05 Ноябр 2024
Дар Коллеҷи омӯзгории шаҳри Хуҷанд ба муносибати 30 солагии қабули Конститутсияи Ҷумҳурии Тоҷикистон ҳамоиш баргузор гардид, ки дар он прокурори шаҳри Хуҷанд мушовири адлияи дараҷаи якум Бахтиёр Нозимзода ва раиси Суди шаҳри Хуҷанд Раҳмон Ҷурахон иштирок ва суханронӣ намуданд.
Ҳамоишро директори Коллеҷи омӯзгории шаҳри Хуҷанд Акмал Оқилзода ифтитоҳ намуд.
Сипас, прокурори шаҳри Хуҷанд мушовири адлияи дараҷаи якум Бахтиёр Нозимзода баромад намуда, аз ҷумла афзуд, ки қабули якдилонаи Конститутсияи Тоҷикистони соҳибистиқлол аз муҳимтарин дастовардҳои давлатдории навини мо мебошад. Чуноне Президенти Ҷумҳурии Тоҷикистон муҳтарам Эмомалӣ Раҳмон иброз намудаанд: «Қабули Конститутсия дар таърихи навини давлати мо аз ҷумлаи рӯйдодҳои муҳимтарини сиёсие мебошад, ки арзиш ва аҳамияти он бо гузашти замон бештар мегардад».
Дарвоқеъ, Конститутсия ба сифати санади олии ҳуқуқӣ барои тамоми халқу миллатҳо азизу муътабар мебошад. Аммо бо назардошти якчанд хусусияти худ Конститутсияи Ҷумҳурии Тоҷикистон барои халқи тоҷик боз ҳам арзишмандтар маҳсуб мешавад.
Пеш аз ҳама, қабули Конститутсияи Ҷумҳурии Тоҷикистон Истиқлолияти давлатиро, ки орзуву омоли ҳазорсолаи мардум буд ва барои расидан ба он халқи тоҷик садсолаҳо боз муборизаҳои истиқлолиятхоҳона мебурд, эътирофӣ ҳуқуқӣ бахшида, барои ҳифзу таҳкими он ва сохтани давлати миллӣ замина гузошт.
Таъкид шуд, ки дар Конститутсияи Ҷумҳурии Тоҷикистон эътирофу эҳтироми арзишҳои миллӣ, расму оинҳо дар раванди пуртазоди ҷаҳонишавӣ омили воқеии пойдорӣ ва таҳкими истиқлоли мамлакат арзёбӣ шуд. Масалан, забони тоҷикӣ чун забони давлатӣ расман эълон гардид ва рамзҳои давлатӣ ҳамчун муқаддасот шинохта шуданд. Мутобиқи ин талаботи Конститутсия, коргузорӣ, ҳуҷҷатнигорӣ, таҳияи санадҳои меъёрии ҳуқуқӣ, сабти асноди шаҳрвандӣ ва дигар муносибатҳои меҳнатӣ бо забони давлатӣ доир мешаванд.
Афзалияти дигари ин санад таҳияи боби алоҳида оид ба ҳуқуқу озодиҳои инсон аст. Бори аввал мафҳуми инсон дар чаҳорчӯби қонуни асосии давлат баррасӣ ва эътироф гардид ва “дар асоси ташаккули низоми арзишҳои нав ва баҳамтаъсиррасонии фарҳангҳо ва тамаддунҳои мардумон ҷомеа, зарурати дарки нави арзишҳо ва ба меъёрҳои нав даровардани онҳо ба вуҷуд омад. Мутобиқи конститутсия, ҳуқуқу озодиҳои инсон ҳаматарафа ҳимоя карда мешаванд ва давлат ба ин кафолат медиҳад.
Аз ҷониби дигар, Конститутсияи Ҷумҳурии Тоҷикистон шаҳрвандонро вазифадор менамояд, ки риояи ҳама талаботи ин санад ҳатмӣ аст, яъне шаҳрвандон дар ҳама ҳолат бояд талаботи конститутсияро риоя кунанд. Дар вақти риоя накардани талаботи конститутсия мутобиқи қонун ва дигар санадҳои ҳуқуқӣ ҷавобгарӣ муайян мешавад.
Сипас раиси Суди шаҳри Хуҷанд Раҳмон Ҷӯрахон низ доир ба аҳамият ва муҳтавои Конститутсияи Ҷумҳурии Тоҷикистон ҳамчун санади воломақоми давлатӣ дар ташаккули рушди давлатдории миллӣ маърӯза намуданд.
Дар ҷараёни ҳамоиш устодони Коллеҷи омӯзгории шаҳри Хуҷанд Қутфулло Зикруллозода, Юсуф Бобоев, Хуршеда Наҷмиддинова, Раъно Манонова, Шафоат Файзиева маърӯзаҳои илмӣ намуд.
Бо мубодилаи афкорба кори ҳамоиш ҳусни анҷом бахшида шуд.
Дафтари матбуоти
Раиси шаҳри Хуҷанд
