04 Июл 2025
Дар микроноҳияи 30-юми маҳаллаи “Навбаҳор”-и шаҳри Хуҷанд маросими номгузорӣ ба яке аз кӯчаҳои номнадошта ба номи Маҳмудҷон Рабеъҷонов баргузор шуд.
Муяссара Қаҳҳорӣ, муовини Раиси шаҳри Хуҷанд чорабиниро ифтитоҳ намуда, аз ҷумла афзуд, ки бо пешниҳоди Комиссияи номгузорӣ ва ивази номи иншооти таърихию ҷуғрофии Мақомоти иҷроияи ҳокимияти давлатии шаҳри Хуҷанд дар Иҷлосияи Маҷлиси вакилони халқи шаҳри Хуҷанд вакилон барои номгузорӣ намудани номи яке аз кўчаи номнадоштаи маҳаллаҳои навбунёди шаҳри Хуҷанд ба номи Маҳмудҷон Рабеъҷонов қарор қабул намуданд.
Иттилоъ дода шуд, ки Маҳмудҷон Рабеъҷонов 9-уми сентябри соли 1951 дар шаҳри Хуҷанд, дар оилаи хизматчӣ ба дунё омада, соли 1973 Донишкадаи давлатии тиббии Тоҷикистонро хатм кардааст. Аз соли 1973 то соли 1976 дар Омӯзишгоҳи тиббии шаҳри Хуҷанд ба донишҷӯён сабақ додааст.
Баъдан, соли 1976 дар шуъбаи ҷарроҳии калонсолони Беморхонаи клиникии шаҳрии № 1-и шаҳри Хуҷанд бо таври гузариш ба фаъолият пардохт ва то соли 1979 дар ин ҷо кор карда, ҳамон сол ба шаҳри Маскав рафта, то соли 1981 дар заминаи кафедраи ҷарроҳии калонсолони Донишгоҳи давлатии тиббии ба номи Пирогов курси ординатураро гузашт.
Хизматҳои ӯро ба инобат гирифта, соли 1993 ҳамчун сарҷарроҳи ғайривоҳидии Раёсати тандурустии вилояти Суғд, соли 1994 сартабиби Беморхонаи клиникавии вилояти Суғд ва баъдан соли 1996 сардори Раёсати тандурустии вилояти Суғд таъйин намуданд, ки дар ин вазифаҳо то соли 2008 адои вазифа намудааст.
Маъруфҷон Ҳоҷибоев, муовини сардор Раёсати тандурустии вилоят, ҳамсабақи Маҳмудҷон Рабеъҷонов-Толиб Исмоил, олими варзида Абдураҳмон Мирсаидов, духтари Маҳмудҷон Рабеъҷонов-Моҳирахон Рабеъҷонова ва дигарон аз хислатҳои неки табиби ҳозиқ ёдоварӣ намуданд.
Таъкид шуд, ки Маҳмудҷон Рабеъҷонов, тӯли фаъолияти хеш худро ҳамчун табиби ҳозиқу фидоии касб нишон дод. Ӯ мураббии даҳҳо шогирдон буд, ки бештари онҳо то охири умраш дар паҳлӯяш кору фаъолият намуда, бархе аз онҳо ҳатто сазовори номзади илми тиб гардидаанд.
Сипас, дар вазъияти тантанавӣ парда аз лавҳаи хотиравӣ бардошта шуд.
Дафтари матбуоти
Раиси шаҳри Хуҷанд
