30 Январь 2025
Недоступен ни однин перевод.
Субҳи имрӯз, санаи 30-юми январи соли ҷорӣ бахшида ба Ҷашни Сада бо иштироки Раиси вилоят Раҷаббой Аҳмадзода, муовинони Раиси вилоят, Раиси шаҳри Хуҷанд Фирдавс Шарифзода ва меҳмонон дар назди Театри ба номи Камоли Хуҷандии маркази вилоят чорабинии идона ва намоиш-фурӯши ниҳолҳои мевадиҳанда, сояафкану ороишӣ, кӯчати гулу гулбуттаҳо ва тухмии зироатҳои кишоварзӣ баргузор шуд.
Нахуст Раиси вилоят Раҷаббой Аҳмадзода ва ҳайати ҳамроҳонаш аз хаймаҳои идонае,ки ба муносибати ҷашни Сада аз ҷониби шаҳру навоҳии вилоят ташкил шуда буд, шинос гардиданд. Дар хаймаҳо дастоварди хоҷагии халқи шаҳру навоҳӣ бо фарҳангу расму оин муаррифӣ карда шуд.
Раиси вилоят кулли сокинони вилоятро ба муносибати фарорасии ҷашни Cада табрик гуфт ва рўзгори ободро таманно намуд.
Раҷаббой Аҳмадзода таъкид намуд, ки бо шарофати истиқлолияти давлатӣ ва ташаббусҳои бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷашни Сада дубора эҳё гардид.
-Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон дар яке аз суханрониҳои худ хеле бамаврид таъкид доштанд, ки “Суннату ойинҳои нек ва ҷашнҳои миллии мо, мисли Наврӯз, Меҳргон ва Сада дар тӯли таърих барои тарғиби ахлоқу маънавиёти созанда хизмат кардаанд. Аз ин рӯ, зарур аст, ки дастовардҳои маънавию моддии мардуми шарифи мо ба феҳристи умумиҷаҳонии ЮНЕСКО ворид гарданд ва нақши тамаддунсози миллати тоҷикро минбаъд низ боло баранд”. Пешниҳоди Пешвои миллат дар мавриди ворид гардидани ин ҷашни мубораки миллии мо ба феҳристи умумиҷаҳонии ЮНЕСКО итминон мебахшад, ки чун истиқболи самимонаи Наврўзи Аҷам, бо маҷмўи фазилатҳои барҷаставу наҷиби хеш Сада ба истиқболи самимонаи мардуми олам рў ба рў гардида, минбаъд низ дар тарғиби бузургтарин фазилатҳои ахлоқӣ дар миёни ҷаҳониён таъсири пурфайзе мегузорад, - таъкид намуд Раҷаббой Аҳмадзода.
Зикр гардид, ки Ҷашни Сада аз қадимулайём бо табиат, заминдорӣ ва касбу кори гузаштагонамон пайванди қавӣ дошта, ҳамчун ҷузви фарҳанги маънавии халқи тоҷик дар тӯли қарнҳо барои муаррифии мардуми соҳибтамаддуну куҳанбунёдамон ва ҳифзи беҳтарин арзишу суннат ва расму ойинҳои миллӣ нақши арзишманд гузоштааст.
Дар ин бора, Пешвои муаззами миллат муҳтарам Эмомалӣ Раҳмон чунин таъкид намудаанд: «Ниёгони ориётабори мо ҳанӯз беш аз шаш ҳазор сол қабл аз ин бо ҳунармандиву косибӣ, истеҳсоли ашёи зарурии рӯзгор ва корҳои кишоварзиву боғдорӣ машғул будаанд. Онҳо барои ҳар як фасли сол иду маросим ва одатҳои махсус доштаанд, ки ҳама бо табиат, заминдорӣ ва касбу кори гузаштагонамон пайванди мустаҳкам дошта, аз ҷониби хурду бузург таҷлил мегардиданд. Ҷашни Сада яке аз ҳамин ойинҳои басо деринаи мардуми мо мебошад».
Тибқи тақвими суннатии тоҷикон чиллаи калон аз 22-юми декабр оғоз шуда, шаби даромадани чилларо гузаштагони мо бо номҳои «Шаби чилла» ва «Шаби ялдо» ҷашн мегирифтанд ва баъди тамом шудани чиллаи калон, ки ба 30 январ рост меояд, ҷашни Садаро таҷлил мекарданд. Ин ойин маънои онро дошт, ки даврони сардӣ ба поён расида, мавсими баҳор ва оғози киштукор наздик мешавад. Ба ин маънӣ, Сада рамзи пирӯз омадани гармиву равшанӣ бар сардӣ ва торикӣ маҳсуб шуда, рамзи асосии он — манбаи равшанию нур, яъне оташ мебошад.
Иттилоъ дода шуд, ки Мақомоти иҷроияи ҳокимияти давлатии вилояти Суғд ҷиҳати амалӣ сохтани ҳидоятҳои Пешвои миллат дар самти эҳёи суннат ва оинҳои куҳани таърихӣ, аз ҷумла ҷашни Сада тадбирҳои амалӣ меандешад.
Дафтари матбуоти
Раиси шаҳри Хуҷанд