Машварати омӯзгорони фаннии муассисаҳои таълимии шаҳри Хуҷанд

Дар рафти машварат мудири шуъбаи маориф Шаҳноза Мақсудзода иштирок ва аз ҷараёни машғулиятҳо шиносӣ пайдо намуд.

Таъкид шуд, ки асоси пешрафту ояндаи ҳар давлату миллат ба мактабу маориф марбут аст. Дар душвортарин марҳалаҳо ҳам Сардори давлат лаҳзае таваҷҷуҳи худро аз таълиму тарбияи насли наврас ва мактабу маориф кам накарданд. Баръакс, маорифро дар сиёсати хеш ба самти афзалиятнок табдил доданд ва ин сиёсат сиёсати маорифпарварона ном гирифт. Баракати ҳамин сиёсат буд, ки дар андак муддат дар низоми маорифи кишвар таҳаввулоту дигаргуниҳои тасаввурнопазир сурат гирифтанд. Аз соли 2000-ум то ба имсол маблағгузорӣ ба соҳаи маориф 200 маротиба афзудааст (соли 2000 — 42 миллион сомонӣ, соли 2024 8 миллиарду 231 миллион сомонӣ). Мувофиқи таҳлилҳои ЮНЕСКО ва Бонки Ҷаҳонӣ Ҷумҳурии Тоҷикистон дар байни кишварҳоест, ки ҳаҷми маблағгузориашон ба соҳаи маориф аз ҳисоби буҷети давлат зиёд мебошад. Ва Тоҷикистон дар миёни 183 кишвари таҳти омӯзиш қарордошта мақоми 21-умро ишғол менамояд. Ин шаҳодати он аст, ки бо вуҷуди мушкилоти буҷет таваҷҷуҳи Пешвои миллат ба мактабу маориф меафзояд. Дар ҳама сафарҳои худ ба минтақаҳои Ватани азизамон Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҳатман аз муассисаҳои соҳаи маориф боздид ба амал меоранд. Сафаре нест, ки Сарвари давлат боғчаву мактаби наверо накушода бошанд. Гузашта аз ин, дар ягон кишвар оғози соли нави хониш бо чунин ҳашамату ифтихор таҷлил намешавад. Ва чуноне Президент дар яке аз суханрониҳояшон таъкид карданд: «Дар даврони Истиқлоли давлатӣ дар оғози соли таҳсил таҷлил намудани Рӯзи дониш ва Дарси сулҳ дар ҳамаи зинаҳои таҳсилоти низоми маорифи кишвар ба яке аз анъанаҳои неки умумимиллӣ дар Тоҷикистон табдил ёфтааст.»