Нахуст аз ҷониби мудири шуъбаи маорифи шаҳри Хуҷанд Шаҳноза Мақсудзода номаи табрикотии Раиси шаҳри Хуҷанд Фирдавс Шарифзода ба муносибати Рўзи забони давлатӣ ба самъи ҳозирин расонида шуд, ки дар он аз ҷумла гуфта мешавад: “Маҳз Истиқлоли давлатӣ барои дурахши дигарбораи яке аз муқаддасоти миллии мо – забони тоҷикӣ ва рушду такомули он заминаи мусоид ва имкониятҳои фаровон муҳайё намуд. Забони тоҷикӣ, дар навбати худ, ба сифати рукни муҳимми давлатдории миллӣ ваҳдату сарҷамъии миллати моро дар саросари кишвар таъмин сохт. Забон дар ҳама давру замонҳо барои муаррифии миллат рукни муҳим ва муқаддас ба шумор рафта, поку беолоиш нигоҳ доштани он вазифаи ҳар як соҳибзабон ва шахси ватандўст мебошад.

Таъкид шуд, ки забони тоҷикӣ ҳамчун омили муҳими пойдории миллат ва давлатдории миллӣ аз ҷониби давлат ҳимоя ва нигаҳдорӣ шуда, дар марҳилаи нави муносибатҳои иҷтимоӣ дар мақоми забони давлатӣ дар таҳкими давлату давлатдории миллӣ ва таъмини рушди босуботи иқтисодиву иҷтимоӣ ва фарҳангӣ нақши муҳим дорад.

Тавре Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон таъкид намудаанд: «Забон таърихи зиндагии миллат ва пайвандгари наслҳои дирўзу имрўзу фардо мебошад».

Зикр гардид, ки забони тоҷикӣ, лафзи ширини модарии мо аз қаъри ҳазорсолаҳо сарчашма мегирад ва бо шеъри Рўдакию Фирдавсӣ, Саъдию Хайём, Ҳофизу Камол, Турсунзодаву Лоиқ ва бисёр дигар саромадону роҳпаймоёни адабиётамон шуҳрати ҷаҳонӣ дарёфтааст.

Сипас, аз тарафи муҳассилини МТМУ №16 барномаи адабӣ фарҳангии фарогири ғояи ватандӯстиву меҳанпарварӣ пешкаши ҳозирин гардонида шуд.