Раиси шаҳри Хуҷанд Фирдавс Шарифзода 154 нафар ғолибони Олипиадаи ҷумҳуриявиро қадршиносӣ намуд

Раиси шаҳри Хуҷанд Фирдавс Шарифзода зимни суханронии худ таъкид дошт, ки имрўзҳо дар тамоми гўшаву канори Ватани соҳибистиқлоламон аҳли ҷомеа барои бо дастовардҳои арзанда таҷлил кардани ҷашни фархундаи 35-солагии Истиқлоли давлати Ҷумҳурии Тоҷикистон камари ҳимматро мустаҳкам баста, софдилона дар ҳама соҳаҳо баҳри рушду нумўи ҳамаҷонибаи кишвари азизамон заҳмат кашида истодаанд. Маҳз бо шарофати сиёсати хирадмандонаи Асосгузори сулҳу Ваҳдати миллӣ - Пешвои миллат, Президенти кишвар, муҳтарам Эмомалӣ Раҳмон ва азму талоши собитқадамонаи ҳамватанон шаҳру навоҳии мамлакат бо сохтмон ва бунёди садҳо иншооти замонавӣ боз ҳам ободу зебо гардидаанд.

Зикр гардид, ки дар ин лаҳзаҳои бисёр фараҳафзо ҳар яки мо ба хотири он ҷамъ омадаем, ки беҳтарин толибилмони муассисаҳои таълимии шаҳри Хуҷандро, ки дар озмуну олимпиадаҳои байналмилалӣ ва ҷумҳуриявӣ сазовори мақомҳои ифтихорӣ гардидаанд, қадршиносӣ намоем.

Дар Паёми хеш дар баробари дигар соҳаҳо, Пешвои муаззами миллат ҷиҳати рушду инкишофи мактабу маориф фикру мулоҳизаҳои судмандро баён карда, бори дигар изҳор намуданд, ки: «Ҳадафи ниҳоии мо бо истифода аз дастовардҳои илму техникаи муосир ва технологияи пешрафта, инчунин аз расму оин ва арзишҳои миллии маънавӣ ва ахлоқӣ тарбия кардану ба камол расидани наслҳои закиву донишманд ва соҳибмаърифату соҳибмаълумот мебошад, то дар оянда тақдири давлату миллати худро ба даст гирифта тавонанд»

Хушбахтона, иштироки хонандагони муассисаҳои таълимии шаҳри Хуҷанд дар олимпиадаҳои байналмилалӣ тариқи онлайн ва интихобӣ сол то сол зиёд гардида истодааст. Дар олимпиадаҳои байналмилалии фаннӣ, лоиҳавӣ, фосилавӣ дар соли таҳсили 2024-2025 - 1102 нафар хонандагони муассисаҳои таълимии шаҳр дар кишварҳои Россия, Ўзбекистон, ИМА, Малайзия, Индонезия, Арабистони Саудӣ, Бразилия иштирок намудаанд.

Ҳамзамон бояд хотирнишон намоем, ки аз байни 22 000 иштирокчиён аз 117 давлати дунё дар олимпиадаи байналмиллалии “STЕM” ва дар мусобиқаи байналимллалии “Coding” толибилмони шаҳр иштирок намуда, дар натиҷа сазовори ҷойҳои ифтихорӣ гардиданд. Дар олимпиадаи байналмиллалии Тинилинг толибилмони муассисаҳои таълимӣ сазовори 5 ҷойи ифтихорӣ гардиданд.

Иттилоъ дода шуд, ки дар соли таҳсили 2024-2025 тибқи Низомномаи Вазорати маориф ва илми Ҷумҳурии Тоҷикистон оид ба Олимпиадаи фаннии хонандагон, ки бо қарори мушовараи Вазорати маориф ва илми Ҷумҳурии Тоҷикистон дар муассисаҳои таълимии шаҳри Хуҷанд олимпиадаи фаннии хонандагон гузаронида шуд, ки дар он 18309 нафар иштирок намуданд. Дар умум, дар даври шаҳрии олимпиадаи фаннии хонандагон 450 нафар сазовори ҷойҳои ифтихорӣ гардиданд.

Дар даври вилоятии олимпиадаи фаннии хонандагон - 450 нафар иштирок намуда, аз он 314 нафар сазовори ҷойҳои ифтихорӣ гаштанд.

Дар даври ҷумҳуриявии олимпиадаи фаннии хонандагон - 252 нафар иштирок намуда, аз он 154 нафар, аз ҷумла ҷойи 1-15 нафар, ҷойи 2-27 нафар ва ҷойи 3-111 нафар ба гирифтани мақомҳои ифтихорӣ мушарраф гардиданд.

Бо мақсади ҳавасмандгардонии ғолибони даври ҷумҳуривии олимпиадаҳои фаннии хонандагон аз ҳисоби буҷаи маҳаллӣ бо қарори Раиси шаҳри Хуҷанд 134 600 (якчаду сию чор ҳазору шашсад) сомонӣ маблағ ҷудо гардида, раванди дастгирии хонандагони болаёқат, ки ба дастоварду комёбиҳои шоиста ноил гардидаанд, минбаъд низ идома хоҳад ёфт.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар мулоқот бо зиёиёни мамлакат таъкид намудаанд: «Калиди ҳама гуна дастоварду пешравӣ ва истиқлолияти фикрӣ, муаллим - омўзгор ва хазинаи маънавию илмии ў ба шумор меравад. Аз ин рў, самаранок ба роҳ мондани корҳои таълиму тарбия аз ҷониби омўзгор имкон фароҳам меорад, ки сатҳи мафкура ва донишу ҷаҳонбинии толибилмон боло равад ва онҳо ҳамқадами замон гарданд».

Сипас аз тарафи Раиси шаҳри Хуҷанд Фирдавс Шарифзода дар вазъияти тантанавӣ бо хонандагоне, ки дар даври ҷумҳуриявии олимпиадаи фаннии хонандагон мақомҳои ифтихориро касб намуданд, маблағҳои пулӣ, диплом тақдим гардид. Ҳамчунин омӯзгороне, ки дар ин самт заҳмат кашидаанд, аз тарафаи шаҳрдорӣ қадршиносӣ шуданд.

Фирдавс Шарифзода ҳамчунин Ҷомеаи меҳнатии Литсейи физикӣ математикии №1 ба номи академик М.Осимӣ, литсей барои хонандагони болаёқат, литсейи Донишкадаи политехникии ба номи академик М.Осимӣ ва Муассисаи таълимии ғайридавлатии “Мактаби П. Пӯлотов”-ро барои афзун намудани даствардҳо ҳавасманд намуд.

Хонандагон барои чунин ғамхорию эҳтимом ба Пешвои миллат муҳтарам Эмомалӣ Раҳмон арзи сипос намуданд.