17 Декабрь 2024
Недоступен ни однин перевод.
Дар кӯдакистони “Шукуфаи Истиқлол”-и шаҳри Хуҷанд озмуни шаҳрии «Тоҷикистон-диёри ҳамешасабз» бо иштироки намояндагони шуъбаи ҳифзи муҳити зист ва шуъбаи маорифи шаҳри Хуҷанд баргузор гардид.
Бояд қайд намуд, ки озмуни «Тоҷикистон-диёри ҳамешасабз» бо иқдоми шуъбаи ҳифзи муҳити зисти шаҳр бахшида ба 35 солагии Истиқлоли давлатии Ҷумҳурии Тоҷикистон, ташвиқи моҳияту мазмуни Даҳсолаи байналмилалии амал "Об барои рушди устувор" гузаронида шуда, ҳадафи аслӣ баланд бардоштани маърифати экологӣ байни тарбиятгирандагони муассисаҳои таҳсилоти томактабӣ мебошад.
Дар озмун тарбиятгирандагони тамоми муассисаҳои таҳсилоти томактабӣ маҳсули эҷоди хешро аз рўйи номинаҳои эълоншуда пешниҳод намуданд.
Ҳамин тавр, мақоми аввалро дар ин озмун дастпарварони кӯдакистонҳои №23, 25 ва 40 Шаҳрия Шарифзода, Шукрона Олимҷонзода ва Аниса Муллоҷонӣ ба даст оварданд. Зинаи дуюмро муассисаҳои таҳсилоти томактабии №15, 32 ва 35 Муртазо Шарифӣ, Фаррух Ҷумъаев ва Абӯалӣ Ғафурзода соҳиб шуданд. Ҷойи сеюмро МТТ №1, 18, 20, 33, 37 ишғол намуданд.
Таъкид шуд, ки ҳадаф аз баргузории озмун ташаккул ва баланд бардоштани мавқеи фаъоли кўдакон дар соҳаи ҳифзи муҳити зист, муносибати эхтиёткорона дар фикрронӣ ва амал нисбат ба экология, дастгирӣ ва ҳавасманд намудани самти экологӣ дар кори муассисаҳои таълимӣ маҳсуб меёбад.
Зикр гардид, ки озмуни мазкур дар доираи иҷрои рукнҳои “Барномаи давлатии маҷмуи рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025” бо мақсади тарбия ва маърифати экологӣ, муносибати эҳтиёткорона ва эҳтиромона зоҳир намудан ба муҳити зист, ташаккули хоҳиши устуворӣ, риоя кардани меъёрҳои ахлоқӣ дар раванди муносибат бо табиат ва истифодаи захираҳои табиӣ ва таблиғоти ҳадафҳои экологӣ сурат гирифта, дарки афзалият доштани маърифати экологӣ ҳамчун ҷузъи гуманитарӣ ва иҷтимоию табиии муассисаҳои таҳсилоти томактабӣ мебошад.
Дафтари матбуоти
Раиси шаҳри Хуҷанд