05 Июн 2025
Иди Қурбон – иди некиву накўкорӣ
Шаҳрвандони гиромӣ, ҳамшаҳриёни азиз!
Мардуми шарифи Тоҷикистон маҳз ба шарофати истиқлолияту соҳибихтиёрӣ ба эҳёи суннату анъанаҳои неки ниёгон, таҷлили иду маросим ва анъанаву суннатҳои милливу динӣ иқдом намуд ва иди Қурбон аз ҷумлаи суннатҳои бисёр муқаддаси мардуми мусулмони мо буда, беҳтарин арзишҳои инсонӣ аз қабили сабру таҳаммул, некиву некўкорӣ, раҳму шафқат, бахшиши гуноҳ, поси хотири гузаштагон, аёдати пайвандону хешу табор, изҳори ҳамдардӣ ба азодорон, хайру эҳсон ба ятимону маъюбон ва дармондагону ниёзмандонро ташкил медиҳад.
Ба ин муносибати нек аз номи Мақомоти иҷроияи ҳокимияти давлатии шаҳри Хуҷанд фарорасии Иди саиди Қурбонро ба ҳамаи Шумо муборакбод гуфта, ба хонадонатон осоишу ободӣ, саодати рўзгор ва тани сиҳату хотири ҷамъ орзу менамоям.
Боиси сарфарозист, ки мардуми Хуҷанди бостонӣ мисли дигар шаҳру навоҳии кишвар Иди саиди Қурбонро, ки аз беҳтарин арзишҳои инсонпарварию мардумнавозӣ саршор аст, дар фазои суботи сиёсӣ, пойдорӣ ва устувории ваҳдати миллӣ, саъю талошҳои созанда ва бунёдкорона барои расидан ба зиндагии шоиста ва эъмори ҷомеаи демократӣ, ҳуқуқбунёд ва дунявӣ истиқбол намуда истодааст.
Ба шарофати истиқлоли давлатии кишварамон таҳти сарварии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон миллати мо дар озодии виҷдон, дину ақида, адои маросими суннатию динӣ соҳиби имкониятҳои фаровон гардид. Дини мубини ислом ҳамчун дини поку беолоиш ва раҳнамои накўкориҳо мақоми мустаҳкамро соҳиб гашт. Аз ин ҷост, ки Пешвои миллат дар аксари мулоқотҳои худ таъкид мекунанд, ки дар шароити давлати озоди демократӣ ва дунявӣ имрўз имкон дорем, ки таълимоти созандаи дини мубини исломро дар байни афроди ҷомеа густариш диҳем.
Пешвои миллат мўҳтарам Эмомалӣ Раҳмон дар вохўрӣ бо аҳли ҷомеа ва дин таъкид намуданд: “Мардум ба ҷои корҳои дуввумдараҷа ба амалҳои хайру савоб аз қабили кўмак кардан ба хешу табори наздики ниёзманд, таъмири хона, дару бом ва расонидани ёрмандӣ барои пурра кардани маводи рўзгор ба хешу табори наздики ниёзманд, таъмиру тармими роҳ, мактаб, китобхона, беморхона ё бунгоҳи саломатии деҳаи худ машғул шаванд”.
Воқеан ҳам, хайрхоҳу дастгири бенавоёну бечорагон будан беҳтарин хислати инсонӣ буда, аз фазилатҳои Иди Қурбон маҳсуб меёбад. Ба шарофати он дастархони оилаҳои камбизоату ниёзманд ҳам ғанӣ мегар-дад, инсонҳои соҳибдилу ғамхор сари ятимонро сила мекунанд, ба аёдати пирону барҷомондагон ва одамони яккаву танҳо мераванд, меҳру муҳаббати ҳамагон афзоиш меёбад.
Мақомоти иҷроияи ҳокимияти давлатии шаҳри Хуҷанд ва соҳибкорону шахсони саховатманд дар арафаи ин иди суннатӣ маъюбону дармондагон, собиқадорони ҷангу меҳнат ва кўдакони ятиму бепарасторро бо маводи озуқаву кўмакҳои моддӣ таъмин карданд.
Бояд хотиррасон шуд, ки дар замони муосир бо номи дини ислом гурўҳҳои иртиҷоии ҷаҳон амалҳои зиштро ба роҳ мондаанд ва барои эмин мондан аз таъсири омилҳои манфии ин раванд мо бояд тафаккури солими миллиро дар зеҳни ҷавонон инкишоф диҳем, арзишҳои миллиро аз таҳдидҳои хатарбори асри навин ҳифз намоем ва ваҳдати миллиро таҳким бахшем.
Боварии комил дорам, ки минбаъд низ мардуми сарбаланди Хуҷанди бостонӣ пуштибонии худро аз сиёсати пешгирифтаи Пешвои миллат, мўҳтарам Эмомалӣ Раҳмон ва роҳнамоиҳои Раиси вилояти Суғд Раҷаб Аҳмадзода идома бахшида, баҳри боз ҳам ободу зебо гардидонидани шаҳри азизамон саҳми босазо хоҳад гузошт.
Бори дигар, меҳмонон ва ҳамшаҳриёни азизро бо фарорасии Иди Азҳо, иди саиди Қурбон табрик намуда, ба ҳамагон хушии рўзгор, дас-тархони пур аз нозу неъмат, сулҳу ваҳдати комил ва шукуфоии ватанамонро таманно менамоям.
Иди Қурбон муборак, ҳамдиёрони азиз!
