07 Ноябр 2024
Субҳи имрӯз дар шаҳри Хуҷанд тибқи нақшаи кории Маркази назорати давлатии санитарию эпидемологии шаҳр дар якчоягии Шуъбаи безараргардонии худмаблағгузории шаҳри Хуҷанд дар якчанд муассисаҳои таълимии шаҳр корҳои безараргардонӣ анҷом дода шуд.
Корҳои тамизгардонӣ бо мақсади безараргардонии тамоми манбаъҳои бемориҳои сироятӣ, махсусан зардпарвин роҳандозӣ карда шуд.
Бояд қайд намуд, ки нишонаҳои аввалини бемории зардпарвин камқувватӣ, беҳолӣ, нотобӣ, зуд хасташавӣ, пастшавии иштиҳо ва эҳсоси дилбеҳузурӣ мебошанд. Вақте ин нишонаҳо дар нафари бемор мушоҳида шуданд, бояд зуд ба табиб муроҷиат намуд. Агар ин нишонаҳоро инсон нодида гирад, сипас нишонаҳои дигар: ҳисси вазнинӣ дар паҳлӯи рости зери қабурға, баландшавии ранги пешоб аз осеб ёфтани ҷигар дарак дода, инчунин дар пардаи чашм, пардаи луобии ком ва зери забон аён шуда, сипас дар пӯст зоҳир мешаванд.
Безараргардонӣ бо маҳлули маводи безараргардонии навъи тамиздуал сурат гирифт, ки ҳадафи он нобуд кардани барангезандаи ҳамагуна бемориҳои сироятии муҳит мебошад.
Зимни безараргардонӣ аз сокинон ва меҳмонони шаҳри Хуҷанд даъват ба амал оварда шуд, ки дар ҷойҳои ҷамъиятӣ қоидаҳои беҳдоштиро риоя ва муҳити атрофро аз ҳаргуна ифлосиҳо пок нигоҳ доранд.
Дафтари матбуоти
Раиси шаҳри Хуҷанд
