20 Ноябр 2024
Дар литсейи донишкадаи политехникии шаҳри Хуҷанд машварати доимоамалкунандаи муовинони директор оид ба таълими муассисаҳои таҳсилоти миёнаи умумии шаҳр баргузор гардид.
Мудири кабинетҳои фаннии шуъбаи маорифи шаҳри Хуҷанд Дилбар Абдуллоева машваратро ҳусни оғоз бахшида, аз ҷумла зикр дошт, ки тадбирҳои амалие, ки аз ҷониби Ҳукумат ва Давлат таҳти роҳбарии Пешвои муаззами миллат муҳтарам Эмомалӣ Раҳмон дар самти фароҳам овардани шароити лозима ва таҳкими инфрасохтори соҳа андешида мешавад, аҳли маорифро муваззаф мегардонад, ки барои баланд бардоштани сатҳу сифати таҳсил ва донишазхудкунии хонандагон саъйю талош намуда, корҳои судбахшу муассирро анҷом диҳанд, ки муҳассилин дар олимпиадаҳои ҷумҳуриявию хориҷӣ мақомҳои ифтихориро ба даст оранд. Омўзгорон дар раванди таълиму тарбия ба сатҳи дониш ва малакаҳо, рушди ақлонӣ, маънавӣ ва ҷисмонии хонандагон махсус зоҳир намоянд, то ин, ки ҳадафҳои нақшавӣ ба даст оварда шавад.
Зикр гардид, ки сифати таҳсилот категорияи педагогӣ – иҷтимоиест, ки ҳолат ва самарабахшии ҷараёни таълиму тарбия ва мутобиқати онро ба стандарту барномаҳои таҳсилот ва талаботу ниёзмандиҳои ҷомеа дар самти ташаккул ва рушди салоҳиятмандиҳои шаҳрвандӣ, иҷтимоӣ ва касбии шахсият муайян менамояд. Ба омилҳо ва нишондиҳандаҳои муайянкунандаи сифати таҳсилот мазмуни таҳсилот, китобҳои дарсӣ, маводи иловагии таълим ва сатҳи таъминот бо онҳо, шаклу методҳои таълим, аз ҷумла, методҳои навоварона ва иттилоотӣ, заминаҳои моддӣ-техникӣ, ҳайати кадрӣ, хонандагон, инфрасохтори муассисаи таълимӣ ва ташкили ҷараёни таълим дохил мешавад.
Дар ҷараёни машварат маърӯза таҳти унвони “Ҷадвали дарсӣ ва тарзи таҳияи он” шунида шуд ва он мавриди баррасии муовинони директор оид ба таълими муассисаҳои таҳсилоти миёнаи умумии шаҳри Хуҷанд қарор гирифт.
Сипас дар синфҳхонаҳои алоҳида аз ҷониби омӯзгорони литсейи донишкадаи политехникии шаҳри Хуҷанд машғулиятҳои кушоди намунавӣ аз фанҳои дақиқ ташкил гардид, ки дар он намояндаи шуъбаи маорифи шаҳр ва муовинони директор оид ба таълими муассисаҳои таҳсилоти миёнаи умумии шаҳри Хуҷанд иштирок ва онро мушоҳидаву таҳлил намуданд.
Дафтари матбуоти
Раиси шаҳри Хуҷанд
