11 Март 2025
ТАРҒИБГАРОНИ ҒОЯҲОИ СОЗАНДА
Рўзноманигорон ва собиқадорону кормандони мўҳтарами матбуоти тоҷик!
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон матбуотро кашфиёти нодири башар номида, аз ҷумла изҳор кардаанд, ки “Имрўз беш аз пеш маълум мегардад, ки нақши воситаҳои ахбори омма дар ҳаёти ҷомеаи муосир чӣ гуна бузург аст.
Дар ҳақиқат матбуот ва воситаҳои ахбори омма ба ташаккули афкори ҷомеа таъсири муқтадир ва муассир мерасонанд”.
Бешак, дар қаламрави кишвари маҳбубамон бо мақсади рў овардан ба таърихи матбуот, эътирофи қадри сухан чун нерўи тавонои ҳидояткунандаи мардум ба сўи фардои пурсаодат, садоқат ба кору анъанаҳои поягузорони матбуоти тоҷик ҳамасола мутобиқ ба Қонуни Ҷумҳурии Тоҷикистон «Дар бораи рўзҳои ид» санаи 11-уми март таҷлили Рўзи матбуот, ки ба ифтихори нашри нахустрўзнома бо забони тоҷикӣ «Бухорои шариф» пазируфта шудааст, далели возеҳи таваҷҷўҳи Ҳукумати мамлакат нисбат ба ин соҳа маҳсуб меёбад.
Воситаҳои ахбори омма – рўзномаву нашрия, маҷаллаву китоб, телевизиону радио, шабакаҳои гуногуни иттилоотии Интернет имрўз беш аз ҳама чун расонандаи маълумоти нав-тарин ба мардум аз рўйдодҳои шаҳру кишвар ва олам муҳимият доранд ва хидмати шоиста низ ба ҷо оварда истодаанд. Яъне “табъу нашр силоҳи муҳими таъсиррасон ба мафкураи одамон аст, ки онро наметавон бо чизи дигар қиёс кард” ва матбуотро ҳокимияти чаҳорум низ мегўянд, ки исботи гуфтаҳои болост.
Имрўз фазои иттилоотии шаҳри Хуҷандро нашрияи “Тирози ҷаҳон”, сомонаи расмии Мақомоти иҷроияи ҳокимияти давлатии шаҳри Хуҷанд ва Хадамоти матбуоти Раиси шаҳри Хуҷанд дар расонаи интернетии фейсбук, ширкатҳои телевизион ва радиои “Азия”, “СМ-1”, “Диёр”, “7 ситора”, “Танин”, “Шаҳри ман”, “Тироз”, “Пайванд” ва амсоли онҳо пур мекунанд, ки сокинон аз онҳо истифода мебаранд ва ҳусну қубҳи фаъолияташонро изҳор медоранд.
Дар марҳилаи кунунӣ матбуоти тоҷик тадриҷан рушду такомул ёфта, ба хотири пешрафту шукуфоии диёри азизамон ва мардуми сарбаланди он софдилонаю содиқона хизмат менамояд. Рисолати аҳли қалам ва кормандони воситаҳои ахбори умум маҳз аз ҳақиқатнигорӣ, инъикоси воқеии ҳаводис ва баҳои ростин додан ба ҷараёни ҳаёти ҷамъиятӣ сарчашма мегирад.
Итминони комил дорам, ки рўзноманигорон бо дарки масъулияти баланд ҳаёти ҷамъиятию сиёсӣ, иқтисодию иҷтимоӣ ва фарҳангию маънавии шаҳри ҳамешабаҳори Хуҷандро дар раванди пешравиҳои беназир воқеъбинона ба қалам дода, дар тарғиби сиёсати пешгирифтаи Ҳукумати мамлакат, хосатан, ғояҳои дурандешона ва ояндабинонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон ва дастурҳои Раиси вилояти Суғд Раҷаббой Аҳмадзода саҳм мегузоранд.
Қаламкашони арҷманд, рўзноманигорони ватандўст! Шуморо ба муносибати Рўзи матбуот аз номи Мақомоти иҷроияи ҳокимияти давлатии шаҳри Хуҷанд муборакбод намуда, бароятон тандурустии комил, саодати рўзгор ва дар фаъолияти минбаъдаатон ба хотири ғановати фазои иттилоотӣ, тарғибу ташвиқи ғояҳои давлати демократии ҳуқуқбунёд, дунявӣ, ягона ва ҳидояти сокинон ба меҳнати созанда ба хотири истиқболи сазовори ҷашни муқаддаси миллӣ – 35-солагии Истиқлоли давлатии Ҷумҳурии Тоҷикистон, дастовардҳои нав ба нави эҷодӣ орзу мекунам.
Рўзи матбуоти тоҷик муборак, ҳамдиёрони азиз!
