КОНФЕРЕНСИЯ: "ВАҲДАТИ МИЛЛӢ - ПОЯИ СУЛҲ"

Дар конференсия мудири шуъбаи маорифи шаҳри Хуҷанд Шаҳноза Мақсудзода, мудири шуъбаи кор бо занон ва оилаи мақомоти иҷроияи ҳокимияти давлатии шаҳр Кенҷазода Манучеҳра, собиқадори хизмати давлатӣ Маҷидзода Муҳаббат иштирок намуда, доир ба мавзуъҳои "Ваҳдати миллӣ - омили асоси суботи ҷомеа", "Ваҳдат - бақои миллат", "Сулҳу осоиштагӣ аз Ваҳдат аст" ибрози андеша намуданд.

Қайд карда шуд, ки 28 сол аст, мардуми тоҷик ва ҳамаи тоҷикистониҳо дар зери таассуроти бузурги Созишномаи истиқлоли сулҳ ва ризоияти миллӣ, ки бо ҷонбозиҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба имзо расид, зиндагӣ карда ба ояндаи худ бо назари нек менигаранд.

Бо шарофати таҳкими Ваҳдати миллӣ сулҳу суботи комил ва фазои орому беғубор дар диёри Тоҷикистони азиз ҳукмфармо буда, аз файзу баракати он сатҳу сифати зиндагӣ, маърифату ҷаҳонбинӣ ва худогоҳиву ифтихори миллии мардуми кишвар боло рафта, Тоҷикистон ба сўи амалишавии ҳадафҳои созандагиву бунёдкорӣ қадамҳои устувор мегузорад. Таҳкими пояҳои Ваҳдати миллӣ имкон дод, ки бо дарназардошти дастовардҳои ин даврон эътибору мақоми Ҷумҳурии Тоҷикистон дар арсаи байналмилалӣ ба маротиб боло рафта, рушди муътадили низоми иқтисоди миллӣ таъмин карда шуда, дар заминаи арзишҳои волои Конститутсия барои бунёди давлати демократию ҳуқуқбунёд, ки дар он эҳтирому ҳимоя ва ҳифзи ҳуқуқу озодиҳои инсон дар мадди аввал мебошад, заминаи воқеӣ гузошта шавад.

Дар қисмати дигари конференсия як зумра омӯзгорон, собиқадорон ва хонандагони фаъоли муассисаҳои таълимии шаҳр ба ифтихори 28-умин солгарди Рӯзи Ваҳдати миллӣ бо Сипоснома ва туҳфаҳои хотиравии шуъбаи маорифи шаҳри Хуҷанд қадрдонӣ гардиданд.

Дар фарҷом барномаи адабӣ - фарҳангии ҳунармандон ва кӯдакону наврасон, ки иборат аз суруду таронаҳо бахшида ба Сулҳу Ваҳдат, Ватан-модар, Тоҷикистон ва тараннуми Ваҳдату якдилӣ буд, хотири иштирокчиёни чорабиниро болида гардонид.