ҳамдигарфаҳмӣ, дўстӣ, бародарӣ ва Ваҳдат аст.
Сипас, дар вазъияти тантанавӣ ба 53 нафар фаъолони шаҳр Ифтихорномаҳои Мақомоти иҷроияи ҳокимияти давлатии вилояти Суғд ва шаҳри Хуҷанд тақдим карда шуд.
Дафтари матбуоти
Раиси шаҳри Хуҷанд
